এইবাৰ IPLত RCB চেম্পিয়ন হলেও আচল চেম্পিয়ন যেন বৈভৱ সূৰ্যবংশীহে। ক্ৰিকেট বুলিলেই এতিয়া এটাই নাম-বৈভৱ সূৰ্যবংশী। চলিত ছিজনত ২৩৭.৩১ ষ্ট্ৰাইক ৰেটেৰ বৈভৱ সূৰ্যবংশীয়ে সংগ্ৰহ কৰিছিল মুঠ ৭৭৬ ৰান। বৈভৱৰ ত্ৰাসত ত্ৰস্তমান হৈ পৰিছিল বুমৰাহ, মিচ্চেল ষ্টাৰ্ক, কামিনছ, ৰাবাডাৰ দৰে বিশ্বৰ আগশাৰীৰ বলাৰসকল। যাৰ বাবে বিস্ময় বালকজনে লাভ কৰে ORANGE CAP। দুৰ্দান্ত প্ৰদৰ্শনৰ বাবেই মাত্ৰ ১৫ বছৰ বয়সতেই ইতিমধ্যে টীম ইণ্ডিয়াৰ মূল দললৈ আমন্ত্ৰণ লাভ কৰিছে বৈভৱ সূৰ্যবংশীয়ে। সৰ্বকনিষ্ঠ হিচাপে যিকোনো দেশৰ ছিনিয়ৰ দললৈ আমন্ত্ৰণ লাভ কৰাৰ ক্ষেত্ৰত শচীন তেণ্ডুলকাৰকো চেৰ পেলালে বৈভৱ সূৰ্যবংশীয়ে। চলিত IPLত ৰাজস্থান ৰয়েলছে ফাইনেললৈ উন্নীত নহলেও ফাইনেলত উপস্থিত আছিল বৈভৱ সূৰ্যবংশী। ফাইনেলত RCB চেম্পিয়নৰ খিতাপ দখল কৰাৰ পিছতে বিৰাট কোহলিক সাক্ষাৎ কৰে সূৰ্যবংশীয়ে। বিৰাট কোহলিক সাক্ষাৎ কৰাৰ পিছতে নিজৰ অনুভৱ ব্যক্ত কৰি সূৰ্যবংশীয়ে কয়-‘IPLত খেলাৰ পূৰ্বে মই RCBৰে সমৰ্থক আছিলো। মই বিৰাট কোহলিৰ বহুত ডাঙৰ অনুৰাগী। তেওঁ মোৰ কান্ধত হাত থৈ কথা কওঁতে এনেকুৱা লগাই নাছিল যে তেওঁ বিৰাট কোহলি। তেওঁ মোক ডাঙৰ দাদাৰ দৰে কথাবোৰ কৈছিল’
বিৰাট কোহলিয়ে কি কৈছিল সূৰ্যবংশীক?
IPLৰ ফাইনেলৰ পিছতে বৈভৱ সূৰ্যবংশীৰ সৈতে কোহলিৰ কথোপকথন ভাইৰেল হৈছিল। অৱশ্যে তেওঁলোকৰ কি বিষয়ক লৈ কথোপকথন হৈছিল সেয়া স্পষ্ট হোৱা নাছিল। পিছলৈ বৈভৱ সূৰ্যবংশীয়ে এই সন্দৰ্ভত কয় যে ‘তেওঁ মোক ইয়াৰ পৰা আৰু বহু দূৰ আগুৱাই যাব লাগিব বুলি কয়। এয়া মাথোঁ কেৰিয়াৰৰ আৰম্ভণিহে। এতিয়াতকৈও আৰু অধিক কষ্ট কৰিব লাগিব বুলিও তেওঁ বাৰ বাৰ মোক সোঁৱৰাই দিয়ে। সদায়ে নিজৰ ওপৰত বিশ্বাস ৰাখিবলৈও তেওঁ উপদেশ দিয়ে। কোনে কি কৈছে সেইবোৰক বহু বেছি গুৰুত্ব নিদিবলৈ কোৱাৰ উপৰিও তেওঁ লগতে কয় যে সময় সদায় একে নাথাকে, কেতিয়াবা বেয়া দিন আহিলেও মানসিকভাৱে যাতে শক্তিশালী হৈ থাকো তাকো উপদেশ দিয়ে কোহলিয়ে’
IPLত বৈভৱ সূৰ্যবংশীয়ে লাভ কৰিলে ৫টাকৈ বঁটা
এইবাৰ IPLত সূৰ্যবংশীৰ বেটিং বৈভৱত দিশহাৰা হৈ পৰিছিল বিশ্বৰ আগশাৰীৰ সকলো বলাৰ। সূৰ্যবংশীৰ প্ৰায় একক প্ৰচেষ্টাতে ৰাজস্থান ৰয়েলছে কুৱালিফায়াৰ-২ লৈ উন্নীত হৈছিল। অৱশ্যে কুৱালিফায়াৰ-২ গুজৰাট টাইটানছৰ বিৰুদ্ধে পৰাস্ত হৈ এইবাৰৰ অভিযান সামৰিছিল ৰাজস্থান ৰয়েলছে। ফাইনেল নাপালেও এইবাৰ IPL ছিজনৰ ৫টাকৈ বঁটা নিজৰ নামত কৰিবলৈ সক্ষম হৈছে বৈভৱ সূৰ্যবংশীয়ে। সদ্যসমাপ্ত IPLত ORANGE CAP, Most Valuable Player, Emerging Player of the Season, Super Striker of the Season আৰু Super Sixes Award লাভ কৰে সূৰ্যবংশীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
