তথাকথিত সভ্য সমাজত সদায়ে উপেক্ষিত হৈ থাকে ট্ৰান্সজেণ্ডাৰসকল। ভেদভাব, উপেক্ষা আৰু উপযুক্ত সুবিধাৰ অভাৱে এখন সুস্থ সমাজৰ পৰা ক্ৰমাৎ দূৰলৈ লৈ যায় ট্ৰান্সজেণ্ডাৰসকলক। পেটৰ তাড়নাত অৱশেষত এওঁলোকৰ বহুতেই বাছ আস্থান, ৰে’লযাত্ৰীৰ মাজত একপ্ৰকাৰ ভিক্ষাবৃত্তিকেই আকোঁৱালি লোৱা দেখা যায়। এনেধৰণৰ স্থানত ট্ৰান্সজেণ্ডাৰসকলে ভিক্ষাবৃত্তিৰে জীৱন নিৰ্বাহ কৰা দৃশ্যসমূহ সকলোৰে পৰিচিত। কিন্তু লাহে লাহে বহু ট্ৰান্সজেণ্ডাৰে বিভিন্ন প্ৰতিকুল পৰিস্থিতিকো নেওচি নিজক অনন্য ৰূপত প্ৰতিষ্ঠা কৰিবলৈ সক্ষম হৈছে। তেনে কেইগৰাকীমান ট্ৰান্সজেণ্ডাৰ কাহিনীৰে যুগুত কৰা হৈছে আজিৰ এই প্ৰতিবেদন
১. কে প্ৰতীকা য়াছিনী
কে প্ৰতীকা য়াছিনী ভাৰতৰ প্ৰথম ট্ৰান্সজেণ্ডাৰ মহিলা আৰক্ষী। কে প্ৰতীকা য়াছিনী বৰ্তমান তামিলনাডু আৰক্ষীৰ উপ পৰিদৰ্শক হিচাপে কৰ্মৰত হৈ আছে। অন্য বহুজন ট্ৰান্সজেণ্ডাৰৰ দৰে প্ৰতীকায়ো শৈশৱত বহু ঘাত-প্ৰতিঘাত নেওচি আজিৰ স্থিতিত উপনীত হৈছে। তামিলনাডুৰ চালেমত জন্মগ্ৰহণ কৰা প্ৰতীকাই কম্পিউটাৰ এপ্লিকেশ্যনত স্নাতক ডিগ্ৰী গ্ৰহণ কৰিছে। চেন্নাইৰ এখন হোষ্টেলত ৱাৰ্ডেন হিচাপে কৰ্মজীৱন আৰম্ভ কৰা প্ৰতীকাই TNUSRB-এ তামিলনাডু আৰক্ষীৰ উপ পৰিদৰ্শক পদৰ বাবে দিয়া বিজ্ঞাপনত আবেদন কৰাৰ পিছত কেৱল ট্ৰান্সজেণ্ডাৰ হোৱা বাবেই তেওঁৰ আবেদন প্ৰত্যাখ্যান কৰিছিল TNUSRB-এ । পিছত প্ৰতীকাই TNUSRBৰ এই সিদ্ধান্তক বিভিন্ন আদালতৰ জৰিয়তে প্ৰত্যাহ্বান জনায়। অৱশেষত মাদ্ৰাছ উচ্চ ন্যায়ালয়ে প্ৰতীকাৰ পক্ষত থিয় দি ঐতিহাসিক ৰায় দিয়ে । আদালতে প্ৰতীকাক লিখিত আৰু শাৰীৰিক পৰীক্ষাত অৱতীৰ্ণ হোৱাৰ সুযোগ দিয়াৰ নিৰ্দেশ দিয়ে TNUSRBক। উপ পৰিদৰ্শক পদৰ বাবে প্ৰয়োজনীয় সকলো পৰীক্ষাতে সুখ্যাতিৰে উত্তীৰ্ণ হৈ এটা সময়ত প্ৰতীকাই ইতিহাস সৃষ্টি কৰি ২০১৭ৰ ২ এপ্ৰিলত তামিলনাডু আৰক্ষীত যোগ দিয়ে।
২. লক্ষ্মীনাৰায়ণ ত্ৰিপাঠী
লক্ষ্মীনাৰায়ণ ত্ৰিপাঠী বলীউডৰ এগৰাকী প্ৰতিষ্ঠিত অভিনেত্ৰী, নৃত্য নিৰ্দেশক তথা ভাৰত নাট্যম শিল্পী। ৰাষ্ট্ৰসংঘত এছিয়া পেচিফিক অঞ্চলক প্ৰতিনিধিত্ব কৰা প্ৰথমগৰাকী ট্ৰান্সজেণ্ডাৰ লক্ষ্মীনাৰায়ণ ত্ৰিপাঠী। সম্প্ৰতি লক্ষ্মীনাৰায়ণ ত্ৰিপাঠীয়ে বহুকেইটা NGO পৰিচালনা কৰে যিয়ে ট্ৰান্সজেণ্ডাৰসকলক সুস্থ আৰু সন্মানীয় জীৱিকা প্ৰদান কৰাত গুৰুত্বপূৰ্ণ ভূমিকা গ্ৰহণ কৰি আহিছে।
৩. ৰাজা দত্ত, ক্লাছিকেল ডান্সাৰ আৰু নৃত্য প্ৰশিক্ষক
পশ্চিমবংগৰ আলিপুৰদুৱাৰত জন্মগ্ৰহণ কৰা ৰাজা দত্ত বৰ্তমান সময়ৰ এগৰাকী প্ৰতিষ্ঠিত নৃত্যশিল্পী। নৃত্যৰ প্ৰশিক্ষণেৰে তেওঁ উন্নত জীৱন যাপন কৰাৰ উপৰিও আলিপুৰদুৱাৰৰ নিজৰ সমুদায়ৰ লোককে ধৰি ৪০০তকৈ অধিক ছাত্ৰ-ছাত্ৰীক নৃত্যৰ প্ৰশিক্ষণ দিয়ে। ক্লাছিকেল নৃত্যৰে ৰাজা দত্তই ইতিমধ্যে নিজৰ এক সুকীয়া পৰিচয় দাঙি ধৰিবলৈ সক্ষম হৈছে। ইয়াৰ উপৰিও নৃত্যৰ বাবেই বিশ্বৰ বহুকেইখন দেশ ভ্ৰমণৰ সুযোগ লাভ কৰিছে ৰাজা দত্তই।
৪ মানৱী বন্দোপধ্যায়
মানৱী বন্দোপধ্যায় এগৰাকী বাংলা সাহিত্যৰ প্ৰতিষ্ঠিত ট্ৰান্সজেণ্ডাৰ লেখিকা। ভাৰতৰ প্ৰথমখন ট্ৰান্সজেণ্ডাৰ আলোচনী অৱমানৱৰো সম্পাদিকা মানৱী বন্দোপধ্যায়। বিগত ২৬ বছৰে বন্দোপধ্যায়ে নিজাববীয়া প্ৰচেষ্টাত চলাই আহিছে এই আলোচনীখন। বন্দোপধ্যায় বৰ্তমান পশ্চিমবংগৰ কৃষ্ণনগৰ মহিলা মহাবিদ্যালয়ৰ অধ্যক্ষা হিচাপে কাৰ্যনিৰ্বাহ কৰি আছে।
এই লেখাটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
