প্ৰধানমন্ত্ৰী, মুখ্যমন্ত্ৰী বা অন্য কোনো মন্ত্ৰীয়ে যদি লেথাৰিকৈ ৩০ দিন আৰক্ষীৰ জিম্মাত বা কাৰাগাৰত থাকে তেন্তে তেওঁক সেই পদৰ পৰা অপসাৰণ কৰা হ’ব৷ বুধবাৰে লোকসভাত বিল পেছ কৰিলে কেন্দ্ৰীয় চৰকাৰে৷ কেন্দ্ৰীয় গৃহমন্ত্ৰী অমিত শ্বাহে লোকসভাত ১৩০ তম সংবিধান সংশোধনী বিল উত্থাপন কৰিছে৷ বিল উত্থাপন হোৱাৰ পূৰ্বৰে পৰাই ইয়াৰ বিৰোধীতাৰে সৰব হৈ আছে বিৰোধী দলৰ নেতাসকল৷ লোকসভাত বিল উত্থাপিত হোৱাৰ লগে লগেই অধিবেক্ষণ কক্ষৰ ভিতৰতেই বিক্ষোভ কৰে বিৰোধী সাংসদসকলে৷
এই বিলৰ মাধ্যমেৰে বিৰোধীৰ কণ্ঠস্বৰক দমাবলৈ চেষ্টা কৰা বুলি অভিযোগ আনিছে বিৰোধী ৰাজনৈতিক দলসমূহে৷ কংগ্ৰেছ, তৃণমূল, চিপিআইএমসহ সকলো বিৰোধী দলসমূহে একগোট হৈ কেন্দ্ৰৰ এই বিলৰ বিৰুদ্ধে সৰব হৈছে৷ সম্প্ৰতি বিজেপি বিৰোধী বিভিন্ন দলৰ নেতাসকলক গ্ৰেপ্তাৰ কৰাও দেখা গৈছে৷ দিল্লীৰ প্ৰাক্তন মুখমন্ত্ৰী অৰবিন্দ কেজৰিৱাল, ঝাৰখণ্ডৰ মুখ্যমন্ত্ৰী হেমন্ত চুৰেণৰ দৰে নেতাক গ্ৰেপ্তাৰ কৰা দেখা গৈছিল৷ এই বিল আইনত পৰিণত হলে সেয়া বিৰোধী দলৰ নেতাৰ বিৰুদ্ধে ৰাজনৈতিক হাঁথিয়াৰ হিচাপে ব্যৱহাৰ হব পাৰে বুলি আশংকা কৰা হৈছে৷
কংগ্ৰেছ সাংসদ প্ৰিয়ংকা গান্ধীৰ বক্তব্য যে দুৰ্নীতিৰ বিৰুদ্ধে পদক্ষেপৰ কথা কেৱল সাধাৰণ মানুহৰ চকুত কাপোৰ বন্ধাৰ দৰেই কথা৷ তেওঁ কয়, ‘ভৱিষ্যতে যিকোনো মুখ্যমন্ত্ৰীৰ বিৰুদ্ধে যিকোনো গোচৰ তৰা হব পাৰে৷ তেওঁ দোষী সাব্যস্ত নহলেও তেওঁক ৩০ দিন আৰক্ষীৰ জিম্মাত ৰাখিবও পাৰে৷ তাৰপিছতেই তেওঁ আৰু মুখ্যমন্ত্ৰী হৈ নাথাকিব৷ এয়া সম্পূৰ্ণৰূপে সংবিধানবিৰোধী এক কাৰ্যকলাপ৷ এয়া অগণতান্ত্ৰিক আৰু অত্যন্তই দুৰ্ভাগ্যজনক৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
