দক্ষিণ আমেৰিকাৰ দেশ ভেনিজুৱেলাত সংঘটিত হোৱা এক সংহা*ৰী ভূমিকম্পই সমগ্ৰ বিশ্বক স্তম্ভিত কৰি তুলিছে। ভাৰতীয় সময় অনুসৰি ২৫ জুনৰ পুৱা দেশখনত পৰম্পৰাগতভাৱে দুটাকৈ শক্তিশালী ভূমিকম্পই জোকাৰি যায়। প্ৰথমে ৭.২ মাত্ৰাৰ আৰু তাৰ কিছু সময় পিছতে ৭.৫ মাত্ৰাৰ দ্বিতীয়টো শক্তিশালী কম্পনে দেশখনৰ ৰাজধানী কাৰাকাছকে ধৰি বিস্তীর্ণ অঞ্চল নিমিষতে ধ্বংসস্তুপলৈ পৰিণত কৰে।
ভূমিকম্প দুটাৰ অভিকেন্দ্ৰস্থলী আছিল কাৰাকাছৰ নিকটৱৰ্তী মোণ্টাল্বন অঞ্চলত। বিশেষজ্ঞসকলৰ মতে, কম গভীৰতাত উৎপত্তি হোৱা বাবে ভূমিকম্পৰ শক্তি বা প্ৰভাৱ অধিক তীব্ৰভাৱে অনুভূত হয়। ফলস্বৰূপে কেইছেকেণ্ডমানৰ ভিতৰতে কেইবামহলীয়া শতাধিক অট্টালিকা, বাণিজ্যিক প্ৰতিষ্ঠান, চৰকাৰী কাৰ্যালয় আৰু আৱাসিক অঞ্চল মাটিৰ লগত মিহলি হৈ যায়।
ৰাজধানী কাৰাকাছত আতংকময় পৰিৱেশ
ভূমিকম্পৰ কম্পন আৰম্ভ হোৱাৰ লগে লগে লাখ লাখ লোক আতংকিত হৈ ঘৰৰ পৰা ওলাই ৰাজপথত আশ্ৰয় লয়। বহু অঞ্চলত বিদ্যুৎ সংযোগ সম্পূৰ্ণৰূপে বিচ্ছিন্ন হৈ পৰে। মোবাইল নেটৱৰ্ক আৰু ইণ্টাৰনেট সেৱাও বিকল হৈ পৰাত উদ্ধাৰ আৰু সাহায্যকাৰ্যত যথেষ্ট অসুবিধাৰ সন্মুখীন হোৱা দেখা গৈছে। এতিয়াও হাজাৰ হাজাৰ লোক ধ্বংসস্তূপৰ তলত আবদ্ধ হৈ থকা বুলি আশংকা কৰা হৈছে। বহু বাট-পথ বাৰুকৈয়ে ক্ষতিগ্ৰস্ত হোৱাৰ ফলত উদ্ধাৰকাৰী দলসমূহেও প্ৰভাৱিত অঞ্চললৈ তৎকালে উপস্থিত হোৱাত কিছু সমস্যাৰ সন্মুখীন হৈছে।
মৃ*ত্যুৰ সংখ্যা ১ লাখ পাৰ কৰাৰ আশংকা
প্ৰাথমিক তথ্য অনুসৰি ইতিমধ্যে ১০ হাজাৰৰো অধিক লোকৰ মৃ*ত্যুৰ খবৰ পোৱা গৈছে। কিন্তু উদ্ধাৰ অভিযান আগবঢ়াৰ লগে লগে মৃত*কৰ সংখ্যা আৰু বহুগুণে বৃদ্ধি পাব পাৰে তাত কোনো সন্দেহ নাই। বহু আন্তর্জাতিক বিশেষজ্ঞই এই সংখ্যাই ১ লাখৰ ঘৰ অতিক্ৰম কৰাৰ আশংকা কৰা হৈছে। যদি এই আশংকা সত্য হয়, তেন্তে এই দুৰ্যোগ বিগত ১০০ বছৰৰ ভিতৰত বিশ্বৰ অন্যতম ভয়ংকৰ আৰু সৰ্বাধিক প্ৰা*ণহানিকাৰক ভূমিকম্প হিচাপে ইতিহাসত স্থান লাভ কৰিব।
ভেনিজুৱেলাত জৰুৰী অৱস্থা ঘোষণা
দেশখনৰ চৰকাৰে ইতিমধ্যে সমগ্ৰ ভেনিজুৱেলাত জৰুৰী অৱস্থা ঘোষণা কৰিছে। সেনাবাহিনী, অ*গ্নিনিৰ্বাপক বাহিনী, চিকিৎসা বিভাগ আৰু স্বেচ্ছাসেৱী সংগঠনসমূহক উদ্ধাৰ অভিযানত নিয়োজিত কৰা হৈছে। মোণ্টাল্বন অঞ্চলত অৱস্থিত তেল শোধনাগাৰসমূহৰ ক্ষয়ক্ষতিৰ আশংকাক লৈও উদ্বেগ বৃদ্ধি পাইছে। যদি এই শোধনাগাৰসমূহত বৃহৎ ক্ষতি হয়, তেন্তে পৰিস্থিতি আৰু জটিল হ’ব পাৰে বুলি আশংকা কৰা হৈছে।
ভাৰতসহ বিশ্বজুৰি সহায়ৰ হাত
ভূমিকম্পৰ পিছতে বিশ্বৰ বিভিন্ন দেশ আৰু আন্তর্জাতিক সংস্থাই সহায়ৰ হাত আগবঢ়াবলৈ আগ্ৰহ প্ৰকাশ কৰিছে। ভাৰতৰ প্ৰধানমন্ত্ৰী নৰেন্দ্ৰ মোদীয়ে গভীৰ শোক প্ৰকাশ কৰি মৃত*কৰ আত্মীয়-স্বজনলৈ সমবেদনা জ্ঞাপন কৰে। লগতে ভেনিজুৱেলাৰ এই কঠিন সময়ত ভাৰত সদায় কাষত থাকিব বুলি আশ্বাস দিছে। ইতিমধ্যে ভাৰতে NDRFৰ এটা বিশেষ উদ্ধাৰকাৰী দল প্ৰস্তুত কৰি ৰাখিছে। অত্যাধুনিক উদ্ধাৰ সঁজুলি, চিকিৎসা সামগ্ৰী আৰু বিশেষজ্ঞ কৰ্মীৰে সজ্জিত এই দলটো যিকোনো মুহূৰ্ততে ভেনিজুৱেলালৈ ৰাওনা হ’ব পাৰে বুলি জানিব পৰা গৈছে। মেক্সিকোৰ বিদেশ মন্ত্ৰালয়, আমেৰিকাৰ শক্তিমন্ত্ৰী ক্ৰিছ ৰাইটকে ধৰি বিশ্বৰ বহু নেতাই সামাজিক মাধ্যমযোগে গভীৰ শোক প্ৰকাশ কৰিছে। বহু দেশে উদ্ধাৰ আৰু পুনৰ নিৰ্মাণ কাৰ্যত সহায় আগবঢ়োৱাৰ প্ৰতিশ্ৰুতি দিছে।
চিকিৎসাকৰ্মীসকললৈ কাৰ্যবাহী ৰাষ্ট্ৰপতিৰ আহ্বান
ভেনিজুৱেলাৰ কাৰ্যবাহী ৰাষ্ট্ৰপতি ৰড্ৰিগেজে দেশবাসীক শান্ত থাকিবলৈ আহ্বান জনাইছে। তেওঁ সকলো চিকিৎসক, নাৰ্ছ আৰু স্বাস্থ্যকৰ্মীক জৰুৰীভাৱে কৰ্মস্থলীত যোগদান কৰিবলৈ নিৰ্দেশ দিয়ে। দেশখনৰ সকলো চৰকাৰী আৰু বেচৰকাৰী চিকিৎসালয়ত জৰুৰীকালীন অৱস্থা ঘোষণা কৰা হৈছে। আহতসকলক চিকিৎসা প্ৰদান, ৰ*ক্ত সংগ্ৰহ আৰু চিকিৎসা সামগ্ৰী বিতৰণৰ কাম অব্যাহত আছে।
ধ্বং*সস্তূপৰ মাজত জীৱন বিচাৰি অভিযান
বৰ্তমানো হাজাৰ হাজাৰ উদ্ধাৰকাৰী কৰ্মী ধ্বং*সস্তূপৰ মাজত জীৱিত লোক বিচাৰি অভিযান চলাই আছে। বহু পৰিয়াল এতিয়াও নিজৰ আত্মীয়-স্বজনৰ সন্ধানত চিকিৎসালয়, উদ্ধাৰ শিবিৰ আৰু ধ্বং*সপ্ৰাপ্ত অঞ্চলসমূহত উদ্ধাৰ অভিযান অব্যাহত ৰাখিছে। চৌদিশে কান্দোন, হাহাকাৰ আৰু অনিশ্চয়তাৰ মাজত ভেনিজুৱেলাই ইতিহাসৰ অন্যতম ভয়ং*কৰ প্ৰাকৃতিক দুৰ্যোগৰ সন্মুখীন হৈছে। সমগ্ৰ বিশ্বই এতিয়া দেশখনৰ উদ্ধাৰ আৰু পুনৰ গঠন কাৰ্যৰ প্ৰতি নজৰ ৰাখিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
