আজি ৰাজ্যৰ ১০ লাখ ছাত্ৰীৰ একাউণ্টত সোমাব ধন, মুখ্যমন্ত্ৰীৰ নিযুত মইনা আঁচনি
আজি ৮ আগষ্ট তাৰিখ বৃহস্পতিবাৰে ৰাজ্যৰ ১০ লাখ ছাত্ৰীৰ একাউণ্টত সোমাব ধন। মুখ্যমন্ত্ৰীৰ নিযুত মইনা আঁচনিৰ অধিনত এইদৰে ৰাজ্যৰ মহাবিদ্যালয় আৰু বিশ্ববিদ্যালয়ত উচ্চ শিক্ষা গ্ৰহণ কৰি থকা ছাত্ৰীসকলে প্ৰতিমাহে ৰাজ্য চৰকাৰৰ পৰা লাভ কৰিব এক নিৰ্দিষ্ট পৰিমাণৰ ধন।
আজিৰে পৰা আনুষ্ঠানিকভাৱে আৰম্ভ হয় এই ‘নিযুত মইনা আঁচনি’। আজি দিছপুৰৰ লোকসেৱা ভৱনত মুখ্যমন্ত্ৰী ড০ হিমন্ত বিশ্ব শৰ্মাই এই আঁচনি মুকলি কৰে। আঁচনিখনৰ বাবে অসম চৰকাৰে ৩০০ কোটি টকা ধাৰ্য কৰিছে। এই আঁচনিত অধীনত ৰাজ্যৰ ১০লাখ ছাত্ৰীয়ে এতিয়া প্ৰতিমাহে লাভ কৰিব ১০০০, ১২৫০ আৰু ২৫০০ টকাকৈ। প্ৰতিমাহে ১১ তাৰিখে এই ধন বেংক একাউণ্টত লাভ কৰিব ছাত্ৰীসকলে।
আঁচনিখনৰ জৰিয়তে একাদশ শ্ৰেণীত অধ্যয়নৰত ছাত্ৰীসকলে গৰমৰ বন্ধৰ সময়খিনিক বাদ দি বাকী আটাইকেইটা মাহত প্ৰতি মাহে ১০০০ টকাকৈ ৰাজ্য চৰকাৰৰ পৰা লাভ কৰিব। দ্বাদশ শ্ৰেণী উত্তীৰ্ণ নোহোৱা পৰ্যন্ত প্ৰতিমাহে এই ধন লাভ কৰিব।
সেইদৰে স্নাতক অধ্যয়নৰত ছাত্ৰীসকলে প্ৰতিমাহে ১২৫০ টকাকৈ লাভ কৰিব। বি এডত অধ্যয়নৰত ছাত্ৰীসকলে প্ৰতিমাহে লাভ কৰিব ২৫০০ টকাকৈ। এই সুবিধা ভেঞ্চাৰ আৰু জুনিয়ৰ কলেজত অধ্যয়ন কৰি থকা ছাত্ৰীসকলেও লাভ কৰিব।
ৰাজ্য চৰকাৰে পূৰ্বে ঘোষণা কৰা অনুসৰিয়েই এটা বছৰত মুঠ ১০ মাহ এই আঁচনিৰ পৰা ধন লাভ কৰিব ছাত্ৰীসকলে। সেই অনুসৰি উচ্চতৰ মাধ্যমিকৰ একাদশ আৰু দ্বাদশ শ্ৰেণীৰ ছাত্ৰীসকলে ২০ মাহ এই ধন লাভ কৰিব। সেইদৰেই স্নাতকত অধ্যয়নৰত ছাত্ৰীসকলে অধ্যয়ন সমাপ্ত নোহোৱা পৰ্যন্ত এই আঁচনিৰ সুবিধা লাভ কৰিব।
অৱশ্যে ব্যক্তিগত খণ্ডৰ শিক্ষানুষ্ঠানত অধ্যয়নৰত ছাত্ৰীসকলে এই আঁচনিৰ সুবিধা লাভ নকৰে। উচ্চতৰ আৰু স্নাতক মহলাত অধ্যয়নৰত কোনো ছাত্ৰী যদি বিবাহিত তেন্তে সেই ছাত্ৰীয়েও এই আঁচনিৰ পৰা বঞ্চিত হ’ব। অৱশ্যে স্নাতকোত্তৰ অধ্যয়নৰত ছাত্ৰী বিবাহিত হ’লেও তেওঁ এই আঁচনিৰ সুবিধা লাভ কৰিব।
https://x.com/himantabiswa/status/1821395914646278513
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
