দেশৰ জনগণৰ বাবে নানান ধৰণৰ প্ৰকল্প আছে কেন্দ্ৰৰ৷ ইয়াৰোপৰি নাৰীৰ ক্ষমতায়নক আগুৱাই নিবলৈ চৰকাৰে প্ৰচেষ্টা অব্যাহত ৰাখিছে৷ নাৰীৰ সুবিধাৰ্থে আছে কেইবাটাও প্ৰকল্প৷ এইবাৰ আন এক নতুন প্ৰকল্প আনিবলৈ সাজু হৈছে নৰেন্দ্ৰ মোদীৰ চৰকাৰ৷ আৰম্ভ হৈছে বীমা সখী যোজনা৷
৯ ডিচেম্বৰ সোমবাৰে হাৰিয়ানাৰ পানিপথত বিকাশ ভাৰত অনুষ্ঠানত এই প্ৰকল্পৰ শুভ সূচনা কৰা হৈছে৷ মূলত গাওঁৰ মহিলাসকলৰ বাবে এই প্ৰকল্প৷ মহিলাসকলক লাইফ ইনছুৰেন্স কৰ্পৰেছন অফ ইণ্ডিয়াৰ বীমা সখী এজেণ্ট হিচাপে কাম দিয়া হ’ব৷ গাওঁ অঞ্চলত মহিলাসকলৰ বাবে চাকৰি আৰু কৰ্মসংস্থানৰ সুযোগ সাধাৰণতে খুবেই কম৷ এই চৰকাৰী উদ্যোগৰ ফলত মহিলাসকল স্বনিৰ্ভৰ হোৱাৰ সুযোগ পাব৷ এই প্ৰকল্পত নাম অন্তৰ্ভুক্তিৰ পাছত মহিলাসকলে পাব প্ৰতিমাহে ৭ হাজাৰকৈ টকা৷
যিসকলে এই প্ৰকল্পত নাম নথিভুক্ত কৰিব প্ৰথম বছৰতে তেওঁলোকে প্ৰতিমাহে ৭হাজাৰকৈ টকা পাব৷ দ্বিতীয় বছৰত প্ৰতি মাহে ৬হাজাৰ টকালৈ কমি যাব৷ তৃতীয় বছৰত প্ৰতিমাহে পাব ৫হাজাপ টকা৷ ইয়াৰোপৰি তেওঁলোকে প্ৰতিমাহে ২১ হাজাৰ পৰ্যন্ত পাব পাৰে৷ বীমান লক্ষ্যমাত্ৰা পূৰণত কমিছনভিত্তিক পুৰস্কাৰো প্ৰদান কৰা হ’ব৷
প্ৰকল্পৰ প্ৰথম দফাত ৩৫ হাজাৰ মহিলাক বিমা এজেণ্ট হিচাপে নিয়োগ কৰা হ’ব৷ ভৱিষ্যতে আৰু ৫০ হাজাৰ মহিলাক এই প্ৰকল্পৰ অন্তৰ্ভুক্ত কৰাৰ চিন্তা কৰিছে মোদী চৰকাৰে৷ প্ৰাথমিকভাৱে এই প্ৰকল্পটো কেৱল হাৰিয়ানাতেই আৰম্ভ হৈছে৷ ধীৰে ধীৰে ই দেশজুৰি আৰম্ভ হ’ব৷ ১৮ৰ পৰা ৫০ বছৰীয়া যিকোনো তৰুণী বা মহিলাই এই প্ৰকল্পত নাম লিখাব পাৰে৷ প্ৰয়োজনীয় শিক্ষাগত অৰ্হতা মাধ্যমিক পাছ হ’ব লাগিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
