তামিলনাডু প্ৰিমিয়াৰ লীগত ক্ৰিকেট অনুৰাগীয়ে কেতিয়াও নেদেখা এখন অনন্য মেচ উপভোগ কৰিবলৈ সক্ষম হৈছে। আজি অৰ্থাৎ ২৬ আগষ্টত অনুষ্ঠিত দ্বিতীয়খন কোৱালিফায়াৰ মেচত কোভাই কিংছে ট্ৰিচি গ্ৰেণ্ড চোলাছক ৮৪ ৰানত পৰাস্ত কৰি ফাইনেলত স্থান নিশ্চিত কৰে। এই মেচত কোভাই কিংছৰ বলাৰ দীবান লিংগেশৰ বিধ্বংসী বলিঙে সকলোৰে দৃষ্টি আকৰ্ষণ কৰে। মেচখনত প্ৰথমে বেটিং কৰি কোভাই কিংছে ২০ অভাৰত ৫টা উইকেট হেৰুৱাই ১৮৩ ৰান সংগ্ৰহ কৰে। দলটোৰ অ’পেনাৰ ৰাধাকৃষ্ণন আৰু সুৰেশ লোকেশ্বৰে ভাল আৰম্ভণি দি শতকীয় পাৰ্টনাৰশ্বিপ গঢ়ে। ইয়াৰ পিছত ১৮৪ ৰানৰ লক্ষ্য লৈ খেলপথাৰত নামে ট্ৰিচি গ্ৰেণ্ড চোলাছ। কিন্তু আৰম্ভণিতেই দলটোৰ বেটিং লাইনআপ সম্পূৰ্ণৰূপে ভাঙি পৰে। কোভাই কিংছৰ সোঁহতীয়া বেগী বলাৰ দীবান লিংগেশে ইনিংছৰ প্ৰথম অভাৰৰ প্ৰথম তিনিটা বলতে তিনিটা উইকেট দখল কৰি হেট্ৰিক সম্পূৰ্ণ কৰে।
লিংগেশে প্ৰথমে ৰাজকুমাৰ, তাৰ পিছত শ্যাম সুন্দৰ আৰু তৃতীয় বলত জগন্নাথন কৌশিকক আউট কৰে। ইয়াৰ লগে লগে TNPLৰ এই ছিজনৰ প্ৰথমটো হেট্ৰিক সম্পূৰ্ণ হয়। লিংগেশৰ এই বিধ্বংসী বলিঙৰ ফলত ট্ৰিচি দলটোৱে আৰম্ভণিতেই ডাঙৰ বিপদত পৰে। লিংগেশৰ পিছত স্পিনাৰ মণিমান সিদ্ধাৰ্থেও দলটোৰ ওপৰত চাপ বৃদ্ধি কৰে। চতুৰ্থ অভাৰত তেওঁ একেৰাহে দুটা উইকেট দখল কৰে। ফলত ট্ৰিচি গ্ৰেণ্ড চোলাছে ৬ ৰানতে ৫টাকৈ উইকেট পেভেলিয়নমুখী হয়।
অৱশ্যে অধিনায়ক সুৰেশ কুমাৰে কিছু সময়ৰ বাবে দলটোক বিপদৰ পৰা উদ্ধাৰ কৰিবলৈ চেষ্টা কৰে। তেওঁ আক্ৰমণাত্মক বেটিং কৰি মাত্ৰ ২৭টা বলত ৪৮ ৰান সংগ্ৰহ কৰে। কিন্তু আন বেটাৰসকলে তেওঁক বিশেষ সহায় কৰিব নোৱাৰিলে। শেষত ট্ৰিচি গ্ৰেণ্ড চোলাছৰ সমগ্ৰ দলটো ১৫.৪ অভাৰত মাত্ৰ ৯৯ ৰানতে অলআউট হয়। ফলত কোভাই কিংছে ৮৪ ৰানৰ বৃহৎ জয় লাভ কৰি ফাইনেলত প্ৰৱেশ কৰে। এই মেচখনত দীবান লিংগেশৰ প্ৰথম অভাৰৰ হেট্ৰিকেই আছিল আটাইতকৈ উল্লেখযোগ্য ঘটনা। তেওঁৰ বিধ্বংসী আৰম্ভণিৰ বাবেই কোভাই কিংছে মেচখনত সহজে জয়লাভ কৰি TNPLৰ দশম ছিজনৰ ফাইনেলৰ টিকট নিশ্চিত কৰিবলৈ সক্ষম হয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
