প্ৰবীণ অভিনেতা নানা পাটেকাৰৰ আজি পুৱা ৫:২০ বজাত মৃত্যু হয়। মৃত্যুৰ সময়ত তেওঁৰ বয়স আছিল ৭৫ বছৰ। গোৱাৰ ডোনা পৌলাত থকা নিজ বাসগৃহত থকা অৱস্থাত তেওঁৰ হৃদযন্ত্ৰৰ ক্ৰিয়া বন্ধ হৈ পৰে। ইয়াৰ পিছতে তেওঁক ততাতৈয়াকৈ ওচৰৰ মণিপাল হাস্পতাললৈ লৈ যোৱা হয়।
সংবাদ সংস্থা ANIৰ প্ৰতিবেদন অনুসৰি, হাস্পতালখনে এই ঘটনাক মেডিকো-লিগেল কেছ বা MLC হিচাপে পঞ্জীয়ন কৰিছে। লগতে মৰণোত্তৰ পৰীক্ষা কৰাৰ কথাও প্ৰকাশ কৰা হৈছে। ইয়াৰ পিছতে স্বাভাৱিকভাৱেই এটা প্ৰশ্ন উত্থাপন হৈছে—যদি চিকিৎসকে প্ৰথমে হৃদযন্ত্ৰৰ ক্ৰিয়া বন্ধ হোৱাক মৃ*ত্যুৰ কাৰণ বুলি উল্লেখ কৰিছে, তেন্তে MLC কিয় কৰা হ’ল? ইয়াৰ অৰ্থ এইটোৱেই নেকি নানা পাটেকাৰৰ মৃ*ত্যু সন্দেহজনক? MLC পঞ্জীয়ন কৰা মানেই মৃ*ত্যু সন্দেহজনক বা কোনো অপৰাধ সংঘটিত হৈছে বুলি নুবুজায়।
MLC আচলতে কি?
MLC অৰ্থাৎ Medico-Legal Case (মেডিকো-লিগেল কেছ) হৈছে এনে এক চিকিৎসা-আইনী প্ৰক্ৰিয়া, য’ত কোনো ব্যক্তিৰ অসুস্থতা, আঘাত বা মৃ*ত্যুৰ সৈতে জড়িত তথ্য ভৱিষ্যতে আইনীভাৱে পৰীক্ষা কৰাৰ প্ৰয়োজন হ’ব পাৰে। এনে ক্ষেত্ৰত চিকিৎসালয়ে কেৱল চিকিৎসাৰ ৰেকৰ্ডেই প্ৰস্তুত নকৰে, প্ৰয়োজন অনুসৰি আৰক্ষীকো অৱগত কৰে। ৰোগী চিকিৎসালয়লৈ অহাৰ সময়ত তেওঁৰ অৱস্থা কেনে আছিল, কি চিকিৎসা কৰা হৈছিল, চিকিৎসাৰ সময়ত কি ঘটিছিল আৰু মৃ*ত্যুৰ সৈতে জড়িত আন তথ্যসমূহো নথিভুক্ত কৰি ৰখা হয়। বিশেষকৈ কোনো ব্যক্তিৰ মৃ*ত্যু চিকিৎসালয়ৰ বাহিৰত, যেনে ঘৰত বা আন কোনো স্থানত হোৱা আৰু তাৰ পিছত মৃ*ত বা সংকটজনক অৱস্থাত হাস্পতাললৈ অনা হ’লে আইনী প্ৰক্ৰিয়াৰ অংশ হিচাপে MLC পঞ্জীয়ন কৰাৰ প্ৰয়োজন হ’ব পাৰে।
MLC মানেই সন্দেহজনক মৃ*ত্যু নেকি?
এইটো বুজি পোৱাটো অতি গুৰুত্বপূৰ্ণ যে MLC মানেই সন্দেহজনক মৃ*ত্যু নহয়। MLC পঞ্জীয়ন কৰাৰ মূল উদ্দেশ্য হৈছে মৃ*ত্যুৰ পৰিস্থিতি আৰু চিকিৎসা-সংক্রান্ত তথ্যসমূহ আনুষ্ঠানিকভাৱে নথিভুক্ত কৰা। ইয়াৰ জৰিয়তে পৰৱৰ্তী সময়ত প্ৰয়োজন হ’লে চিকিৎসা আৰু আইনী দুয়োটা দিশৰ পৰা ঘটনাটো পৰীক্ষা কৰিব পৰা যায়। সেয়েহে কোনো ঘটনাত MLC কৰা হৈছে বুলি ক’লেই তাত অপৰাধ, ষড়যন্ত্ৰ বা ফাউল প্লে আছে বুলি ধৰি ল’ব নোৱাৰি। নানা পাটেকাৰৰ ক্ষেত্ৰতো তেওঁৰ মৃ*ত্যু ঘৰত সংঘটিত হোৱাৰ পিছত তেওঁক হাস্পতাললৈ অনা হৈছিল। এনে পৰিস্থিতিত চিকিৎসালয়ে আইনী প্ৰক্ৰিয়াৰ অংশ হিচাপে MLC পঞ্জীয়ন কৰিব পাৰে।
মৰণোত্তৰ পৰীক্ষা কিয় কৰা হয়?
মৰণোত্তৰ পৰীক্ষা কেৱল অপৰাধৰ তদন্তৰ বাবেই কৰা নহয়। ইয়াৰ এটা গুৰুত্বপূৰ্ণ উদ্দেশ্য হৈছে মৃ*ত্যুৰ প্ৰকৃত চিকিৎসা-কাৰণ অধিক স্পষ্টভাৱে নিৰ্ধাৰণ কৰা। মৰণোত্তৰ পৰীক্ষাৰ সময়ত চিকিৎসকে মৃ*তদেহৰ বাহ্যিক আৰু আভ্যন্তৰীণ অৱস্থা পৰীক্ষা কৰে। প্ৰয়োজন হ’লে বিভিন্ন অংগ বা তেজ আদি নমুনাও সংৰক্ষণ কৰি পৰীক্ষাৰ বাবে পঠিয়াব পাৰে। ইয়াৰ পিছত মৰণোত্তৰ পৰীক্ষাৰ প্ৰতিবেদনত মৃ*ত্যুৰ কাৰণ সম্পৰ্কে চিকিৎসকৰ মতামত দিয়া হয়। সেয়েহে কোনো ব্যক্তিৰ মৃ*ত্যুৰ প্ৰাৰম্ভিক কাৰণ হিচাপে হৃদযন্ত্ৰৰ ক্ৰিয়া বন্ধ বুলি উল্লেখ কৰা হ’লেও মৰণোত্তৰ পৰীক্ষাৰ পিছত সেই কাৰণ অধিক চিকিৎসাবিজ্ঞানসন্মতভাৱে নিশ্চিত কৰিব পৰা যায়।
নানা পাটেকাৰৰ ক্ষেত্ৰত কি হ’ব?
নানা পাটেকাৰৰ ক্ষেত্ৰত চিকিৎসকে প্ৰাথমিকভাৱে হৃদযন্ত্ৰৰ ক্ৰিয়া বন্ধ হোৱাৰ কথা উল্লেখ কৰিছে। তেওঁক প্ৰায় ৪৫ মিনিট ধৰি চিপিআৰ কৰিও পুনৰুজ্জীৱিত কৰিব পৰা নগ’ল। আনহাতে, তেওঁৰ পুত্ৰ মালহাৰ পাটেকাৰেও তেওঁৰ মৃ*ত্যু প্ৰাকৃতিক কাৰণত হোৱা বুলি উল্লেখ কৰিছে। অৱশ্যে MLC পঞ্জীয়ন কৰা হৈছে আৰু মৰণোত্তৰ পৰীক্ষা হোৱাৰ পিছতহে মৃ*ত্যুৰ কাৰণ সম্পৰ্কে চূড়ান্ত চিকিৎসা-প্ৰতিবেদন স্পষ্ট হ’ব।
গতিকে মূল কথাটো কি?
নানা পাটেকাৰৰ মৃত্যুত MLC পঞ্জীয়ন কৰা হৈছে বুলি কোৱা কথাটোৱে নিজে কোনো সন্দেহজনক মৃ*ত্যু বা অপৰাধৰ কথা প্ৰমাণ নকৰে। বিশেষকৈ ঘৰত মৃ*ত্যু হোৱাৰ পিছত হাস্পতাললৈ অনা ঘটনাত আইনী প্ৰক্ৰিয়া অনুসৰি MLC আৰু মৰণোত্তৰ পৰীক্ষা হ’ব পাৰে। সেয়েহে মৰণোত্তৰ পৰীক্ষাৰ চূড়ান্ত প্ৰতিবেদন প্ৰকাশ নোপোৱালৈকে নানা পাটেকাৰৰ মৃ*ত্যুক লৈ কোনো অপৰাধ বা ষড়যন্ত্ৰৰ অনুমান কৰাটো উচিত নহয়। বৰ্তমান উপলব্ধ তথ্য অনুসৰি তেওঁৰ মৃ*ত্যুৰ প্ৰাথমিক কাৰণ হৃদযন্ত্ৰৰ ক্ৰিয়া বন্ধ হোৱা আৰু পৰিয়ালৰ ফালৰ পৰাও প্ৰাকৃতিক মৃ*ত্যুৰ কথাই কোৱা হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
