নিশা গভীৰ টোপনিতো আপুনি হঠাৎ ভৰিৰ পেশীত তীব্ৰ ঝিনঝিননি বা টানি ধৰা যেন অনুভৱ কৰে৷ টোপনিও ভাঙি যায়৷ এই অসহ্য যন্ত্ৰণাত ভৰি চিধা কৰা বা ঠিয় হোৱাও টান হৈ পৰে৷ বহুতৰে আছে এই ভয়ংকৰ অভিজ্ঞতা৷ পেশি টানি ধৰাৰ অন্যতম মূল কাৰণেই হৈছে শৰীৰত পানী অভাৱ বা ডিহাইড্ৰেছন৷ শৰীৰত তৰলৰ মাত্ৰা কমি গ’লে পেশিৰ স্বাভাৱিক সংকোচন আৰু প্ৰসাৰণ ব্যাহত হয়৷ সেয়ে দিনজুৰি পৰ্যাপ্ত পানী পান কৰাটো একান্তই প্ৰয়োজন৷ শৰীৰত কেলছিয়াম, পটাছিয়াম আৰু মেগনেছিয়ামৰ দৰে প্ৰয়োজনীয় খনিজৰ অভাৱ হ’লে এই সমস্যা বাঢ়ে৷ এই খনিজসমূহে পেশিৰ কাৰ্যকাৰিতা সচল ৰখাত গুৰুত্বপূৰ্ণ ভূমিকা পালন কৰে৷
পুষ্টিকৰ খাদ্যৰ অভাৱতেই বহু সময়ত এই সমস্যা হয়৷ বিশ্ৰামৰ সময়ত শৰীৰৰ তলৰ অংশত তেজৰ চলাচল কিছু কমি যায়৷ ফলত পেশিত পৰ্যাপ্ত অক্সিজেন আৰু প্ৰয়োজনীয় পুষ্টি পাবলৈ সময় লাগে৷ সেই কাৰণেই মূলত মাজনিশা বা পুৱাৰ ভাগত পেশি বেছিকৈ টানি ধৰে৷ যিয়ে দীৰ্ঘ সময় ঠিয় হৈ কাম কৰে বা অত্যধিক পৰিমাণে খোজ কাঢ়ে তেওঁলোকৰো পেশিৰ ওপৰত চাপ পৰে ফলত পেশি টানি ধৰা সমস্যা হ’ব পাৰে৷ ইয়াৰোপৰি গৰ্ভাৱস্থাত নাৰীৰ শৰীৰত হৰমন আৰু ওজনৰ পৰিবৰ্তনৰ কাৰণেও ভৰি টানি ধৰাৰ প্ৰৱণতা বাঢ়ি যায়৷
হঠাৎ টানি ধৰিলে আতংকিত নহ’ব৷ সেই স্থানত লাহে লাহে মালিছ কৰক৷ পেশি শিথিল কৰিবলৈ পৃথককৈ ষ্ট্ৰেচিং কৰিব পাৰে৷ ই ৰক্ত সঞ্চালন বঢ়াই বিষ দ্ৰুত কমাই অনাত সহায় কৰে৷ পেশিৰ শিথিলতা কমাবলৈ আইছ পেক বা বৰফৰ সেঁক বেছ কাৰ্যকৰ ভূমিকা পালন কৰে৷ আকৌ বহু ক্ষেত্ৰত গৰম পানীৰ সেঁক দিলেও পেশি দ্ৰুত নমনীয় হয়৷
আৰাম পাবলৈ হ’লে ঘৰুৱা এই পদ্ধতিসমূহ বেছ জনপ্ৰিয়৷ সমস্যা নিয়মিত হ’লে চিকিৎসকৰ পৰামৰ্শ ৰক্ত পৰীক্ষা কৰোৱা উচিত৷ নিয়মিত পাতল ব্যায়াম, সুষম খাদ্য আৰু ভিটামিন ডিৰ পৰ্যাপ্ত সৰবৰাহে এই কষ্টৰ পৰা মুক্তি দিব পাৰে৷ সুস্থ থাকিবলৈ হলে শৰীৰৰ সৰু সৰু সংকেতসমূহক গুৰুত্ব দিয়ক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
