স্বাধীনতা দিৱসৰ প্ৰাকক্ষণত দিল্লী উচ্চ ন্যায়ালয়লৈ বো*মা বি*স্ফোৰণৰ ভাবুকিৰে অহা ই-মেইলক কেন্দ্ৰ কৰি ৰাজধানী দিল্লীত তীব্ৰ চাঞ্চল্যৰ সৃষ্টি হৈছে। শুকুৰবাৰে উচ্চ ন্যায়ালয়ৰ ৰেজিষ্ট্ৰাৰ জেনেৰেললৈ এটা ভাবুকিপূৰ্ণ ই-মেইল অহাৰ পিছতে নিৰাপত্তা সংস্থাসমূহ সতৰ্ক হৈ পৰে। ঘটনাৰ গুৰুত্ব বিবেচনা কৰি আদালত চৌহদত তৎকালীনভাৱে নিৰাপত্তা অভিযান আৰম্ভ কৰা হয়।
প্ৰকাশিত তথ্য অনুসৰি, দিল্লী হাই ক’ৰ্টৰ ৰেজিষ্ট্ৰাৰ জেনেৰেললৈ অহা ই-মেইলত আদালত চৌহদত বোমা বিস্ফোৰণ কৰাৰ ভাবুকি দিয়া হৈছিল। ই-মেইলটো লাভ কৰাৰ পিছতে বিষয়টো তৎকালীনভাৱে দিল্লী আৰক্ষীক অৱগত কৰা হয়। ইয়াৰ পিছতে আৰক্ষী আৰু নিৰাপত্তা সংস্থাই নিৰ্ধাৰিত সুৰক্ষা প্ৰট’কল অনুসৰি অভিযান আৰম্ভ কৰে।
কিছু প্ৰতিবেদন অনুসৰি, ই-মেইলটোত দিল্লী হাই ক’ৰ্টত স্বাধীনতা দিৱসৰ দিনা বি*স্ফোৰণ হোৱাৰ ভাবুকি দিয়া হৈছে। ইয়াৰ পিছত দিল্লীৰ একাংশ আদালততো বি*স্ফোৰণৰ ভাবুকি দিয়াৰ কথা ই-মেইলটোত উল্লেখ আছিল।
ভাবুকিৰ খবৰ লাভ কৰাৰ পিছতে সম্ভাব্য বিপদৰ আশংকাৰে আদালত চৌহদত ব্যাপক নিৰাপত্তা তালাচী আৰম্ভ কৰা হয়। বো*মা নিষ্ক্ৰিয়কৰণ দল আৰু প্ৰশিক্ষিত স্নিফাৰ ডগেৰে চৌহদৰ বিভিন্ন স্থান পৰীক্ষা কৰা হয়। হাই ক’ৰ্টৰ ভিতৰ-বাহিৰৰ নিৰাপত্তা ব্যৱস্থাও পুনৰীক্ষণ কৰা হয়। দিল্লী হাই ক’ৰ্ট বাৰ এছ’চিয়েচনৰ যুটীয়া সচিব কুণাল মালহোত্ৰাই ভাবুকিটো ভুৱা হোৱাৰ সম্ভাৱনা প্ৰকাশ কৰি কয় যে-সকলো সাৱধানতামূলক ব্যৱস্থা গ্ৰহণ কৰা হৈছে আৰু পৰিস্থিতি নিয়ন্ত্ৰণত আছে।
ইফালে, শুকুৰবাৰে দিল্লী হাই ক’ৰ্টৰ লগতে ইন্দিৰা গান্ধী আন্তঃৰাষ্ট্ৰীয় বিমানবন্দৰৰ টাৰ্মিনেল-৩ আৰু ৰাজধানীৰ কেইবাটাও গুৰুত্বপূৰ্ণ চৰকাৰী স্থানলৈও বোমা বিস্ফোৰণৰ ভাবুকি অহাৰ তথ্য প্ৰকাশ পাইছে। জামনগৰ হাউছ, ঝাণ্ডেৱালান ফ্লেটেড ফেক্টৰী কমপ্লেক্স, ছাকেটৰ জিলা দণ্ডাধীশ কাৰ্যালয় আৰু দিল্লী কেণ্টৰ SDM কাৰ্যালয়ৰ নামো ভাবুকিৰ সৈতে জড়িত বুলি প্ৰতিবেদনত উল্লেখ কৰা হৈছে। ইয়াৰ ফলত ৰাজধানীৰ নিৰাপত্তা ব্যৱস্থা আৰু অধিক কটকটীয়া কৰা হৈছে। স্বাধীনতা দিৱস উপলক্ষে ইতিমধ্যে দিল্লীত ব্যাপক নিৰাপত্তা ব্যৱস্থা গ্ৰহণ কৰা হৈছিল। তাৰ মাজতে একাধিক স্থানলৈ অহা এনে ভাবুকিয়ে নিৰাপত্তা সংস্থাসমূহৰ উদ্বেগ বৃদ্ধি কৰিছে।
নিৰাপত্তা সংস্থাসমূহে সংশ্লিষ্ট স্থানসমূহত ব্যাপক তালাচী চলোৱাৰ পাছতো এতিয়ালৈকে কোনো সন্দেহজনক বস্তু বা বি*স্ফোৰক সামগ্ৰী উদ্ধাৰ হোৱা নাই। অৱশ্যে আৰক্ষী আৰু নিৰাপত্তা সংস্থাই বিষয়টো গুৰুত্বসহকাৰে লৈ তদন্ত অব্যাহত ৰাখিছে। স্বাধীনতা দিৱসৰ পূৰ্বে ৰাজধানীৰ অতি স্পৰ্শকাতৰ স্থানসমূহলৈ অহা এই ভাবুকিৰ আঁৰত কোন আছে, ই-মেইলটো ক’ৰ পৰা প্ৰেৰণ কৰা হৈছিল আৰু উদ্দেশ্য কি আছিল—এই সকলো দিশ তদন্তকাৰী সংস্থাই পৰীক্ষা কৰি আছে। বৰ্তমানলৈ কোনো নিৰ্দিষ্ট ব্যক্তি বা সংগঠনক এই ঘটনাৰ বাবে দায়ী কৰা হোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
