ৰাস্তাত চলাচলকাৰী লাখ লাখ পেট্ৰল বাইক আৰু স্কুটাৰ শীঘ্ৰেই অদৃশ্য হৈ যাব পাৰে৷ দিল্লী চৰকাৰে যি নতুন বৈদ্যুতিক যানবাহন নীতি বাস্তবায়নৰ কথা ভাৱিছে সেই নীতিয়ে ধীৰে ধীৰে পেট্ৰলচালিত দ্বি-চকাৰ যানবাহন বন্ধ কৰিব৷ ইয়াৰ প্ৰভাৱ পৰিব লাখ লাখ মানুহৰ ওপৰত৷ যিসকলে প্ৰতিদিনে স্কুটি বা বাইকেৰে অফিচ, কলেজ বা কৰ্মক্ষেত্ৰলৈ যায়৷ এই নীতি বাস্তবায়িত হ’লে ২০২৮ চনৰ পাছত দিল্লীত নতুন পেট্ৰলচালিত স্কুটাৰ বা বাইক ক্ৰয় কৰাও অসম্ভৱ হৈ পৰিব৷ যাৰ ফলত মানুহে বৈদ্যুতিক বিকল্পৰ দিশতেই শিৰনত কৰিবলৈ বাধ্য হব৷
দিল্লী চৰকাৰৰ প্ৰস্তাবিত খচৰাত বৈদ্যুতিক যানবাহন নীতি ২০২৬-২০৩০ পেট্ৰল আৰু ডিজেলচালিত যানবাহন পৰ্যায়ক্ৰমে বন্ধ কৰাৰ পৰিকল্পনা কৰিছে৷ নীতিৰ প্ৰাথমিক লক্ষ্য দুই চকা আৰু তিনি চকাৰ যানবাহন৷ কাৰণ ৰাজধানীৰ ৰাস্তাত এইসমূহ বাহনেই সকলোতকৈ বেছি প্ৰদূষণ বঢ়াই৷ এইসমূহেই প্ৰধান কাৰণ হৈ পৰিছে প্ৰদূষণৰ৷
২০২৮ চনৰ পৰা কেৱল বৈদ্যুতিক দুই চকাৰ বাহন ৰেজিষ্টাৰৰ প্ৰস্তাৱ
খচৰা নীতি অনুসৰি ২০২৭ চনৰ পাছত দিল্লীত কেৱলমাত্ৰ বৈদ্যুতিক তিনিচকীয়া বাহন ৰেজিষ্টাৰৰ অনুমতিৰ প্ৰস্তাৱ দিয়া হৈছে৷ ইয়াৰ ফলত ২০২৮ চনৰ পৰা নতুন দুচকীয়া বাহন ৰেজিষ্টাৰৰ বাবে কেৱল বৈদ্যুতিক বিকল্পসমূহেই উপলব্ধ থাকিব৷
দিল্লীৰ ৰাস্তাত প্ৰায় ৭.৫ মিলিয়ন যানবাহন আছে৷ যাৰ মাজত প্ৰায় দুই তৃতীয়াংশ, অৰ্থাৎ প্ৰায় ৫০ লাখ দুই চকীয়া বাহন৷ এই নিয়ম বাস্তবায়িত হ’লে ই চহৰৰ বৃহত্তম যানবাহন বিভাগত উল্লেখযোগ্যভাৱে প্ৰভাৱ পেলাব৷ চৰকাৰে বিশ্বাস কৰে যে এই পদক্ষেপে দূষণ উল্লেখযোগ্যভাৱে হ্ৰাস কৰিব পাৰে৷
কৰ্মকৰ্তাসকলৰ মতে এই নীতিৰ লক্ষ্য বৈদ্যুতিক যানবাহনৰ প্রাথমিক খৰচ কমোৱা আৰু প্ৰাথমিক পৰ্যায়ত মানুহক সেয়া গ্ৰহণ কৰিবলৈ উৎসাহিত কৰা৷ পৰিস্থিতিত অগ্ৰগতিৰ লগে লগে চৰকাৰে ধীৰে ধীৰে পেট্ৰল ডিজেলৰ ব্যৱহাৰ কমোৱাৰ পৰিকল্পনা কৰিছে৷
বৈদ্যুতিক দুই চকাৰ বাহন জনপ্ৰিয় কৰাৰ বাবে পৰ্যায়ক্ৰমে কেইবাটাও প্ৰস্তাৱ দিয়া হৈছে৷ প্ৰথম বছৰত প্ৰতি কিলোৱাটত ঘণ্টাত ১০,০০০ টকা পৰ্যন্ত সহায়তা প্ৰদান কৰিব পাৰে৷ যাৰ সৰ্বোচ্চ সীমা ৩০,০০০ টকা৷ দ্বিতীয় বছৰত এয়া প্ৰতি কিলোৱাটত ঘণ্টাত ৬৬০০ টকা আৰু তৃতীয় বছৰত প্ৰতি কিলোৱাটত ঘণ্টাত ৩৩০০ টকালৈ নামি আহিব পাৰে৷
চৰকাৰে বৈদ্যুতিক বাহনৰ বাবে কৰ ৰেহাইৰো প্ৰস্তাৱ দিছে৷ ২০৩০ চনৰ মাৰ্চ পৰ্যন্ত ৩০লাখ টকা পৰ্যন্ত দামৰ বৈদ্যুতিক বাহনে ৰোড টেক্স আৰু ৰেজিষ্টাৰ ফিৰ পৰা অব্যাহতি পাব৷ বৰ্তমান পেট্ৰল আৰু ডিজেল বাহনৰ দামৰ ৪শতাংশৰ পৰা ১৩শতাংশ পৰ্যন্ত ৰোড টেক্স ধাৰ্য কৰা হৈছে৷
নতুন নীতিত বৈদ্যুতিক যানবাহনৰ বাবে দ্ৰুত সম্প্ৰসাৰিত চাৰ্জিং অৱকাঠামোৰ ওপৰতো জোৰ দিয়া হৈছে৷ ইয়াৰ মাজত আছে পাব্লিক চাৰ্জিং ষ্টেচনৰ সংখ্যা বৃদ্ধি, ব্যক্তিগত চাৰ্জিং সুবিধাসমূহক উৎসাহিত কৰা আৰু চাৰ্জিং ষ্টেচন স্থাপনত নিৰ্মাতাসকলক উৎসাহিত কৰাৰ পৰিকল্পনা৷
এক সামাজিক উদ্যোগ হিচাপে এই নীতিত ট্ৰান্সজেণ্ডাৰ সম্প্ৰদায়ৰ বাবে ৫০০ টা বৈদ্যুতিক তিনি চকীয়া বাহন আৰু ৰেইনবো ফ্লিট তৈয়াৰৰো প্ৰস্তাৱ দিছে৷ যদিও খচৰা নীতিত বৈদ্যুতিক যানবাহন গ্ৰহণৰ বাবে কোনো লক্ষ্যমাত্ৰা নিৰ্ধাৰণ কৰা হোৱা নাই তথাপিও চৰকাৰে কৈছে যে তেওঁলোকৰ লক্ষ্য হৈছে এনে এক পৰিবেশ তৈয়াৰ কৰা য’ত আগন্তুক বছৰসমূহত বিপুল সংখ্যক মানুহে স্বেচ্ছাই বৈদ্যুতিক যানবাহনৰ দিশে আকৰ্ষিত হোৱা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
