১ জুলাইৰ পৰা দেশত তিনিখন ফৌজদাৰী আইন কাৰ্যকৰী হৈছে৷ ভাৰতৰ ফৌজদাৰি বিচাৰ ব্যৱস্থাৰ ফলত উল্লেখযোগ্য পৰিবৰ্তন আহিব৷ ঔপনিবেশিক যুগৰ পুৰণি ভাৰতীয় দণ্ডবিধি, ফৌজদাৰী কাৰ্যবিধি আৰু ভাৰতীয় সাক্ষ্য আইনৰ সলনি আজিৰ পৰা দেশত কাৰ্যকৰী হ’ল ভাৰতীয় ন্যায় সংহিতা, ভাৰতীয় নাগৰিক সুৰক্ষা সংহিতা আৰু ভাৰতীয় সাক্ষ্য অধিনিয়ম৷ এই নতুন বিধিসমূহৰ ১০ টা গুৰুত্বপূৰ্ণ দিশ জানি থওক৷
১) বিচাৰ শেষ হোৱাৰ ৪৫ দিনৰ মাজত ফৌজদাৰি গোচৰৰ ৰায় দিব লাগিব৷ প্ৰথম শুনানিৰ ৬০ দিনৰ ভিতৰত চাৰ্জ গঠন কৰিব লাগিব৷ সাক্ষীসকলৰ সুৰক্ষা আৰু সহযোগীতা নিশ্চিত কৰি সমস্ত ৰাজ্য চৰকাৰে সাক্ষী সুৰক্ষা প্ৰকল্প বাস্তৱায়ন কৰিব লাগিব৷
২) ধৰ্ষণৰ চিকাৰ হোৱা নাৰীৰ জৱানবন্দী ল’ব লাগিব এগৰাকী লেডী আৰক্ষীয়ে৷ নিৰ্যাতিতাৰ অভিভাৱক বা আত্মীয়সকলৰ উপস্থিতিত সেই জৱানবন্দি ল’ব লাগিব৷ নিৰ্যাতিতাৰ মেডিকেল ৰিপৰ্ট ৭ দিনৰ ভিতৰত জমা দিব লাগিব৷
৩) নাৰী আৰু শিশু নিৰ্যাতনৰ বিষয়ে আইনৰ নতুন অধ্যায়ত কোৱা হৈছে যে, সন্তান কিনা বা বিক্ৰি কৰাৰ দৰে জঘন্য অপৰাধ সংঘটিত কৰিলে ইয়াৰ বিৰুদ্ধে কঠোৰ শাস্তিৰ বিধান আছে নতুন দণ্ডবিধিত৷ নাৱালিকাক গণধৰ্ষণ কৰিলে মৃত্যুদণ্ড বা আজীৱন কাৰাদণ্ড হ’ব শাস্তি৷
৪) বিয়াৰ মিছা প্ৰতিশ্ৰুতি দি বিভ্ৰান্ত কৰি নাৰীক প্ৰতাৰণা কৰিলে আইনত শাস্তিৰ বিধান ৰখা হৈছে৷
৫) দৈহিক কামনাৰ বলি মহিলাই গোচৰ তৰিলে ৯০ দিনৰ ভিতৰত গোচৰৰ নিয়মিত আপডেট ভূক্তভোগীয়ে পাব লাগিব৷ নাৰী আৰু শিশু নিৰ্যাতনৰ চিকাৰ হ’লে সকলো হাস্পতালত তেওঁলোকে বিনামূলীয়া চিকিৎসা পাব লাগিব৷
৬) অভিযুক্ত আৰু অভিযোগকাৰী উভয়েই ১৪ দিনৰ ভিতৰত এজাহাৰৰ কপি, পুলিছ ৰিপৰ্ট, চাৰ্জছিট, জৱানবন্দী স্বীকাৰোক্তিমূলক জৱানবন্দী আৰু অন্যান্য নথি নিজৰ হাতত লাভ কৰিব৷ গোচৰৰ শুনানিত অপ্ৰয়োজনীয় বিলম্বতা এৰাবলৈ আদালতক সৰ্বাধিক দুটা স্থগিতাদেশৰ অনুমতি দিয়া হৈছে৷
৭) বৈদ্যুতিন যোগাযোগৰ মাধ্যমেৰেই অভিযোগ দাখিল কৰিব পাৰিব৷ ইয়াৰবাবে কোনো থানাত গৈ উপস্থিত হোৱাৰ প্ৰয়োজন নাই৷ জিৰো এফ আই আৰৰ প্ৰৱৰ্তনৰ ফলত ব্যক্তিয়ে এক্তিয়াৰ নিৰ্বিশেষ কোনো থানাত এফ আই আৰ দাখিল কৰিব পাৰিব৷
৮) ধৃত ব্যক্তিয়ে তাৎক্ষণিকভাৱে সকলোৰে চকুত পৰাৰো ব্যৱস্থা থাকিব৷ পৰিয়াল আৰু বন্ধুবান্ধৱীসকলো যাতে সহজতে ধৃত ব্যক্তিৰ গ্ৰেপ্তাৰৰ তথ্য লাভ কৰে তাৰ বাবে থানা বা জিলা সদৰত ধৃত ব্যক্তিৰ তথ্য প্ৰদৰ্শিত হৈ থাকিব৷
৯)গুৰুতৰ অপৰাধৰ ক্ষেত্ৰত অপৰাধৰ স্থান পৰিদৰ্শন কৰাটো বাধ্যতামূলক হৈছে ফৰেনছিক বিশেষজ্ঞদলৰ বাবে৷ তাত গৈ ফৰেনচিক বিশেষজ্ঞসকলে নিজেই প্ৰমাণ সংগ্ৰহ কৰি আনিব লাগিব৷
১০) লিংগ নিৰ্বিষেকে সকলোৰে বাবেই আইন সমান৷ তৃতীয় লিংগও হাৰি নাযাব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
