অসম লাইভ২৪ঃ নিউইয়ৰ্কৰ ইনষ্টিটিউট অৱ কাৰ্ডিঅ’ভাছকুলাৰ ৰিচাৰ্ছৰ এক গৱেষণাত পোহৰলৈ অহা তথ্যমতে নিদ্ৰাহীনতাই হাৰ্টৰ ওপৰত গভীৰভাৱে প্ৰভাৱ পেলায়। নিদ্ৰাহীনতাৰ বাবেই শৰীৰৰ ৰোগ প্ৰতিৰোধ ক্ষমতাও কমি যায়। কভিডৰ বাবে হোৱা লকডাউনৰ পৰাই মানুহৰ জীৱনশৈলীত পৰিবৰ্তন আহিছে। পৰ্যাপ্ত পৰিমানে টোপনি নহ’লেই বহুৰোগে শৰীৰত বাহৰ পাতে। গুৰুতৰ ৰোগ যেনে হাৰ্টৰ সমস্যা, ডায়েবেটিছ, ব্লাড প্ৰেছাৰ, হৰমনৰ ভাৰসাম্যহীনতা আদি সমস্যাই দেখা দিয়ে।
নিউইয়ৰ্কৰ ইনষ্টিটিউট অৱ কাৰ্ডিঅ’ভাছকুলাৰ ৰিচাৰ্ছে বিগত ৬ সপ্তাহ ধৰি কেইবাজনো সুস্থ মানুহৰ ওপৰত গৱেষণা চলাইছিল। গৱেষণা চলাওতে এজন সুস্থ মানুহক প্ৰায় ২ ঘণ্টা কমকৈ শুবলৈ দিয়া হৈছিল। প্ৰতিদিনে দুঘণ্টা কমকৈ শুৱাৰ বাবে এইসকল ব্যক্তিৰ শৰীৰত কমি গৈছিল শ্বেতৰক্ত কণিকাৰ পৰিমান। ইফালে প্ৰাপ্তবয়স্ক কেইজনমান পুৰুষৰ ওপৰতো গৱেষণা পৃথককৈ চলোৱা হৈছিল। ব্যক্তিকেইজনক প্ৰায় ৮ ঘণ্টা সময় শুবলৈ দিয়া হৈছিল। তেওঁলোকৰো তেজৰ নমুনা পৰীক্ষা কৰাত শ্বেতৰক্ত কণিকাৰ পৰিমান সঠিক পোৱা গৈছিল। ইয়াৰপৰাই প্ৰতীয়মান হৈছিল যে যিসকলৰ টোপনি সঠিক হৈছিল তেওঁলোকৰ শৰীৰত ৰোগ প্ৰতিৰোধ ক্ষমতা ঠিকেই আছে।
পৰীক্ষাৰ অন্ততেই গৱেষক দলটোৱে কৈছে যে ৰোগ প্ৰতিৰোধ ক্ষমতা ঠিকে ৰাখিবলৈ এজন ব্যক্তিয়ে প্ৰতিদিনে কমেও ৭ ৰ পৰা ৮ ঘণ্টা সনয় শুৱাটো অতিকৈ প্ৰয়োজন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
