ৰোহিত শৰ্মাই এৰি যোৱা আসনত বহিছে সূৰ্যকুমাৰ যাদৱ৷ টি-২০ বিশ্বকাপ জয় কৰি ৰোহিত শৰ্মাই অধিনায়কত্ব এৰাৰ পাছতেই তেওঁৰ স্থানত কোন আহিব সেই বিষয়টোক লৈ আলোচনা অব্যাহত আছিল৷ অৱশেষত সকলোৰে উৎকণ্ঠা দূৰ কৰি বৰ্ডে ঘোষণা কৰিলে সূৰ্যৰ নাম৷ ভাৰতীয় ক্ৰিকেটত মিষ্টাৰ ৩৬০ হিচাপে পৰিচিত সূৰ্যই অধিনায়কত্ব লাভ কৰি মুখ খুলিছে৷
অধিনায়ক হোৱাৰ পাছতেই প্ৰথম প্ৰতিক্ৰিয়া কি?
সম্প্ৰতি সূৰ্যকুমাৰ যাদৱে টিম ইণ্ডিয়াৰ জাৰ্ছিত তেওঁৰ ছবি শ্বেয়াৰ কৰিছে৷ ছবিৰ কেপশ্ব্যনত তেওঁ লিখিছে, ‘আপোনালোকৰ ভালপোৱা, সমৰ্থন আৰু শুভকামনাৰ বাবে অশেষ ধন্যবাদ৷ বিগত কেইবাসপ্তাহ মোৰ বাবে সঁচাকৈয়ে আশ্চৰ্যজনক আছিল৷ মই সেই কথা ভাষাৰে প্ৰকাশ কৰিব নোৱাৰো৷ এই নতুন ভূমিকাই মোৰ দায়িত্ব আৰু উৎসাহ বহু পৰিমাণে বঢ়াই দিলে৷ আশা কৰিছো আপোনালোকৰ আশীৰ্বাদ আৰু সমৰ্থন থাকিব৷ সকলো কৃতিত্ব ঈশ্বৰৰেই৷’
হাৰ্দিকৰ নামো আছিল চৰ্চাত
ৰোহিত শৰ্মাই অৱসৰ লোৱাৰ পাছতেই হাৰ্দিক পাণ্ডিয়াৰ নাম আছিল টি-২০ অধিনায়কৰ বাবে চৰ্চাত৷ কাৰণ টি-২০ বিশ্বকাপত তেওঁ আছিল সহ অধিনায়ক৷ ইয়াৰোপৰি ২০২২ চনৰ টি-২০ বিশ্বকাপৰ পাছত আন্তৰ্জাতিক টি-২০ ক্ৰিকেটত দিঘলীয়া সময়ৰ বাবে খেলৰ পৰা আঁতৰত আছিল ৰোহিত আৰু বিৰাট৷ সেই সময়ত হাৰ্দিকেই টি-২০ দলক নেতৃত্ব দিছিল৷ তেওঁৰ সেই সাফল্য আৰু অভিজ্ঞতা দেখি তেওঁকেই বহুতে অধিনায়কৰ স্থানত চাব বিচাৰিছিল৷ কিন্তু বিচিচিচিআইৰ সিদ্ধান্তই শেষ সিদ্ধান্ত৷ আশা কৰাধৰণে হাৰ্দিকে সেই আসন লাভ কৰিবলৈ সক্ষম নহ’ল৷ তাৎপৰ্যপূৰ্ণভাৱে হাৰ্দিকক সহ অধিনায়কৰ পদতো ৰখা নহল৷ সহঅধিনায়কৰ পদ দিয়া হ’ল শুভমন গীলক৷
২৭ জুলাইৰ পৰা আৰম্ভ হ’ব টি-২০ চিৰিজ
২২ জুলাই শ্ৰীলংকাৰ উদ্দেশ্যে ৰাওনা হ’ব ভাৰতীয় দল৷ টি-২০ চিৰিজৰ প্ৰথম মেচ অনুষ্ঠিত হ’ব ২৭ জুলাইত৷ শেষ মেচ হ’ব ৩০ জুলাইত৷ সেই চিৰিজত টিম ইণ্ডিয়াত একাধিক নতুন সংযোজন ঘটিব৷ যেনেকৈ নতুন কোচিং, ষ্টাফ, নতুন অধিনায়ক আৰু টি-২০ ক্ৰিকেটত ৰোহিত শৰ্মা আৰু বিৰাট কোহলিৰ অনুপস্থিতিত কোনে তেওঁলোকৰ স্থান ল’ব সেয়াও লক্ষ্যণীয় হ’ব এই চিৰিজত৷ ৰবীন্দ্ৰ জাদেজা এইবাৰ শ্ৰীলংকা চিৰিজত নাই৷ অডিআইৰ পৰা তেওঁক বাদ দিয়াৰ কাৰণ বৰ্তমানো জানিব পৰা হোৱা নাই৷ ফলত জাদেজাৰ স্থানত কোন আহিব সেয়াও আলোচনাৰ বিষয় হৈ পৰিছে ক্ৰিকেটপ্ৰেমীৰ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
