মুখ্যমন্ত্ৰী হিমন্ত বিশ্ব শৰ্মাৰ আজি ওপজা দিন। ৫৩ বছৰত ভৰি দিলে মুখ্যমন্ত্ৰীগৰাকীয়ে৷ মুখ্যমন্ত্ৰীগৰাকীৰ ওপজা দিন উপলক্ষে সমষ্টিবাসীৰ মাজত ব্যাপক উচাহ-উদ্দীপনা পৰিলক্ষিত হৈছে। সমষ্টিবাসীয়ে তিনিদিনীয়াকৈ আয়োজন কৰিছে হিমন্ত বিশ্ব শৰ্মাৰ জন্মদিন। সজাই-পৰাই তুলিছে সমষ্টিৰ অংশ বিশেষ। মালিগাঁৱতো দেখা গৈছে আলোকসজ্জা। বেনাৰ-পোষ্টাৰেৰ সজাই-পৰাই তোলা হৈছে পাণ্ডু-মালিগাঁও অঞ্চল৷
প্ৰিয় নেতাগৰাকীৰ সুস্বাস্থ্য আৰু দীৰ্ঘায়ু কামনাৰে যজ্ঞৰ আয়োজন কৰা হৈছে ৰেষ্টকেম্প কালিবাৰীত৷ ৰাজ্যৰ আন আন প্ৰান্ততো মুখ্যমন্ত্ৰীৰ জন্মদিনৰ ব্যাপক আয়োজন কৰা হৈছে৷
মুখ্যমন্ত্ৰীৰ জন্মদিনত অংশ ল’বলৈ মাজুলীৰ পৰা আহিছে এদল কিশোৰ। আজি পুৱাই মাজুলীৰ বৈষ্ণৱ ভাগিনসকল ওলাইছে গুৱাহাটীলৈ। মাজুলীৰ আউনিআটী আৰু দক্ষিণপাট সত্ৰৰ পৰা আহিছে ৪৭টি শিশু-কিশোৰৰ দলটো। মাজুলীৰ পৰা অহা এই শিশু-কিশোৰৰ দলটোৱে গুৱাহাটীত সত্ৰীয়া নৃত্য-গীত প্ৰদর্শন কৰিব। তেওঁলোকে উপহাৰস্বৰূপে লৈ আহিছে শৰাই, গামোচা, পকামিঠৈৰ টোপোলা। আজি মুখ্যমন্ত্ৰীগৰাকীয়ে জন্মদিনৰ লগত সংগতি ৰাখি কেইবাটাও ভিন্ন কার্যসূচীত অংশগ্ৰহণ কৰিব। প্ৰথমে তেওঁ উত্তৰ গুৱাহাটীৰ দৌল গোবিন্দ মন্দিৰ দর্শন কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
