দেশৰ নতুন প্ৰজন্মৰ ভোটাৰসকলৰ বাবে গুৰুত্বপূৰ্ণ বিষয় এটা লৈ নিৰ্বাচন আয়োগৰ ভিতৰত মতভেদ সৃষ্টি হোৱাৰ কথা পোহৰলৈ আহিছে। ইণ্ডিয়ান এক্সপ্ৰেছৰ পিছত এইবাৰ Economic Times-এ এই সন্দৰ্ভত অন্য এটা বাতৰি প্ৰকাশ কৰিছে। ১৮ বছৰ সম্পূৰ্ণ কৰা নতুন ভোটাৰসকলৰ নাম ভোটাৰ তালিকাত অন্তৰ্ভুক্ত কৰাৰ বাবে নিয়মীয়াকৈ কৰা Special Summary Revision (SSR) বা বিশেষ সংক্ষিপ্ত সংশোধন প্ৰক্ৰিয়া ২০২৪ৰ পিছৰে পৰা দেশজুৰি পুনৰ আৰম্ভ হোৱা নাই বুলি Economic Timesৰ এক প্ৰতিবেদনত প্ৰকাশ পাইছে। Economic Timesৰ প্ৰতিবেদন অনুসৰি সাধাৰণতে প্ৰতি বছৰে নিৰ্বাচন আয়োগে ভোটাৰ তালিকা সংশোধনৰ বাবে এক নিৰ্দিষ্ট সময়সূচী ঘোষণা কৰে। কিন্তু ২০২৫-২৬ বৰ্ষত এই প্ৰক্ৰিয়া আগবঢ়া নাই। ফলত ২০২৬-২৭ বৰ্ষৰ বাবে নতুন ভোটাৰসকলক ভোটাৰ তালিকাত অন্তৰ্ভুক্ত কৰাৰ সময়সূচীও অনিশ্চিত হৈ পৰিছে।
কিয় গুৰুত্বপূৰ্ণ SSR?
ভোটাৰ তালিকা নিয়মীয়াকৈ সংশোধন কৰাৰ অন্যতম উদ্দেশ্য হৈছে নতুনকৈ ১৮ বছৰ সম্পূৰ্ণ কৰা নাগৰিকসকলৰ নাম তালিকাত অন্তৰ্ভুক্ত কৰা। ইয়াৰ লগতে ভোটাৰ তালিকাত থকা নাম, ফটো আৰু অন্যান্য তথ্যৰ ভুল-ত্ৰুটি বা অসামঞ্জস্য পৰীক্ষা কৰি সংশোধন কৰাৰ সুযোগো পোৱা যায়। পূৰ্বতে ভোটাৰ হিচাপে পঞ্জীয়নৰ বাবে কেৱল ১ জানুৱাৰীক যোগ্যতা নিৰ্ধাৰণৰ তাৰিখ হিচাপে ধৰা হৈছিল। অৰ্থাৎ কোনো যুৱক-যুৱতীয়ে ১ জানুৱাৰীৰ পিছদিনা, অৰ্থাৎ ২ জানুৱাৰীত ১৮ বছৰ সম্পূৰ্ণ কৰিলেও তেওঁক পৰৱৰ্তী বছৰৰ পঞ্জীয়নলৈ অপেক্ষা কৰিবলগীয়া হৈছিল। পিছত এই ব্যৱস্থাত পৰিৱৰ্তন আনি বছৰত চাৰিটা যোগ্যতা নিৰ্ধাৰণৰ তাৰিখ—১ জানুৱাৰী, ১ এপ্ৰিল, ১ জুলাই আৰু ১ অক্টোবৰ কৰা হয়। ইয়াৰ ফলত ১৮ বছৰ সম্পূৰ্ণ কৰা যুৱক-যুৱতীসকলে বছৰৰ বিভিন্ন সময়ত ভোটাৰ হিচাপে নাম পঞ্জীয়ন কৰাৰ অধিক সুযোগ লাভ কৰে। সেইবাবেই নতুন ভোটাৰসকলৰ নাম সময়মতে ভোটাৰ তালিকাত অন্তৰ্ভুক্ত কৰাৰ ক্ষেত্ৰত SSRক অতি গুৰুত্বপূৰ্ণ বুলি গণ্য কৰা হয়।
২০২৬-২৭ বৰ্ষৰ SSRক লৈ অনিশ্চয়তা
প্ৰতিবেদন অনুসৰি, সাধাৰণতে নিৰ্বাচন আয়োগে প্ৰতি বছৰে মে’ মাহৰ শেষভাগত অথবা জুনৰ আৰম্ভণিতে SSRৰ ঘোষণা কৰে। তাৰ পিছত দেশৰ বিভিন্ন ৰাজ্যৰ মুখ্য নিৰ্বাচনী বিষয়াসকললৈ প্ৰয়োজনীয় নিৰ্দেশনা প্ৰেৰণ কৰা হয়। এই নিৰ্দেশনা জাৰি হোৱাৰ পিছত সাধাৰণতে ২-৩ মাহ ধৰি ভোটাৰ তালিকা সংশোধনৰ প্ৰাৰম্ভিক কাম চলে। ইয়াৰ পিছত আগষ্টৰ শেষৰ পৰা অক্টোবৰৰ আৰম্ভণিৰ ভিতৰত খচৰা ভোটাৰ তালিকা প্ৰকাশ কৰা হয়। খচৰা তালিকাক লৈ নাগৰিকসকলৰ দাবী আৰু আপত্তি দাখিলৰ বাবেও সাধাৰণতে ৩০-৪৫ দিন সময় দিয়া হয়। কিন্তু এইবাৰ এই সমগ্ৰ প্ৰক্ৰিয়াটো সময়মতে আগবঢ়া নাই।
SIRৰ মাজতে SSRক লৈ মতভেদ
২০২৫ চনত বিহাৰত Special Intensive Revision (SIR) ভোটাৰ তালিকা সংশোধন আৰম্ভ কৰাৰ পিছত দেশজুৰি নিয়মীয়া SSR পুনৰ আৰম্ভ কৰা হোৱা নাই। Economic Timesৰ প্ৰতিবেদন অনুসৰি, নিৰ্বাচন আয়োগৰ দুই নিৰ্বাচন আয়ুক্ত সুখবীৰ সিং সন্ধু আৰু বিবেক যোশীয়ে নিয়মীয়া SSR পুনৰ আৰম্ভ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰিছে। তেওঁলোকে নিৰ্বাচন আয়োগৰ নিজা ভোটাৰ তালিকা সম্পৰ্কীয় মেনুৱেল অনুসৰি এই কাম পুনৰ আৰম্ভ কৰাৰ পোষকতা কৰা বুলি জানিব পৰা গৈছে। আনহাতে, মুখ্য নিৰ্বাচন আয়ুক্তই চলি থকা SIRৰ মাজতে SSR প্ৰয়োজনীয় নে নহয়, সেই বিষয়ে এই বছৰৰ আৰম্ভণিতে আইনী মতামতো বিচৰা বুলি প্ৰতিবেদনটোত উল্লেখ কৰা হৈছে। আইনী পৰামৰ্শ লাভ কৰাৰ পিছত দুই নিৰ্বাচন আয়ুক্তই SSR পুনৰ আৰম্ভ কৰাৰ প্ৰয়োজনীয়তাৰ ওপৰত নিজৰ স্থিতি স্পষ্ট কৰা বুলি জানিব পৰা গৈছে।
নিৰ্বাচনমুখী ৰাজ্যসমূহতো প্ৰভাৱ
SSR কেৱল নতুন ভোটাৰৰ নাম অন্তৰ্ভুক্ত কৰাৰ বাবেই গুৰুত্বপূৰ্ণ নহয়, নিৰ্বাচনমুখী ৰাজ্যসমূহৰ বাবেও ইয়াৰ বিশেষ প্ৰয়োজনীয়তা আছে। উত্তৰাখণ্ড আৰু পঞ্জাবত এতিয়াও SIR প্ৰক্ৰিয়া চলি আছে। আনহাতে, উত্তৰ প্ৰদেশ আৰু গোৱাই ইতিমধ্যে সংশ্লিষ্ট প্ৰক্ৰিয়া সম্পূৰ্ণ কৰিছে। ২০২৭ চনৰ বিধানসভা নিৰ্বাচনৰ প্ৰতি লক্ষ্য ৰাখি এই ৰাজ্যসমূহত সময়মতে SSR সম্পন্ন কৰাৰ প্ৰয়োজনীয়তাৰ কথাও প্ৰতিবেদনটোত উল্লেখ কৰা হৈছে। বিহাৰৰ ক্ষেত্ৰতো বিষয়টো গুৰুত্বপূৰ্ণ। দেশৰ প্ৰথম ৰাজ্য হিচাপে বিহাৰত SIR সম্পন্ন কৰাৰ পিছত ইতিমধ্যে প্ৰায় এবছৰ পাৰ হৈছে।
কেৱল ভোটাৰেই নহয়, প্ৰশাসনিক কামতো প্ৰভাৱ
নিৰ্বাচন আয়োগৰ ভিতৰৰ এই মতভেদৰ প্ৰভাৱ আন কিছুমান প্ৰশাসনিক কামতো পৰাৰ কথা প্ৰতিবেদনটোত প্ৰকাশ পাইছে। ২০২৫-২৬ বৰ্ষত বদলি হোৱা প্ৰায় ৫০জন বিষয়াৰ বাৰ্ষিক গোপনীয় প্ৰতিবেদন এতিয়াও সম্পূৰ্ণভাৱে অনুমোদিত হোৱা নাই বুলি জানিব পৰা গৈছে। ইয়াৰ ভিতৰত মুখ্য নিৰ্বাচনী বিষয়া আৰু উপ-নিৰ্বাচন আয়ুক্ত পৰ্যায়ৰ বিষয়াও আছে। Economic Timesৰ প্ৰতিবেদন অনুসৰি, ACRত মুখ্য নিৰ্বাচন আয়ুক্ত আৰু দুই নিৰ্বাচন আয়ুক্তৰ অনুমোদনৰ প্ৰয়োজন হয়। কিন্তু তিনিওজন একেলগে এই কাম সম্পূৰ্ণ কৰিব নোৱাৰাৰ ফলত বহু বিষয়াৰ ACR প্ৰক্ৰিয়া পলম হৈছে। ইয়াৰ ফলত একাংশ বিষয়াই নিজে মুখ্য নিৰ্বাচন আয়ুক্ত আৰু দুয়োজন নিৰ্বাচন আয়ুক্তৰ ওচৰলৈ গৈ ACR অনুমোদন কৰোৱাৰ বাবে অনুৰোধ কৰিবলগীয়া হোৱা বুলি জানিব পৰা গৈছে। ইতিমধ্যে আন ঠাইত দায়িত্ব লাভ কৰা কিছুমান বিষয়াৰ ACRও নিৰ্বাচন আয়োগত অনুমোদনৰ অপেক্ষাত আছে।
সামগ্ৰিকভাৱে, ২০২৪ৰ পিছত নিয়মীয়া SSR পুনৰ আৰম্ভ নোহোৱাৰ ফলত নতুনকৈ ১৮ বছৰ সম্পূৰ্ণ কৰা নাগৰিকসকলৰ নাম ভোটাৰ তালিকাত সময়মতে অন্তৰ্ভুক্ত কৰাৰ প্ৰক্ৰিয়াত অনিশ্চয়তা সৃষ্টি হৈছে। একে সময়তে, এই বিষয়টোৱে নিৰ্বাচন আয়োগৰ ভিতৰৰ সিদ্ধান্ত গ্ৰহণ প্ৰক্ৰিয়া আৰু প্ৰশাসনিক কাম-কাজতো প্ৰভাৱ পেলোৱাৰ কথা প্ৰতিবেদনটোত প্ৰকাশ পাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
