অসম লাইভ২৪ঃ ‘ৰূপহ কোঁৱৰৰ চুমা পৰশতে, লাজুকী কুঁৱৰী মৰহি যায়…’ আজি শিল্পী দিৱস। সুন্দৰৰ পূজাৰী, বিপ্লৱী শিল্পী ৰূপকোঁৱৰ জ্যোতিপ্ৰসাদ আগৰৱালাৰ কালজয়ী গীতৰ মূৰ্ছনাৰে মুখৰিত হয় ৰাজ্যৰ আকাশ-বতাহ। জ্যোতি প্ৰসাদৰ জ্যোতি অৱলোকন আজি লুইতৰ দুয়োপাৰে। মহান শিল্পী জ্যোতিপ্ৰসাদ আগৰৱালাৰ আজি মৃত্যু তিথি। ১৯০৩ চনৰ ১৭ জুনত জন্ম হৈছিল জ্যোতিপ্ৰসাদ আগৰৱালাৰ । তেওঁৰ উপৰি পুৰুষ নৱঙ্গৰাম আগৰৱালা অসমলৈ আহিছিল ১৮১১ চনতেই । সেই বংশধৰৰেই পৰমানন্দ আগৰৱালাৰ পুত্ৰ জ্যোতিপ্ৰসাদ । তেজপুৰ হাইস্কুল,ডিব্ৰুগড় চৰকাৰী হাইস্কুল,জজ হাইস্কুলত অধ্যয়ন কৰা জ্যোতিপ্ৰসাদে ১৯২১ চনত অসহযোগ আন্দোলনতো অংশ লৈছিল।
কলিকতাৰ নেচনেল কলেজত আই এ দ্বিতীয় বৰ্ষলৈকে অধ্যয়ন কৰা জ্যোতিপ্ৰসাদে ১৯২৬ চনত বিলাতলৈ যাত্ৰা কৰে । এডিনবৰা বিশ্ববিদ্যলয়ৰ পৰা মেট্ৰিকুলেচন হৈ উচ্চ শিক্ষা গ্ৰহণ কৰিছিল যদিও সেই শিক্ষা অসমাপ্ত হৈ ৰয়। তাৰ পিছত জাৰ্মানীত সাত মাহ চিনেমা শিল্প সম্পৰ্কীয় শিক্ষা গ্ৰহণ কৰিছিল জ্যোতিপ্ৰসাদে। ১৯৩০ চনত তেওঁ স্বদেশলৈ ঘূৰি আহে । ১৯২১ চনতে অসহয়োগ আন্দোলনত নমা জ্যোতিপ্ৰসাদে বিদেশৰ পৰা ঘূৰি আহি স্বাধীনতা আন্দোলনত অংশ লোৱা বাবে ১৯৩২ চনত ১৫ মাহ সশ্ৰম কাৰাদণ্ড আৰু ৫০০ টকা জৰিমনা হৈছিল।
শিলচৰ কাৰাগাৰত থাকোতেই তেওঁ আক্ৰান্ত হৈছিল যক্ষ্মা ৰোগত। জেলৰ ম্যাদ শেষ কৰি বাহিৰলৈ আহি ১৯৪১ চনৰ পৰা কংগ্ৰেছৰ স্বেচ্ছাসেৱক বাহিনীত যোগ দিয়া জ্যোতিপ্ৰসাদে এই বাহিনীৰ সৰ্বাধিনায়কো হৈছিল ব্ৰিটিছ চৰকাৰৰ পৰা পলাই থাকিবলৈ তেওঁ কলিকতাত আত্মগোপন কৰিছিল। জাতীয় চিন্তা, চেতনা আৰু স্বাধীনতাৰ আন্দোলনত যোগ দিৱলৈ উৎসাহিত কৰা জ্যোতি প্ৰসাদে সৰুৰে পৰাই সাহিত্য সাধনা কৰিছিল । ছাত্ৰ হৈ থাকোতেই ১৪ বছৰ বয়সতেই তেওঁ লিখিছিল শোনিতকুঁৱৰী নাটক খন। গীত,নাটক কবিতা,শিশুকাব্য আদি সাহিত্যৰ বিভিন্ন ধাৰাত তেওঁ লিখামেলা কৰিছিল। ১৯৩৪ চনত ভোলাগুৰি চাহ বাগিছাত অস্থায়ী চিত্ৰবন নামৰ ষ্টুডিঅ’ সাজি প্ৰথম খন অসমীয়া কথাছবি জয়মতী তেওঁৱেই নিৰ্মান কৰিছিল । ১৯৪৪ চনৰ পৰা ‘অসমীয়া’ নামৰ কাকত খন পুনৰ প্ৰকাশ কৰি সাত মাহ কাল তেওঁ সম্পাদনাও কৰিছিল ।১৯০৩ চনৰ ১৭ জুনত ডিব্ৰুগড় জিলাৰ মদাৰখাত মৌজাৰ তামোলবাৰী চাহ বাগিছাত জ্যোতিপ্ৰসাদ আগৰৱালাই জন্ম লাভ কৰিছিল। ১৯৫১ চনৰ ১৭ জানুৱাৰীৰ দিনটোতে মৃত্যু হৈছিল ৰূপকোঁৱৰৰ। ১৯৩৫ চনত জ্যোতিপ্ৰসাদ আগৰৱালাই প্ৰথম অসমীয়া চলচিত্ৰ জয়মতীৰ নিৰ্মাণ কৰিছিল। অসমীয়া জাতি সংস্কৃতি, চিনেমা, মাহিত্য সকলো ক্ষেত্ৰলৈ জ্যোতিপ্ৰসাদ আগৰৱালাই যি অৱদান আগবঢ়াই গ’ল সেই জ্যোতিৰে এতিয়াও অসমীয়া জাতিক আলোকিত কৰি জিলিকাই ৰাখিছে লুইতৰ দুয়োপাৰ।
তেওঁ আছিল তিনিও কালৰ শিল্পী। অতীত,বৰ্তমান আৰু ভবিষ্যতৰ সমন্বয়ৰ বাহক। অসমীয়া জাতিক জগাই তুলিছিল তেওঁ। নিজকে তেওঁ কৈছিল অসমৰ নবীন জোৱান। অগ্নিময় অভিমানেৰে অজেয় অসমৰ অগ্নিময় অভিমন বুকুত জ্বলাই ৰাখিছিল।তেওঁ লিখিছিল – ” মোৰ গানত জ্বলে শত যুগ কত অভিমান / মোৰ গানে বিচাৰে চিৰ দুখীয়াৰ চিৰ পৰিত্ৰান ” তেও ৰছিচিল বজ্ৰগান। সেই গানৰ কলিয়নি শক্তিত আছে বিশ্বজীৱন। সেয়েহে তেওঁ গীত বোৰৰ মাজত সাধৰণ লোকৰ মনৰ কথা পোনপটীয়াকৈ প্ৰতিফলিত হয়। এইগৰাকী শিল্পীৰ ১৯৫১ চনৰ ১৭ জানুৱাৰীত ৪৮ বছৰ বয়সত কৰ্কট ৰোগত আক্ৰান্ত হৈ মৃত্যু হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
