৭২ ঘণ্টীয়া যুদ্ধৰ পৰিণতি, ইৰাণৰ ৪০৬, ইজৰাইলৰ ১৬ নিহত
ইৰাণত ইজৰাইলৰ তীব্ৰ বিমান আক্ৰমণৰ ৭২ ঘন্টা পাৰ হৈ গ’ল। এই আক্ৰমণত এতিয়ালৈকে ইৰাণৰ ৪০৬ জন সাধাৰণ নাগৰিক আৰু জোৱানৰ মৃত্যু হোৱাৰ বিপৰীতে ৬৫৪ জন লোক আহত হৈছে। কিন্তু ইৰাণে এই পৰিসংখ্যা নাকচ কৰি কয় যে মাত্ৰ ২২৪ জন লোকৰ মৃত্যু হৈছে, ইয়াৰে অধিকাংশই সাধাৰণ নাগৰিক।
একে সময়তে ইৰাণৰ প্ৰতিশোধমূলক আক্ৰমণত ইজৰাইলত ১৬ জন লোকৰ মৃত্যু হোৱাৰ লগতে কেইবা ডজন লোক আহত হৈছে। যুদ্ধ বিৰতি ভংগ কৰি পুনৰ দুয়ো দেশত গা কৰি উঠিছে আক্ৰমণৰ কাৰ্য। প্ৰথমেই ইজৰাইলে যুদ্ধ বিৰতি ভংগ কৰি ইৰাণৰ ওপৰত আক্ৰমণ চলায়।
ইজৰাইলে দাবী কৰিছে যে তেওঁলোকে নিজৰ দেশৰ পৰা তেহৰাণলৈ ‘এয়াৰ কৰিডৰ’ সৃষ্টি কৰিছে, যাৰ জৰিয়তে এতিয়া তেহৰাণত কোনো বাধা নোহোৱাকৈ বিমান আক্ৰমণ কৰিব পাৰিব। এই কৰিডৰ ব্যৱহাৰ কৰি ইজৰাইলৰ বায়ুসেনাই ২৩০০ কিলোমিটাৰ দূৰৈৰ ইৰাণৰ মাছহাদ বিমানবন্দৰত ইন্ধন ভৰোৱা বিমান এখনক লক্ষ্য কৰি সম্পূৰ্ণৰূপে ধ্বংস কৰি পেলায়।
ইৰাণৰ নান্টজ, ইছফাহান আৰু ফৰ্ডো পাৰমাণৱিক স্থানত ইজৰাইলৰ আক্ৰমণ। এই আক্ৰমণত ইউৰেনিয়াম সমৃদ্ধিশালী যন্ত্ৰৰ যথেষ্ট ক্ষতি হৈছে। তেহৰাণ আৰু অন্যান্য চহৰৰ সামৰিক ঘাটি, ক্ষেপণাস্ত্ৰ উৎপাদন কেন্দ্ৰ, শোধনাগাৰ আদিকো লক্ষ্য কৰি লোৱা হৈছিল। কেৰমানশ্বাহ আৰু তাব্ৰিজৰ মিছাইল ঘাটি ধ্বংস হোৱাৰ বিপৰীতে তেহৰাণৰ মেহৰাবাদ বিমানবন্দৰৰো ক্ষতিসাধন হৈছে।
ইজৰাইলৰ আক্ৰমণত ইৰাণৰ শীৰ্ষ সামৰিক আৰু চোৰাংচোৱা নেতৃত্ব প্ৰায় সম্পূৰ্ণৰূপে নিঃশেষ হৈ গৈছে। কেইবাগৰাকী সেনা প্ৰধান, বৈজ্ঞানিক নিহত হৈছে।
ইৰাণে ইজৰাইলৰ ওপৰত ১০০-২০০ বেলিষ্টিক মিছাইল আৰু ড্ৰোন নিক্ষেপ কৰি প্ৰতিশোধ লয়। ইয়াৰে কিছুমানে আইৰন ড’মক ডজ কৰিবলৈ সক্ষম হয় আৰু টেল আভিভৰ বহু অট্টালিকা ধ্বংস হয়।
তেহৰাণ টাইমছৰ তথ্য অনুসৰি ইৰাণে সোমবাৰে পুৱাৰ ভাগত দখল কৰা অঞ্চলত ক্ষেপণাস্ত্ৰ নিক্ষেপ কৰে। ইয়াৰ ভিতৰত আছে হাইফা, কিৰিয়াট গাট, নেগেভ মৰুভূমি আৰু ডিমোনা কমপ্লেক্স। হাইফা বন্দৰত আক্ৰমণৰ পিছতে সংঘটিত হয় এক অগ্নিকাণ্ড। ইৰাণৰ সেনাই ৱেইজমেন বিজ্ঞান প্ৰতিষ্ঠানকো লক্ষ্য কৰি লয়। ইয়াৰ লগতে ১৫০ৰো অধিক সামৰিক আৰু চোৰাংচোৱা ঘাটিকো আক্ৰমণ কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
