অসম লাইভ২৪ঃ মেলবৰ্ণত পাকিস্তানৰ বিৰুদ্ধে হোৱা হাইভল্টেজ খেলত জয়লাভ কৰিলে ভাৰতে। টি-২০ বিশ্বকাপৰ প্ৰথমখন খেলতেই বিৰাট বাহিনীয়ে দেখুৱালে পাৰদৰ্শিতা। বিৰাটে ফৰ্ম ঘূৰাই পোৱা বুলি সমগ্ৰতে চৰ্চা চলাৰ সময়তে, খেলৰ শেষত চকুলো মোহাৰিছে বিৰাট কোহলীয়ে।
বিগত টি-২০ বিশ্বকাপত পাকিস্তানৰ হাতত ধৰাশায়ী হৈছিল বিৰাট বাহিনী। ২০২১ বৰ্ষত অনুষ্ঠিত খেলতো ভাৰতীয় দলটোৰ অধিনায়কৰ দায়িত্বত আছিল বিৰাট কোহলী। এইবাৰ অধিনায়কৰ দায়িত্বভাৰ গ্ৰহণ কৰিছে ৰোহিত শৰ্মাই। ৰোহিতৰ অধিনায়কত্বতেই যেন পূৰ্বৰ ফৰ্ম ঘূৰাই পালে বিৰাটে। ১৯ অভাৰত হেৰিছ ৰউফৰ শেষৰ দুটা বলত বিৰাটে মৰা দুটা ছিক্সেই সলাই দিলে খেল।
বিৰাটে খেলৰ অন্তত দিয়া মন্তব্যত খেল সন্দৰ্ভত কয়, ‘২০১৬ চনৰ টি-২০ বিশ্বকাপত মহালিত অষ্ট্ৰেলিয়াৰ বিৰুদ্ধে অনুষ্ঠিত খেলত মই ৫২ টা বলত ৮২ ৰাণ কৰিছিলো, সেয়া মোৰ বাবে সৰ্বশ্ৰেষ্ঠ খেল। আজিও মই ৫৩ টা বলত ৮২ ৰাণ কৰিছো। সেইখন যেনেকৈ শ্বাসৰূদ্ধকৰ খেল আছিল আজিৰখনো মোৰ বাবে অতিকৈ স্পেচিয়েল।’
ইপিনে খেলৰ অন্তত, ‘মেন অৱ দ্য মেচ’ বঁটা গ্ৰহণ কৰিবলৈ অহাৰ সময়ত বিৰাটে আৱেগিক হৈ কয়, ‘মই ভাষা হেৰুৱাইছো। কি কওঁ ভাৱি পোৱা নাই।’ আনহাতে মেলবৰ্ণত ভাৰতীয় দলটোৰ অনুৰাগীসকলে বিৰাটক উদ্দেশ্যি চিঞৰী থকাৰ প্ৰত্যুত্তৰত বিৰাটে কয়,’মোৰ সঁচাকৈয়ে ক’বলৈ একো নাই। মই নাজানো কি হৈ আছে। হাৰ্ডিকে মোক বাৰে বাৰে কৈ আছিল যে আমি কৰিব পাৰিম, আমি জিকিম। মই একো ক’ব পৰা নাছিলো। এয়া সঁচাকৈয়ে অস্বাভাৱিক পৰিস্থিতি। মই মাথো এটাই ভাবিছিলো, পাকিস্তানৰ খেলুৱৈ চাপত থাকিব। শেষ অভাৰত সেয়ে ১৬ ৰাণৰ লক্ষ্য মনতে বান্ধিছিলো। মই নিজকে পাৰ্যমানে শান্ত ৰাখিবলৈ চেষ্টা কৰি আছিলো। মই বহু মাহ ধৰি ৰাণ ল’ব পৰা নাছিলো যদিও সমৰ্থকে মোক লৈ কৰা আশাৰ বাবে তেওঁলোকক অশেষ ধন্যবাদ।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
