শুকুৰবাৰে থাইলেণ্ডৰ এখন বিদ্যালয়ত নৱম শ্ৰেণীৰ এজন ছাত্ৰই গুলীচালনা কৰি তিনিজন শিক্ষক আৰু তিনিজন ছাত্ৰকে ধৰি ৬ জন লোকৰ প্ৰাণ কাঢ়ি লয়। এই ঘটনাত ১৫ জন আহত হয়। ইয়াৰ পিছতে ১৪ বছৰীয়া ছাত্ৰজনে নিজকে শেষ কৰি দিয়ে।
আৰক্ষীৰ মতে, ৰাজধানী বেংককৰ সমীপৰ দেবছিৰিন ননথাবুৰী স্কুলত সংঘটিত হৈছে এই ঘটনা। স্কুলত উপস্থিত হোৱাৰ পূৰ্বে ছাত্ৰজনে ঘৰতে ককা-আইতাকক হত্যা কৰে। পিছত তেওঁলোকৰো মৃতদেহ উদ্ধাৰ কৰা হয়।
গুলীচালনাত ব্যৱহৃত ৯ এম এম পিষ্টলটো ছাত্ৰজনৰ ককাকৰ, তেওঁ পেছাত এজন শিক্ষক। সম্প্ৰতি আৰক্ষীয়ে এই আক্ৰমণৰ আঁৰৰ উদ্দেশ্যৰ তদন্ত অব্যাহত ৰাখিছে।
আৰক্ষীয়ে জনোৱা মতে আক্ৰমণৰ ৩টা সম্ভাৱ্য কাৰণ হৈছেঃ
অধ্যয়ন আৰু পৰীক্ষাৰ মানসিক চাপঃ প্ৰধানমন্ত্ৰীয়ে উল্লেখ কৰে যে আক্ৰমণ কৰা ছাত্ৰজন পঢ়াৰ বাবে যথেষ্ট মানসিক চাপত আছিল। তেওঁৰ ঘনিষ্ঠ বন্ধুসকলেও আৰক্ষীক জনাইছে যে তেওঁ কিছুদিন ধৰি অনবৰতে পঢ়া-শুনাৰ চাপৰ কথা কৈ আহিছে।
ঘৰুৱা কঠোৰ পৰিৱেশঃ ছাত্ৰজনে ককা-আইতাকৰ লগত বাস কৰিছিল। তেওঁৰ আইতাক এগৰাকী শিক্ষয়িত্ৰী আছিল, আৰু আৰক্ষীৰ মতে, তেওঁ ছাত্ৰীগৰাকীৰ লগত শৈক্ষিক দিশৰ ক্ষেত্ৰত অতি কঠোৰ আছিল। বিশ্বাস কৰা হয় যে এই হেঁচাত তেওঁ ঘৰতে ককা-আইতাকক গুলীয়াই শেষ কৰিছিল।
ভিডিঅ’ গেমৰ কাম: উপ-গৃহমন্ত্ৰী পোলাপি সুৱানচাৱীয়ে কয় যে আৰক্ষীৰ তদন্তত প্ৰকাশ পাইছে যে ছাত্ৰজনে ভিডিঅ’ গেম খেলি ভাল পাইছিল। গেমৰ কোনো টাস্ক পূৰণৰ বাবে এনে ঘটনা কৰাৰো সম্ভাৱনা থাকিব পাৰে। এতিয়া ইয়াৰ তদন্ত চলি আছে।
আৰক্ষীয়ে জনোৱা মতে, ছাত্ৰজনে প্ৰথমে নিজৰ শ্ৰেণীকোঠাৰ ভিতৰত গুলীচালনা কৰাৰ পিছত বাহিৰলৈ ওলাই যায়। ২০টাতকৈও অধিক গুলীচালনা কৰে। আত্মহননৰ পিছত তেওঁৰ হাতত পৰা ত্ৰিশটা লাইভ ৰাউণ্ড উদ্ধাৰ কৰা হয়।
প্ৰত্যক্ষদৰ্শীয়ে জনোৱা মতে, ব ন্দুকৰ গুলীৰ শব্দ হোৱাৰ লগে লগে ছাত্ৰ-ছাত্ৰীসকলে নিজৰ জীৱন ৰক্ষাৰ বাবে শ্ৰেণীকোঠাত আত্মগোপন কৰে। অলপ পিছতে আৰক্ষীয়ে দুৱাৰত টুকুৰিয়াই তেওঁলোকক নিৰাপদে উলিয়াই আনে। এই ঘটনাই বিদ্যালয়খনৰ ভিতৰত বিশৃংখলতাৰ সৃষ্টি কৰে, বাহিৰৰ মানুহে ইজনে সিজনক সহায় কৰিবলৈ চেষ্টা কৰা দেখা যায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
