ডিটেনচন চেণ্টাৰত আটক হৈ থকা এগৰাকী বাংলাদেশী মহিলাক তিনিজন আৰক্ষী কৰ্মীয়ে ধ*ৰ্ষণ কৰাৰ গুৰুতৰ অভিযোগ উত্থাপন হৈছে। ঝাৰখণ্ডৰ হাজাৰীবাগ ডিটেনচন চেণ্টাৰত এই ঘটনা সংঘটিতৰ অভিযোগ উত্থাপিত হৈছে। ঘটনাক সন্দৰ্ভত ঝাৰখণ্ড উচ্চ ন্যায়ালয়ে চৰকাৰৰ পৰা উত্তৰ বিচাৰিছে। ইতিমধ্যে অভিযুক্ত তিনি কনিষ্টবলৰ বিৰুদ্ধে এজাহাৰ দাখিল কৰাৰ লগতে তেওঁলোকক নিলম্বন কৰা হৈছে।
উচ্চ ন্যায়ালয়ৰ ন্যায়াধীশ এছ এন প্ৰসাদ আৰু ন্যায়াধীশ অখিল কুমাৰৰ বিচাৰপীঠত সোমবাৰে এই গোচৰৰ শুনানি অনুষ্ঠিত হয়। শুনানিৰ সময়ত ৰাজ্য চৰকাৰৰ ফালৰ পৰা আদালতক জনোৱা হয় যে মহিলাগৰাকীৰ সৈতে সংঘটিত ধ*ৰ্ষণৰ অভিযোগৰ ভিত্তিত তিনিজন কনিষ্টবলৰ বিৰুদ্ধে গোচৰ ৰুজু কৰি তেওঁলোকক নিলম্বন কৰা হৈছে। আনহাতে, ঝাৰখণ্ড ৰাজ্যিক আইনী সেৱা প্ৰাধিকৰণে (DLSA) আদালতত দাখিল কৰা প্ৰতিবেদনতো তিনিজন আৰক্ষী কৰ্মীৰ বিৰুদ্ধে মহিলাগৰাকীক ধ*ৰ্ষণৰ অভিযোগৰ উল্লেখ আছে।
আদালতে ডিটেনচন চেণ্টাৰত থকা সময়ছোৱাত মহিলাগৰাকীক প্ৰয়োজনীয় সকলো সুবিধা প্ৰদান কৰিবলৈ চৰকাৰক নিৰ্দেশ দিয়ে। গোচৰটোৰ পৰৱৰ্তী শুনানি ১৫ অক্টোবৰত অনুষ্ঠিত হ’ব। লগতে ৰাজ্য চৰকাৰে দাখিল কৰা উত্তৰৰ ওপৰত আবেদনকাৰীক প্ৰতি-উত্তৰ দাখিল কৰিবলৈ আদালতে নিৰ্দেশ দিয়ে।
শুনানিৰ সময়ত ৰাজ্য চৰকাৰে আদালতক জনায় যে মহিলাগৰাকীক বাংলাদেশলৈ ঘূৰাই পঠিওৱাৰ বাবে ২০২৩ চনৰ পৰাই কেন্দ্ৰীয় বৈদেশিক পৰিক্ৰমা মন্ত্ৰালয়লৈ চিঠি প্ৰেৰণ কৰি অহা হৈছে। কিন্তু এতিয়ালৈকে কেন্দ্ৰীয় চৰকাৰৰ পৰা কোনো উত্তৰ লাভ কৰা হোৱা নাই।
এই বিষয়ত কেন্দ্ৰীয় চৰকাৰৰ অধিবক্তাকো আদালতে উত্তৰ দাখিল কৰিবলৈ নিৰ্দেশ দিয়ে।
ইফালে, অভিযুক্ত ৩ আৰক্ষী কনিষ্টবলৰ বিৰুদ্ধে ৰুজু কৰা এজাহাৰত কোনবোৰ ধাৰা প্ৰয়োগ কৰা হৈছে, সেই বিষয়তো আদালতে প্ৰশ্ন উত্থাপন কৰে। ইয়াৰ উত্তৰত মহাধিবক্তা ৰোহিত্য ৰায়ে আদালতক আশ্বাস দিয়ে যে প্ৰয়োজন অনুসৰি এজাহাৰত উপযুক্ত সংশোধন কৰা হ’ব।
মহিলাগৰাকীক দীৰ্ঘদিন ধৰি আটক কৰি ৰখাক লৈও আদালতে চৰকাৰক প্ৰশ্ন কৰে। আদালতে মৌখিকভাৱে জানিব বিচাৰে যে যদি ২০২১ চনত বিদেশী আইন উলংঘনৰ গোচৰত মহিলাগৰাকীক তিনিবছৰৰ কাৰাদণ্ড দিয়া হৈছিল, তেন্তে শাস্তিৰ ম্যাদ সম্পূৰ্ণ হোৱাৰ পিছতো তেওঁক বাংলাদেশলৈ কিয় ঘূৰাই পঠিওৱা নহ’ল? তেওঁক ডিটেনচন চেণ্টাৰত ৰখাৰ প্ৰয়োজন কিয় হ’ল? আদালতে এইটোও প্ৰশ্ন কৰে যে ২০২৫ চনত মহিলাগৰাকীৰ বিৰুদ্ধে পুনৰ বিদেশী আইন অনুসৰি গোচৰ ৰুজু কৰা হৈছিল। কিন্তু ২০২৬ চনত সেই গোচৰতে তেওঁক আদালতে খালাছ কৰে। তেন্তে সেই ৰায়ৰ বিৰুদ্ধে চৰকাৰে কিয় আপীল নকৰিলে?
শুনানিৰ সময়ত উপস্থিত থকা গৃহ সচিবে আদালতক জনায় যে মহিলাগৰাকীক বাংলাদেশলৈ পঠিওৱাৰ বাবে চৰকাৰৰ ফালৰ পৰা বাংলাদেশ চৰকাৰৰ সৈতে যোগাযোগ কৰা হৈছিল। কিন্তু বাংলাদেশৰ ফালৰ পৰা কোনো সঁহাৰি পোৱা নগ’ল। ৰাজ্য চৰকাৰৰ তথ্য অনুসৰি, মহিলাগৰাকীৰ বিৰুদ্ধে ২০১৮ চনত দুটা গোচৰ ৰুজু হৈছিল। ইয়াৰে এটা আছিল এটি শিশুক অপহৰণৰ গোচৰ আৰু আনটো বিদেশী আইন সম্পৰ্কীয় গোচৰ। শিশু অপহৰণৰ গোচৰত মহিলাগৰাকীক দুবছৰৰ কাৰাদণ্ড দিয়া হৈছিল। আনহাতে, ২০২১ চনত বিদেশী আইন সম্পৰ্কীয় গোচৰত তেওঁক তিনি বছৰৰ কাৰাদণ্ড দিয়া হয়। কাৰাদণ্ডৰ ম্যাদ সম্পূৰ্ণ হোৱাৰ পিছত মহিলাগৰাকীক হাজাৰীবাগ ডিটেনচন চেণ্টাৰলৈ স্থানান্তৰ কৰা হয়। ২০২৫ চনৰ শেষৰ ফালে তেওঁ ডিটেনচন চেণ্টাৰৰ পৰা পলাই যায়। ইয়াৰ পিছত তেওঁৰ বিৰুদ্ধে বিদেশী আইন অনুসৰি পুনৰ এটা গোচৰ ৰুজু কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
