পুৱাৰ পৰা সন্ধিয়া পৰ্যন্ত কম্পিউটাৰত কাম কৰে৷৷ আধুনিক কৰ্পৰেট জীৱনত এই ছবি প্ৰায় সকলোৰে চিনাকি৷ ডিঙি, পিঠি বা কঁকালৰ বিষ সেয়ে প্ৰায় প্ৰতিগৰাকী অফিচকৰ্মীৰেই এতিয়া দৈনন্দিন সংগী হৈ উঠিছে৷ বহুতেই এই ধৰণৰ বিষক সামান্য ক্লান্তি বা কামৰ চাপ বুলি অৱহেলা কৰে৷ কিন্তু চিকিৎসকে জনাইছে যে এই উপসৰ্গসমূহ প্ৰকৃততে এক গুৰুতৰ সমস্যাৰ সংকেত৷ এই সংকেতৰ নাম হৈছে অফিচ চিনড্ৰোম৷ বিশেষকৈ কভিড পৰবৰ্তী সময়ত ৱাৰ্ক ফ্ৰম হোম সংস্কৃতিত ঘৰত সঠিক পৰিকাঠামোৰ অভাৱত এই সমস্যা আৰু বৃদ্ধি পাইছে৷
অফিচ ছিনড্ৰোম প্ৰকৃততে কি?
ই এক নিৰ্দিষ্ট ৰোগ নহয়৷ বৰং দীৰ্ঘক্ষণ ধৰি অস্বাস্থ্যকৰ ভংগীত বহি কাম কৰাৰ ফলত তৈয়াৰ হোৱা একাধিক শাৰীৰিক সমস্যাৰ এক সমষ্টিহে৷ মূলত পেশী আৰু স্নায়ুতন্ত্ৰৰ ওপৰত ইয়াৰ প্ৰভাৱ পৰে৷ ঘণ্টাৰ পাছত ঘণ্টা চকীত বহি কম্পিউটাৰৰ ফালে হালি কাম কৰাৰ ফলত শৰীৰৰ বিভিন্ন পেশী বা অনমনীয় হৈ যায় আৰু মেৰুদণ্ডৰ ওপৰতো অস্বাভাৱিক চাপ সৃষ্টি হয়৷ ইয়াৰ পৰাই জন্ম হয় একাধিক সমস্যাৰ৷
ইয়াৰ প্ৰধান লক্ষণসমূহ কি কি?
অফিচ ছিনড্ৰোমৰ লক্ষণসমূহ ব্যক্তিভেদে ভিন্ন হব পাৰে৷ কেইটামান সাধাৰণ উপসৰ্গ প্ৰায় সকলোৰে মাজত দেখা যায়৷
ডিঙি, কান্ধ, আৰু পিঠিৰ বিষঃ ই সকলোতকৈ সাধাৰণ লক্ষণ৷ বহু সময়ত এই বিষ কান্ধৰ পৰা বাহু পৰ্যন্তও বিয়পি পৰে৷
মূৰৰ বিষঃ স্ক্ৰিণৰ দিশলৈ চাই থকাৰ ফলত চকুত চাপ পৰে আৰু ডিঙিৰ পেশীয়ে কষ্ট পায় ফলত মূৰৰ বিষ, মাইগ্ৰেনৰ সমস্যাই দেখা দিব পাৰে৷
কঁকালৰ বিষঃ দীৰ্ঘক্ষণ ভুল ভংগীত বহি থকাৰ ফলত কঁকালৰ তলৰ অংশত প্ৰচণ্ড বিষ হব পাৰে৷
আঙুলিৰ বিষঃ একেৰাহে কি বোৰ্ড আৰু মাউছ ব্যৱহাৰৰ ফলত কাৰপাল টানেল চিনড্ৰোমৰ দৰে সমস্যাই দেখা দিব পাৰে৷
চকুৰ সমস্যাঃ চকু জ্বলাপোৰা কৰা, চকুৰে পানী ওলোৱা বা চকু শুকাই যোৱাৰ দৰে উপসৰ্গও ইয়াৰ অন্তৰ্ভুক্ত৷
হাত-ভৰি ঝিনঝিননিঃ বহু সময়ত স্নায়ুৰ ওপৰত চাপ পৰাৰ কাৰণে হাত বা ভৰি অৱশ বোধ বা ঝিনঝিননি হব পাৰে৷
কিয় হয় এই সমস্যা?
ইয়াৰ আঁৰত প্ৰধানত চাৰিটা কাৰণ দায়ী৷ প্ৰথমতে ভুল শাৰীৰিক ভংগী৷ বিশেষকৈ কম্পিউটাৰৰ দিশে আওঁজি কাম কৰাৰ কাৰণে টেক নেক তৈয়াৰ হয়৷ যিয়ে ডিঙিৰ শিৰাৰ ওপৰত মাৰাত্মক চাপ সৃষ্টি কৰে৷ দ্বিতীয়তে দীৰ্ঘক্ষণ গতিহীন থকাৰ ফলত ৰক্ত সঞ্চালন ব্যাহত হয় আৰু পেশী সংকুচিত হয়৷ তৃতীয়তে চকী আৰু ডেস্কৰ উচ্চতা সঠিক নথকা৷ চতুৰ্থতে মানসিক চাপ, যিয়ে আমাৰ ডিঙি আৰু কান্ধৰ পেশীসমূহক টান কৰি তোলে আৰু বিষ বঢ়ায়৷
প্ৰতিকাৰ আৰু প্ৰতিৰোধৰ উপায়
বিশেষজ্ঞসকলৰ মতে, জীৱনশৈলীত সামান্য কিছু পৰিবৰ্তন আনিলেই এই সমস্যৰ পৰা মুক্তি পোৱা সম্ভৱ৷
সঠিক ভংগীত বহাঃ চকীত বহাৰ সময়ত ককাল পোনাই বহক৷ কম্পিউটাৰ মনিটৰ যেন চকুৰ পৰা বেছি ওপৰত নাথাকে, এনেকৈ ৰাখক যাতে ডিঙি ওপৰলৈ উঠাই আপুনি মনিটৰ চাব নালাগে৷ ভৰি দুখন মাটিত সমানভাৱে ৰাখক৷
নিয়মিত বিৰতিঃ প্ৰতি এঘণ্টাৰ অন্তৰে অন্তৰে পাঁচ মিনিটৰ বাবে চকীৰ পৰা উঠি খোজ কাঢ়ক৷ চকুৰ আৰামৰ বাবে ২০-২০-২০ নিয়ম মানি চলক৷ অৰ্থাৎ প্ৰতি ২০ মিনিট অন্তৰে অন্তৰে স্ক্ৰিণৰ পৰা চকু আঁতৰাই ২০ ফুট দূৰৈৰ কোনো বস্তুৰ দিশে কমেও ২০ ছেকেণ্ড চাওক৷
সাধাৰণ ব্যায়ামঃ কামৰ মাজত ডিঙি বা কান্ধ ঘুৰোৱাৰ দৰে পাতল ব্যায়াম কৰক৷ হাত আৰু ভৰিৰ পতা ঘুৰোৱা বা সহজ ষ্ট্ৰেছিঙে পেশীক ভালে ৰখাত সহায় কৰে৷
কামৰ বাহিৰৰ জীৱনশৈলীঃ সপ্তাহত অন্তত তিনিৰ পৰা চাৰিদিন পাতল ব্যায়াম, যোগাসন বা সাঁতোৰৰ অভ্যাস কৰক৷ ই পেশীক সচল আৰু শক্তিশালী ৰখাত সহায় কৰে৷ পৰ্যাপ্ত টোপনি আৰু প্ৰদাহনাশক খাদ্য যেনে ফল আৰু পাচলি খাদ্যতালিকাত যোগ কৰক৷
বিশেষজ্ঞৰ সাহায্য লওকঃ বিষ যদি দীৰ্ঘস্থায়ী হয় বা সহ্যৰ বাহিৰলৈ যায় তেতিয়া অৱহেলা নকৰি ফিজিঅ’থেৰাপিষ্ট বা অস্থিৰোগ বিশেষজ্ঞৰ পৰামৰ্শ লওক৷
প্ৰযুক্তিয়ে আমাৰ জীৱনক সহজ কৰিছে ঠিকেই, কিন্তু তাৰ সৈতে আহিছে নতুন কিছু স্বাস্থ্যগত চেলেঞ্জো৷ এই অফিচ চিনড্ৰোম তাৰেই অন্যতম উদাহৰণ৷ সেয়ে শৰীৰৰ সৰু সৰু সংকেতক অৱহেলা নকৰি, সচেতন হোৱাই বুদ্ধিমানৰ কাম, নহ’লে এই সমস্যা ভৱিষ্যতে ডাঙৰ কোনো ৰোগৰ কাৰণ হৈ উঠিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
