১৯ ছেপ্টেম্বৰ, ২০২৫। অসমৰ সংগীতজগতৰ বাবে দিনটো পৰিণত হৈছিল এক ক’লা দিনত। এই দিনটোতে চিংগাপুৰত মৃত্যুক আঁকোৱালি লৈছিল অসমৰ জনপ্ৰিয় শিল্পী জুবিন গাৰ্গে। প্ৰথমে ঘটনাটো ‘স্কুবা ডাইভিং দুৰ্ঘটনা’ বুলি প্ৰকাশ পাইছিল যদিও পৰৱৰ্তী সময়ত সন্মুখলৈ আহে বহু নতুন তথ্য। কিন্তু এতিয়াও প্ৰকৃত সত্য পোহৰলৈ অহা নাই প্ৰকৃততে কি হৈছিল সেইদিনা!
জুবিন গাৰ্গ ২০২৫ চনৰ North East India Festival-ত অংশগ্ৰহণৰ বাবে চিংগাপুৰলৈ গৈছিল। ১৯ ছেপ্টেম্বৰত তেওঁক চিংগাপুৰৰ অসমীয়া সমাজৰ একাংশ লোকে য়ট ভ্ৰমণলৈ লৈ যায়। কিন্তু লাইফ জেকেট পৰিধান নকৰা আৰু সাগৰত সাঁতুৰিব নোৱাৰাৰ বাবে জুবিন গাৰ্গৰ মৃত্যু হোৱা বুলি তেওঁৰ সংগীসকলে প্ৰকাশ কৰে। কিন্তু এতিয়াও এই তথ্য সম্পূৰ্ণ ৰহস্যৰ আৱৰ্তত।
জুবিনৰ আকস্মিক মৃত্যুক অসমৰ ৰাইজ আৰু পৰিয়ালৰলোকে সহজে মানি ল’ব পৰা নাই।। তেওঁৰ মৃত্যুক সন্দেহজনক বুলি অভিযোগ উত্থাপন কৰি একাধিক FIR দাখিল কৰে। ইয়াৰ পাছত অসম আৰক্ষীয়ে Special Investigation Team (SIT) গঠন কৰি ঘটনাটোৰ তদন্ত আৰম্ভ কৰে।
তদন্তৰ সময়ত জুবিনৰ মেনেজাৰ সিদ্ধাৰ্থ শৰ্মা, North East India Festival-ৰ আয়োজক শ্যামকানু মহন্তসহ কেইবাজনো লোকৰ বিৰুদ্ধে অভিযোগ উত্থাপিত হয়। SIT-এ ২০২৫ চনৰ ডিচেম্বৰত সাতজন লোকৰ বিৰুদ্ধে চাৰ্জশ্বীট দাখিল কৰে আৰু ইয়াৰে চাৰিজনৰ বিৰুদ্ধে হত্যাৰ অভিযোগ আনে।
জুবিন গাৰ্গৰ মৃত্যুৰ এবছৰ হ’বলৈ বেছিদিন নাই। এতিয়াও জুবিন ঘটনা গোচৰৰ বিচাৰ প্ৰক্ৰিয়া অব্যাহত আছে। ফাষ্টট্ৰেক আদালতত সাক্ষ্য দানৰ বাবে উপস্থিত এজনৰ পাছত আন এজন প্ৰৱাসী অসমীয়া।
উল্লেখ্য যে, ১৯ ছেপ্টেম্বৰৰ ঘটনাৰ ‘প্ৰকৃত কাহিনী’ক লৈ বহু প্ৰশ্ন উত্থাপন হ’লেও বৰ্তমানলৈ চিংগাপুৰৰ Coroner-ৰ আনুষ্ঠানিক সিদ্ধান্ত হৈছে—জুবিন গাৰ্গৰ মৃত্যু পানীত ডুবি হোৱা এক দুৰ্ঘটনা, হত্যাৰ প্ৰমাণ পোৱা হোৱা নাই।
(এই তথ্য যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
