অসম লাইভ২৪ঃ মাৰ্কিন প্ৰেছিডেণ্ট জ’ বাইডেনৰ আৱাসত এতিয়া বিপদঘণ্টা বাজিছে। সোমবাৰে হোৱাইট হাউছৰ গেট ভাঙি পেলাইছে এখন বাহনে। গেট ভঙাই নহয় হোৱাইট হাউছৰ ভিতৰলৈকে সোমাই আহিছে বাহনখন। অৱশ্যে বাহনখনে বেছি ভিতৰলৈ প্ৰৱেশ কৰিব নোৱাৰিলে। নিৰাপত্তাৰক্ষীয়ে বাহনখন ৰখাই দিয়াৰ পাছতেই অভিযুক্ত চালককো লগে লগে আটক কৰে। এই ঘটনাৰ পাছতেই হোৱাইট হাউছৰ নিৰাপত্তাক লৈ উত্থাপিত হৈছে প্ৰশ্ন।
সংবাদ সংস্থা এ এন আইৰ তৰফৰ পৰা প্ৰকাশিত খবৰ অনুসৰি স্থানীয় সময় মতে সন্ধিয়া ঠিক ৬ বজাত এই ঘটনা সংঘটিত হৈছে। হঠাতে হোৱাইট হাউছৰ বাহিৰৰ গেটত ধাক্কা মাৰে এখন বাহনে। গেট ভাঙি কিছুদুৰ আগুৱাইয়ো আহে বাহনখন। এই দুৰ্ঘটনাক লৈ চিক্ৰেট চাৰ্ভিছৰ মুখ্য জনসংযোগ বিষয়া এন্থনী গুগলিয়েলমিয়ে কয়, ‘আমি এই দুৰ্ঘটনাৰ তদন্ত আৰম্ভ কৰিছো। কি কাৰণত গেট ভাঙি বাহনখন সোমাই আহিল আমি বৰ্তমানলৈকে ইয়াৰ সঠিক তথ্য পোৱা নাই। গাড়ীখন আমি বাজেয়াপ্ত কৰিছো। অভিযুক্ত চালককো আটক কৰিছো। অৱশ্যে এই দুৰ্ঘটনা হোৱাৰ সময়ত বাসভৱনত বাইডেন উপস্থিত নাছিল। হোৱাইট হাউছৰ এই ঘটনাৰ পাছতেই ১৫ ষ্ট্ৰিট আৰু পেনছিলভেনিয়া এভিনিউত যানজঁটৰো সৃষ্টি হয়।
উল্লেখ্য যে, এয়াই প্ৰথম নহয়। বিগত বছৰৰ মে মাহত হোৱাইট হাউছৰ ছিকিউৰিটি বেৰিকেডত প্ৰচণ্ড জোৰেৰে ধাক্কা মাৰিছিল এখন ট্ৰাকে। দ্ৰুত ট্ৰাকচালকক আটক কৰে প্ৰেছিডেণ্টৰ নিৰাপত্তাৰ দায়িত্বত থকা চিক্ৰেট ছাৰ্ভিছৰ বিষয়াসকলে। বিশ্বৰ সকলোতকৈ নিৰাপদ ঠাইসমূহৰ ভিতৰত অন্যতম হৈছে হোৱাইট হাউছ। মাৰ্কিন প্ৰেছিডেণ্টৰ বিশেষ বাসভৱনটো চাৰিওফালে লৌহ আৱৰণেৰে ঢাকি থোৱা আছে। ছিক্ৰেট ছাৰ্ভিছৰ চকুৰ আঁৰতো এই এই আৱৰণেই সুৰক্ষা প্ৰদান কৰি থাকে হোৱাইট হাউছক।
এইখিনিতেই উল্লেখ কৰা প্ৰয়োজন যে, টুইন টাৱাৰত হোৱা সেই আক্ৰমণৰ পাছতেই ‘গ্ল’বেল জেহাদ’ৰ বিৰুদ্ধে আমেৰিকাই যুঁজ অব্যাহত ৰাখিছে। ফলত অল কায়দাৰ পৰা আৰম্ভ কৰি ইছলামিক ষ্টেটৰ হিট লিষ্টত হোৱাইট হাউছ। মাৰ্কিন প্ৰেছিডেণ্টৰ চৰকাৰী আবাসত অলপমান ধাক্কা লাগিলেই আমেৰিকা কঁপি উঠিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
