বলিউডৰ অভিনেত্ৰী সমীৰা ৰেড্ডীয়ে শেহতীয়াকৈ এটা সাক্ষাৎকাৰত চলচ্চিত্ৰ উদ্যোগৰ এক তিতা সত্যৰ বিষয়ে খোলাখুলিকৈ প্ৰকাশ কৰিছে। তেওঁ প্ৰকাশ কৰিছে যে, শৰীৰ বৰণ শ্যামবৰণীয়া হোৱাৰ বাবে কেৰিয়াৰৰ আৰম্ভণিতে কেনেদৰে বৰ্ণবৈষম্যৰ সন্মুখীন হ’বলগীয়া হৈছিল। সমীৰা ৰেড্ডী স্পষ্টভাষী মন্তব্যৰ বাবে সুপৰিচিত। যদিও তেওঁ বৰ্তমান চলচ্চিত্ৰৰ পৰা কিছু দূৰত আছে, তথাপিও ছ’চিয়েল মিডিয়াৰ জৰিয়তে অনুৰাগীসকলৰ সৈতে নিয়মীয়াকৈ সংযোগ ৰাখে। শেহতীয়া এক সাক্ষাৎকাৰত তেওঁ চলচ্চিত্ৰ উদ্যোগত প্ৰচলিত বৰ্ণবৈষম্য আৰু সৌন্দৰ্যৰ নিৰ্ধাৰিত মানদণ্ডৰ ওপৰত মুকলিকৈ মত প্ৰকাশ কৰে।
তেওঁ জনায় যে, নিজৰ প্ৰথম ছবি ‘মেনে দিল তুঝকো দিয়া’ৰ শ্বুটিঙৰ সময়ত তেওঁক প্ৰকৃত দেহৰ বৰণতকৈ ২-৩ তৰপ শ্বেড কৰি বেছি বগাকৈ দেখুওৱা হৈছিল। এই ছবিখনত তেওঁ অভিনেতা ছোহেইল খানৰ সৈতে অভিনয় কৰিছিল। যিহেতু ছোহেইল খানৰ গাৰ ৰং যথেষ্ট উজ্বল আছিল, সেয়েহে তেওঁকো উজ্বলতা কৰি দেখুৱাবলৈ গধুৰ মেকআপ ব্যৱহাৰ কৰা হৈছিল। কেৱল গাৰ বৰণৰ বাবেই নহয়, প্ৰথম ছবিখনত তেওঁ বডি শ্বেমিঙৰো সন্মুখীন হৈছিল।
গোটেই শৰীৰতেই কৰিছিল মেক আপ
এক সাক্ষাৎকাৰত সমীৰাই কয় যে, তেওঁক এনে ফাউণ্ডেচন ব্যৱহাৰ কৰিবলৈ কোৱা হৈছিল যি তেওঁৰ প্ৰকৃত দেহৰ বৰণতকৈ ২-৩ শ্বেড পাতল আছিল। ইয়াৰ ফলত বহু সময়ত তেওঁৰ মুখখন ধূসৰ বা নিষ্প্ৰাণ যেন দেখা গৈছিল। মুখ আৰু শৰীৰৰ ৰং একে যেন দেখুৱাবলৈ তেওঁ গোটেই শৰীৰতে মেকআপ কৰিবলগীয়া হৈছিল। তেওঁ কয় যে, কেৱল চলচ্চিত্ৰ উদ্যোগতেই নহয়, বহু ছোৱালীয়ে নিজৰ ঘৰতো গাৰ ৰং বা ওজনৰ বাবে নানা ধৰণৰ মন্তব্য আৰু কটুক্তিৰ সন্মুখীন হয়।
সমীৰাৰ মতে, এনে মন্তব্যই যিকোনো ব্যক্তিৰ আত্মবিশ্বাসত গভীৰ প্ৰভাৱ পেলায়। তেওঁ কয় যে, পৰ্দাত তেওঁ এনে এক ভাবমূৰ্তি উপস্থাপন কৰিবলগীয়া হৈছিল, যি তেওঁৰ প্ৰকৃত পৰিচয় আৰু চিন্তাধাৰাৰ সৈতে একেবাৰেই মিল নাছিল। নিজৰ প্ৰকৃত সত্তাক সম্পূৰ্ণৰূপে গ্ৰহণ কৰিবলৈ আৰু সেই পৰিস্থিতিৰ পৰা ওলাই আহিবলৈ তেওঁৰ প্ৰায় ২০ বছৰ সময় লাগিছিল।
বডি শ্বেমিঙৰো সন্মুখীন
সমীৰাই আৰু লগতে কয় যে, কেৰিয়াৰৰ আৰম্ভণিৰ দিনবোৰত তেওঁ সদায় পেডেড ব্ৰা, বাম পেড আৰু ৰঙীন কণ্টেক্ট লেন্স ব্যৱহাৰ কৰিছিল। আনকি কষ্টিউম ডিজাইনাৰসকলেও তেওঁৰ চেহেৰাত বিভিন্ন পৰিৱৰ্তন আনিবলৈ পৰামৰ্শ দিছিল। বহু সময়ত তেওঁক কোৱা হৈছিল যে কেৱল পেড ব্যৱহাৰ কৰিলেই নহ’ব, শৰীৰত কিছুমান স্থায়ী পৰিৱৰ্তনো কৰিব লাগে। এনে ধৰণৰ মন্তব্যই ক্ৰমে তেওঁৰ আত্মবিশ্বাস যথেষ্ট হ্ৰাস কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
