১৩ বছৰ ধৰি যুঁজিও লাভ নকৰিলে অলিম্পিক, অৱশেষত মল্লযুঁজক বিদায় দি- ‘মা মই হাৰি গলো’
পেৰিছ অলিম্পিকে ভাৰতীয় ক্ৰীড়াপ্ৰেমীৰ বাবে এক অবিস্মৰণীয় ঘাঁ কৰি থৈ গ’ল। প্ৰথমবাৰৰ বাবে মহিলা মল্লযুঁজৰ ফাইনেলত প্ৰৱেশ কৰা বিনেশ ফ’গাটৰ পৰা স্বৰ্ণ পদক লাভৰ আশা কৰিছিল সমগ্ৰ ভাৰতৰ লগতে মল্লযুঁজৰ সৈতে জড়িত বিশ্বৰ বহু খেলুৱৈয়েও। ফাইনেল মেচৰ দিনা অতিৰিক্ত ১০০ গ্ৰাম ওজনৰ বাবে তেওঁক অযোগ্য ঘোষণা কৰা হয়।
এই খবৰে দেশৰ পদক লাভৰ আশা ভংগ কৰাই নহয় ১৩ বছৰ ধৰি প্ৰতিদ্বন্দ্বীক পৰাস্ত কৰা মল্লযুঁজাৰুগৰাকীৰ সাহসো ভাঙি পেলায়। ২০০১ চনৰ পৰা মল্লযুঁজ খেলি অহা বিনেশে অৱশেষত ২০২৪ চনত অলিম্পিকত মোক্ষম আঘাত পোৱাৰ পাছত এই ক্ৰীড়াৰ পৰা বিদায় লয়।
পেৰিছ অলিম্পিকত ভাৰতৰ বাবে ইতিহাস সৃষ্টি কৰা মল্লযুঁজাৰু বিনেশ ফ’গাটৰ কেৰিয়াৰ এনেদৰে শেষ হ’ব বুলি কোনেও ভবা নাছিল। ভাৰতক প্ৰথমবাৰৰ বাবে অলিম্পিকৰ ফাইনেললৈ লৈ যোৱা মহিলা মল্লযুঁজাৰুগৰাকীয়ে যেতিয়া সোণৰ পদক লাভৰ ওচৰ চাপিছিল, তেতিয়া ভাগ্যই তেওঁক বিশ্বাসঘাতকতা কৰে।
৫০ কেজি ওজন শাখাত খেলা বিনেশ ফ’গাটৰ মেচখনৰ দিনটোত কেৱল মাত্ৰ ১০০ গ্ৰাম বেছি ওজন হোৱাৰ বাবে পেৰিছ অলিম্পিকত অংশগ্ৰহণৰ বাবে অযোগ্য ঘোষণা কৰা হয়। ওজন কম কৰাৰ বাবে খাদ্য-পানী পৰিহাৰ কৰাৰ লগতে চুলি কাটি আনকি শৰীৰৰ পৰা তেজ উলিয়াইয়ো অৱশেষত হাৰ মানি যাব লগা হয় বিনেশ।
পেৰিছ অলিম্পিকত সোণৰ পদক লাভৰ ওচৰ চাপি অহা বিনেশ ফ’গাটে অতিৰিক্ত ওজনৰ বাবে অযোগ্য ঘোষণা কৰাৰ পিছত এতিয়া মল্লযুঁজৰ পৰা অৱসৰ লোৱাৰ কথা ঘোষণা কৰে।
ছচিয়েল মিডিয়াত এটা পোষ্টত বিনেশে লিখিছে- মা, মোৰ বিৰুদ্ধে মল্লযুঁজ জয়ী হ’ল, মই হাৰিলোঁ, ক্ষমা কৰিবা, তোমাৰ সপোন, মোৰ সাহস সকলো ভাঙি গৈছে, মোৰ এতিয়া ইয়াতকৈ বেছি শক্তি নাই। বিদায় মল্লযুঁজ ২০০১-২০২৪, আপোনালোক সকলোৰে ওচৰত মই সদায় ঋণী হৈ থাকিম, ক্ষমা কৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
