আজি নতুন অসমীয়া ছবি ‘চুপা চুপি’ৰ ট্ৰেইলাৰ মুক্তি দিয়া হয়। মেট্ৰিক্স ছবিগৃহত মুকলি কৰা হয় ছবিখনৰ ট্ৰেইলাৰটো। মুক্তিৰ পিছতে দৰ্শকৰ যথেষ্ঠ সমাদৰ লাভ কৰিছে ‘চুপা চুপি’ৰ ট্ৰেইলাৰে। এতিয়া ক্ৰমাৎ ছবিখন চাবলৈ উৎসাহ বৃদ্ধি পাইছে ৰাইজৰ। ১২ জুনত ছবি গৃহত সকলোৱে চাবলৈ পাব বহু প্ৰত্যাশিত ছবিখন।
আজি ট্ৰেইলাৰ মুকলি অনুষ্ঠানত গৰিমা গাৰ্গ উপস্থিত থাকে। জুবিন গাৰ্গক সুঁৱৰি আৱেগিক হৈ পৰে গৰিমা গাৰ্গ। গৰিমাই কয়, “চুপা চুপি এখন ভাল ছবি হ’ব,সেয়ে মই আজি আহিছোঁ। জুবিনে সদায় অসমীয়া ছবিৰ উত্তৰণৰ বাবে কাম কৰিছিল, জীয়াই থাকিলে আজি যথেষ্ঠ আনন্দ পালেহেতেন। অসমীয়া ছবিৰ বাবেই জুবিন গাৰ্গ মুম্বাই এৰি অসমলৈ উভতি আহিছিল। তেতিয়া তেওঁৰ কেৰিয়াৰ মুম্বাইত শিখৰত আছিল, তথাপিও ঘূৰি আহিছিল ছবিৰ বাবে। ”
ইয়াৰোপৰি ট্ৰেইলাৰ মুকলি অনুষ্ঠানত উপস্থিত থাকে অসম লাইভৰ অধ্যক্ষ নৃপেন দাস, পৰিচালক ৰাজেশ ভূঞা, কণ্ঠশিল্পী ৰূপম ভূঞাকে আদ কৰি ছবিখনৰ লগত জড়িত সকলো কলা-কুশলী। পূৰ্বে ৱেব ছিৰিজ হিচাপে জনপ্ৰিয়তা লাভ কৰাৰ পিছত ছবিখন সম্পূৰ্ণ নতুন ৰূপত ৰূপালী পৰ্দালৈ আহিবলৈ সাজু হৈছে।
https://youtu.be/tqJW9rZdV7c?si=_3hlkwLc8_8jnGIh
এটলাছ ক্ৰিয়েশ্যন আৰু ডি জে এন্টাৰটেইনমেন্টৰ বেনাৰত নিৰ্মিত ছবিখনৰ পৰিচালনা প্ৰণৱ ভৰালীয়ে কৰিছে। আনফালে ছবিখনৰ প্ৰযোজনা কৰিছে নৃপেন দাস আৰু হৃষিকেশ পাটগিৰিয়ে। সংগীত পৰিচালনা কৰিছে জুবিন গাৰ্গ আৰু পৰাণ বৰকটকীয়ে।
এই ছবিখনত অভিনয় কৰিছে কমল লোচন, ৰাগিনী কৌশিক, কৌশিক ভৰদ্বাজ, হিমাংশু প্ৰসাদ দাস, স্নিগ্ধা গগৈ, বৈভৱী গোস্বামী, জিণ্টু কুমাৰ কাশ্যপ আদি বহুকেইগৰাকী শিল্পীয়ে । কাল্পনিক আৰু বাস্তৱৰ সংমিশ্ৰণৰ আধাৰত নিৰ্মিত এটি সুন্দৰ কাহিনী দেখিব দৰ্শকে। ৱেব ছিৰিজখনৰ প্ৰতিটো চৰিত্ৰই যিদৰে দৰ্শকৰ মনত সাঁচ বহুৱাবলৈ সক্ষম হৈছিল, ঠিক একেদৰে ছবিখনেও সকলোকে আকৃষ্ট কৰিব বুলি আশা কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
