অসম লাইভ ২৪ : হোৱাটছএপ ব্যৱহাৰকাৰীৰ বাবে গুৰুত্বপূৰ্ণ এই খবৰ। হোৱাটছএপৰ নতুন প্ৰাইভেচি আপডেট গ্ৰহণ নকৰা ব্যৱহাৰকাৰীসকলে ১৫ মে’ৰ পৰা এপটো ব্যৱহাৰ কৰিব নোৱাৰিব। হোৱাটছএপৰ শেহতীয়া প্ৰাইভেচি পলিচি আপডেটক লৈ বিতৰ্কৰ সূত্ৰপাত ঘটিছিল যদিও নিজৰ স্থিতিত অটল আছে এই মেছেঞ্জাৰটো। জানুৱাৰী মাহতে হোৱাটছএপে জনাইছিল যে ৮ ফেব্ৰুৱাৰীৰ পূৰ্বে ব্যৱহাৰকাৰীসকলে নতুন প্ৰাইভেচি পলিচি গ্ৰহণ নকৰিলে তেওঁলোকৰ হোৱাটছএপ বিকল হৈ যাব। কিন্তু বিষয়টো লৈ বিভিন্ন পক্ষৰ আশংকাৰ বাবে নতুন প্ৰাইভেচি পলিচি বলৱতৰ অন্তিম দিন ১৫ মে’লৈ পিছুৱাই দিছিল হোৱাটছএপে। শেহতীয়াকৈ প্ৰকাশ পোৱা মতে ১৫ মে’ৰ পূৰ্বে ব্যৱহাৰকাৰীসকলক হোৱাটছএপে নতুন টাৰ্মছ অব ছাৰ্ভিচ ব্যৱহাৰ কৰাৰ বাবে লাহে লাহে সুধিব যাতে ব্যৱহাৰকাৰীসকলে হোৱাটছএপৰ সকলো সুবিধা পাই থাকে। যিসকল ব্যৱহাৰকাৰীয়ে নতুন পলিচি গ্ৰহণ নকৰে তেওঁলোকে কিছুদিনৰ বাবে কল আৰু নটিফিকেচন পাই থাকিব কিন্তু মেছেজ পঢ়িব বা মেছেজ প্ৰেৰণ কৰিব নোৱাৰিব। হোৱাটছএপৰ শেহতীয়া প্ৰাইভেচি পলিচিৰ দ্বাৰা ব্যৱহাৰকাৰীৰ ব্যক্তিগত তথ্য আহৰণ কৰি সেয়া ফেচবুকৰ সৈতে শ্বেয়াৰ কৰিব পাৰে বুলি অভিযোগ উঠিছিল। এই অভিযোগৰ প্ৰত্যুত্তৰত হোৱাটছএপে প্ৰকাশ কৰিছিল যে এয়া মিছা খবৰ। এই বিষয়ত সজাগতা সৃষ্টিৰ বাবে হোৱাটছএপে নিজাকৈ ব্যৱস্থাও গ্ৰহণ কৰিছে। হোৱাটছএপত ছাট উইণ্ডোৰ ওপৰত সৰুকৈ এটা বেনাৰৰ ব্যৱস্থা কৰা হৈছে। ইয়াৰ জৰিয়তে ব্যৱহাৰকাৰীসকলক নতুন প্ৰাইভেচি পলিচি সন্দৰ্ভত সৱিশেষ জনোৱা হ’ব। ব্যৱহাৰকাৰীসকলে প্ৰথমতে এই পলিচি চাই ল’ব পাৰিব আৰু গ্ৰহণ কৰিব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
