পাঁচ বছৰৰ পাছত ভাৰতত আকৌ খুলিব পাৰিব টিকটক? ছচিয়েল মিডিয়াত এই জল্পনা আৰম্ভ হৈছে৷ শুকুৰবাৰে ছচিয়েল মিডিয়াত চলিছে এই চৰ্চা৷ নেটিজেনসকলৰ কোনো কোনোৱে লিখিছে, ‘ৱেবচাইট খুলিছে৷’ কোনোৱে আকৌ কৈছে, ‘ভিডিঅ’ চাব পৰা নাই৷ কিন্তু ছাইট এক্সেছ কৰিব পৰা গৈছে৷’ এই খবৰ ছচিয়েল মিডিয়াত ভাইৰেল হোৱাৰ পাছতেই কেন্দ্ৰই স্পষ্টকৈ জনাইছে যে চীনা শ্বৰ্ট ভিডিঅ মেকিং প্লেটফৰ্ম টিকটক আৰু অনলাইন শ্বপিং চাইট AliExpress আৰু Shein–ৰ ওপৰত থকা নিষেধাজ্ঞা এতিয়াও উঠাই লোৱা হোৱা নাই৷
২০২০ চনত দক্ষিণ এছিয়াৰ দুখৰ দেশৰ মাজত দ্বিপাক্ষিক সম্পৰ্কত ফাঁট মেলাৰ পৰাই চীনৰ ছচিয়েল মিডিয়া প্লেটফৰ্ম টিকটক ভাৰতত নিষিদ্ধ হৈ আছে৷ শুকুৰবাৰে তুমুল চৰ্চা হৈছে যে ৫ বছৰৰ পাছত নিষেধাজ্ঞা উঠাই ভাৰতত আকৌ আৰম্ভ হৈছে টিকটক৷ আনকি ছচিয়েল মিডিয়াত বহু গ্ৰাহকেই নিজৰ স্মাৰ্টফোনত টিকটক ব্যৱহাৰ কৰিব পৰা বুলিও লিখিছে৷ অৱশ্যে একাংশই স্পষ্টকৈ কৈছে যে হোমপেজৰ বাদে অন্য ফিচাৰ খুলিব পৰা নাই৷ আকৌ AliExpress আৰু Shein চাইট দুটাৰ ক্ষেত্ৰতো হোম পেজ দেখা গলেও শ্বপিং কৰিব পৰা হোৱা নাই৷ জল্পনাৰ ইতি পেলাই নৰেন্দ্ৰ মোদী চৰকাৰৰ পৰা আজি স্পষ্টকৈ জনাই দিয়া হৈছে যে ভাৰতত টিকটক আনব্লক কৰাৰ নিৰ্দেশনা এতিয়াও দিয়া হোৱা নাই৷ এই ধৰণৰ খবৰ সম্পূৰ্ণ ভুৱা আৰু বিভ্ৰান্তিকৰ৷’
উল্লেখ্য যে চলিত বছৰৰ ফেব্ৰুৱাৰী মাহত ২০২০ চনত নিষিদ্ধ হোৱা একাধিক চীনা এপ আকৌ ভাৰতত খুলি দিয়া হৈছিল৷ ভাৰত আৰু চীনৰ কূটনৈতিক সম্পৰ্কৰ উন্নতি হোৱাৰ লগে লগেই প্লে ষ্টোৰত পোৱা গৈছিল Xender, TanTan সহ একাধিক চীনা এপ৷ এইসমূহৰ মাজত অৱশ্যে ভাৰতত খুবেই জনপ্ৰিয় আছিল টিকটক৷ ফলত শেহতীয়াকৈ ভাইৰেল হোৱা ভুৱা খবৰতেই আনন্দিত হৈ পৰিছিল বহু ইউজাৰকাৰী৷
এক সৰ্বভাৰতীয় সংবাদমাধ্যমৰ প্ৰতিবেদনত কোৱা হৈছে যে ২০০ ৰো বেছি নিষিদ্ধ মোবাইল এপ অৰিজিনিয়েলৰ সলনি ক্লোনড ভাৰ্ছন অৰ্থাৎ নকল এপ এতিয়া উপলব্ধ হৈছে প্লে ষ্টোৰত৷ এপল এপতো কমপক্ষেও এনে ৩৬ টা নিষিদ্ধ চীনা এপৰ নকল ভাৰ্ছন উপলব্ধ হৈছে৷
২০২০ চনৰ ২৯ জুনত নৰেন্দ্ৰ মোদী চৰকাৰে হঠাৎ টিকটক সহ প্ৰায় ৫৮ টা চীনা এপ ভাৰতত নিষিদ্ধ কৰিছিল৷ তথ্য চুলিল দৰে গুৰুতৰ কাৰণ আগত ৰাখিয়েই এই নিষেধাজ্ঞা জাৰি কৰিছিল মোদী চৰকাৰে৷ ByteDance সংস্থাই তৈয়াৰ কৰা টিকটক এপৰ বিৰুদ্ধে তথ্য চুৰি আৰু প্ৰতাৰণাৰো অভিযোগ উঠিছিল৷ নিয়ন্ত্ৰণৰেখা গালৱানত চীন আৰু ভাৰতীয় সৈন্যৰ মাজত হোৱা সংঘৰ্ষৰ প্ৰায় দুসপ্তাহৰ পাছত নিষিদ্ধ কৰা হৈছিল টিকটক এপ৷ সেই বছৰৰে জুন মাহৰ ১৫ তাৰিখে গালৱানত হৈছিল ৰক্তক্ষয়ী সংঘৰ্ষ৷ তাত অন্তত ২০গৰাকী ভাৰতীয় সেনা শ্বহীদো হৈছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
