বয়সো ইমান কম নহয়৷ ৫৯ বছৰ৷ পৃথিৱীৰ পৰা ৰাওনা হোৱাৰ সময়ত ওজন আছিল ৬৩ কিঃগ্ৰাঃ৷ কিন্তু এতিয়া এয়া কি দশা? চকু গাঁতত সোমাইছে, শৰীৰ শীৰ্ণকায়৷ দেখিয়েই লাগে হাঁড়ে-ছালে লাগি থকা কংকাল৷ সঁচাকৈয়ে মহাকাশত ভালে নাই নেকি সুনীতা উইলিয়ামছ? বিগত কিছুদিন ধৰি নেটদুনীয়াত এইধৰণৰ প্ৰশ্ন উঠিছে৷
কোনো কোনোৱে সামাজিকমাধ্যমত লিখিছে, সুনীতাৰ শৰীৰ নিশ্চয় সুস্থ নহয়৷ ৫ জুনত ফ্লৰিডাৰ পৰা সুনীতা আৰু তেওঁৰ নভোশ্চৰ সংগী বুচ উইলমোয়ে মহাকাশলৈ যাত্ৰা কৰিছিল৷ মিছন আছিল ৮দিনৰ৷ কিন্তু স্পেছচিপ বেয়া হোৱাৰ বাবে বিগত পাঁচ মাহ ইণ্টাৰনেশ্ব্যনেল স্পেছ ষ্টেচনত দুয়ো আৱদ্ধ হৈ আছে৷ আৰু কিছুদিন দুয়ো মহাকাশতেই থাকিব লাগিব৷ ২৫ৰ ফেব্ৰুৱাৰী মাহত পৃথিৱীৰ পৰা ইলন মাস্কৰ স্পেছ এক্সৰ ৰকেটত উঠি সুনীতা আকৌ পৃথিৱীলৈ উভতি আহিব বুলি আশা কৰা হৈছে৷
কিন্তু প্ৰশ্ন আন এটাহে৷ স্পেছ ষ্টেচনত পৰ্যাপ্ত পানী আৰু খাদ্য পাইছেনে? খাদ্যৰ অভাৱত সুনীতা ৰোগীয়া হৈছে নেকি? এইসকলো প্ৰশ্নৰ মুখত পৰি নাছাই দাবী কৰিছে সুনীতা সম্পূৰ্ণ সুস্থ হৈ আছে৷ পৃথিৱীৰ পৰা দৈনিক তেওঁৰ স্বাস্থ্য পৰীক্ষা কৰি থকা হৈছে৷ মাৰ্কিন মহাকাশ গৱেষণা সংস্থাৰ বিবৃত্তি অনুসৰি সুনীতা আৰু বুচে কমেও ৮ঘণ্টা শুৱে৷ তেওঁলোকৰ ওজন যাতে কমি নাযায় তাৰবাবে দৈনিক পিৎজা, চিকেন ৰোষ্ট, চিঙৰা আৰু টুনা মাছৰ ওপৰিও শস্যদানা জাতীয় খাদ্যৰ আৰু নানান চুপ দিয়া হৈছে৷ এইসমূহ খাদ্য আমেৰিকাৰ হিউষ্টনৰ জনছন স্পেছ চেণ্টাৰৰ স্পেছ ফুড চিষ্টেম লেবৰটৰিত তৈয়াৰ কৰা হৈছিল৷ সকলো নিখুতভাৱে পৰীক্ষা কৰাৰ পাছতেই স্পেছচিপত খাদ্য পঠিওৱা হৈছে৷
এতিয়া হয়তো কোনো কোনোৱে ক’ব মহাকাশত পিৎজা? ইছৰোৰ এগৰাকী প্ৰাক্তন বিজ্ঞানীয়ে জনাইছে যে মহাকাশত খোৱাৰ বাবে পিৎজা এনেকৈ তৈয়াৰ কৰা হয় যাতে ৰুটিৰ গুড়ি নাথাকে৷ কাৰণ ৰুটিৰ গুঁড়ি থাকিলে মহাকাশত ভাঁহে৷ সেই গুঁড়ি মহাকাশচাৰীসকলৰ নাকে মুখে সোমাই বাধা আনিব পাৰে৷ সেয়ে স্পেছ ষ্টেচনৰ ফুড মেনুত নিমখ, গোলমৰিছো দিয়া নহয়৷
নাছাই জনাইছে যে সুনীতাৰ বাবে দৈনিক দিয়া হৈছে ১ কিঃগ্ৰাঃ ৭০০ গ্ৰাম খাদ্য৷ মহাকাশচাৰীসকলৰ প্ৰত্যেককেই দিনে এক গেলন পানী দিয়া হয়৷ ৫৩০ গেলন পানীৰ টেংক আছে মহাকাশ ষ্টেচনত৷ ফলত পানীৰ অভাৱ নহয়৷ মহাকাশত ঠিকে থাকিলেও দীৰ্ঘদিন মহাকাশত থকাৰ ফলত বডি ফ্লুইড সকলো মূৰত জমা হৈছে৷ ফলত শৰীৰৰ তুলনাত মূৰটো ডাঙৰ দেখা গৈছে৷ ফলত তেওঁক ৰোগীয়া দেখা গৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
