জয়পুৰৰ ৰাজপথত যুৱতীৰ ভাইৰেল দৃশ্য, প্ৰকৃততে ভুল কাৰ?

জয়পুৰৰ মালব্য নগৰ অঞ্চলত অৱস্থিত গৌৰৱ টাৱাৰৰ ওচৰৰ এটা ব্যস্ত ৰাজপথত এগৰাকী যুৱতীয়ে হঠাতে নিজৰ কাপোৰ খুলি ৰাস্তাৰ মাজতে এক অবাঞ্চিত পৰিস্থিতিৰ সৃষ্টি কৰে। এই ঘটনাই স্থানীয় লোকসকলক হতবাক কৰি তোলে। প্ৰায় এঘণ্টা ধৰি যুৱতীগৰাকীয়ে তেনে আচৰণ কৰি থকাৰ পিছত এসময়ত আৰক্ষীয়ে আটক কৰি লৈ যায় আৰু স্বাস্থ্য পৰীক্ষা কৰি মুকলি কৰি দিয়ে। আৰক্ষীৰ ভাষ্য অনুসৰি সোমবাৰে ভাইৰেল হোৱা এই ঘটনা সংঘটিত হৈছিল প্ৰায় এসপ্তাহ আগত। লক্ষণীয়ভাৱে এটা ব্যস্ত ৰাজপথত এঘণ্টাতকৈ অধিক সময় এগৰাকী যুৱতীয়ে উ*লংগ অৱস্থাত অস্বাভাৱিক আচৰণ কৰি থকাৰ পিছতো তাত উপস্থিত লোকসকলে যুৱতীগৰাকীক উদ্ধাৰ কৰাৰ বিপৰীতে কেৱল দূৰৰ পৰা চাইহে থাকিল আৰু কোনোৱে আগবাঢ়ি গৈ যুৱতীগৰাকীক নিয়ন্ত্ৰণ কৰিবলৈ বিশেষ চেষ্টা কৰা দেখা নগ’ল। বিপৰীতে যুৱতীগৰাকীৰ এই আপত্তিজনক মুহূৰ্তটো মোবাইলৰ কেমেৰাত বন্দী কৰি ভাইৰেল কৰিলে ছ’চিয়েল মিডিয়াত

জয়পুৰৰ ৰাজপথত সংঘটিত হোৱা উক্ত ঘটনাক বহুতেই যুৱতীগৰাকীৰ ‘অশ্লীল আচৰণ’ কৰা হিচাপেই দেখিছে। কিন্তু এই ঘটনাটোৰ আন এটা দিশো আমি বিশ্লেষণ কৰাৰ প্ৰয়োজন আছে, যিটো হয়তো আমি হয়টো সাধাৰণতে আলোচনা নকৰোঁ। যুৱতীগৰাকীয়ে কি পৰ্যায়ত বা কি অৱস্থাত তেনে ঘটনা সংঘটিত কৰিলে তাক বিশ্লেষণ কৰাৰ নিত্যান্তই প্ৰয়োজন, কিয়নো কোনো যুৱতীয়েই হওক বা যুৱকেই হওক সুস্থ মানসিক অৱস্থাত তেনে কাণ্ড সংঘটিত কৰাৰ সাহস নকৰে।

ভিডিঅ’ত দেখা পোৱা যুৱতীগৰাকী নিচাগ্ৰস্ত আছিল নেকি নে কোনো মানসিক চাপ, বিভ্ৰান্তি বা স্বাস্থ্যজনিত সমস্যাৰে আক্ৰান্ত হৈছিল সেই দিশটোও পৰীক্ষা কৰাৰ প্ৰয়োজন আছিল। যুৱতীগৰাকীয়ে যি কাণ্ড যিটো পৰিস্থিতিতেই সংঘটিত নকৰক কিয় তাতোকৈ ঘৃণনীয় কাণ্ডটো সংঘটিত কৰিলে উক্ত দৃশ্যটো নিৰ্লজ্জভাৱে চাই থকা উপস্থিত লোকসকলে আৰু তাতোকৈ নিৰ্লজ্জ কাম কৰিলে সেই আপত্তিজনক দৃশ্য মোবাইলত আবদ্ধ কৰা লোকসকলে। এগৰাকী যুৱতীৰ শৰীৰটোক মনোৰঞ্জনৰ দৃষ্টিৰে চোৱা এই যি নীচ মানসিকতাৰ পৰিৱৰ্তন কেতিয়া হ’ব? কেৱল জয়পুৰৰ ঘটনাই নহয়, আমাৰ দেশত দৈনিক সংঘটিত হৈ আছে অনুৰূপ ঘটনা। জয়পুৰৰ ঘটনাটোৱে এগৰাকী যুৱতীৰ মানসিক স্থিতিতকৈও তাত উপস্থিত লোকসকলৰ ৰুগীয়া মানসিক স্থিতিটোকহে বেছিকৈ উদঙাই দিছে। সমান্তৰালভাৱে আমাৰ সমাজৰ ডিজিটেল অসংবেদনশীলতা আৰু মানৱীয় মূল্যবোধৰ সংকটৰ দিশটোকো উন্মোচন কৰিছে।

জানিব পৰা মতে যুৱতীগৰাকী আছিল হিমাচল প্ৰদেশৰ বাসিন্দা। কেইজনমান বন্ধুৰ সৈতে জয়পুৰলৈ ফুৰিবলৈ গৈছিল যুৱতীগৰাকী। জয়পুৰ আৰক্ষীয়ে জনোৱা তথ্য অনুসৰি যুৱতীগৰাকীয়ে অত্যধিক সুৰাপান কৰিছিল। অত্যধিক সুৰাপান কৰাৰ ফলত মানসিক স্বাস্থ্যৰ অৱনতি ঘটিছিল যুৱতীগৰাকীৰ। নিঃসন্দেহে হিমাচল প্ৰদেশৰ পৰা লগত লৈ যোৱা বন্ধুকেইজনৰ সৈতেই সুৰাপান কৰিছিল যুৱতীগৰাকীয়ে। এইখিনিতে প্ৰশ্ন আহে, বন্ধুকেইজনৰ লগত সুৰাপান কৰাৰ পিছত যুৱতীগৰাকীৰ তেনে অৱস্থাত তেওঁলোকে অকলে কিয় এৰি দিলে? এখন অন্য ৰাজ্যৰ পৰা ফুৰিবলৈ গৈ এখন অচিনাকী ঠাইত সুৰাপান কৰোৱাই যুৱতীগৰাকীক তেনে পৰিস্থিতিত এৰি দিয়া ‘বন্ধু’কেইজনৰ দায়িত্ববোধ নাছিল নেকি?

জয়পুৰৰ ভাইৰেল ঘটনাত জনতাৰ কাঠগৰাত যুৱতীগৰাকীকেই দোষী সাব্যস্ত কৰা হৈছে। কিন্তু এই ঘটনাৰ প্ৰকৃত দোষী কোন? যুৱতীগৰাকীৰ লগত ফুৰিবলৈ গৈ সুৰাপান কৰা তথাকথিত সেই ‘বন্ধু’কেইজন, যিয়ে যুৱতীগৰাকীক সেই অৱস্থাত এৰি দিছিল তেওঁলোকে যদি প্ৰথমতেই যুৱতীগৰাকীক নিয়ন্ত্ৰণ কৰিলেহেঁতেন তেতিয়া এই ঘটনা সংঘটিত হ’লহেঁতেন নে? মালব্য নগৰত ঘটনাটো সংঘটিৰ সময়ত চাই থকা সেই লোকসকল, মোবাইল কেমেৰাত সেই আপত্তিজনক দৃশ্যবোৰ আবদ্ধ কৰি ভাইৰেল কৰাসকল? এনেধৰণৰ লোকসকল জনতাৰ কাঠগৰাত যেতিয়ালৈ দোষী সাব্যস্ত নহ’ব তেতিয়ালৈ আমাৰ সমাজৰ সংস্কাৰ কেতিয়াও নহয়।

এই লেখাটো যুগুতাইছে মানসজ্যোতিয়ে