ভাৰতত বিভিন্ন ধৰ্মীয় ৰীতি-নীতি তথা উৎসৱ পাৰ্বনত মিঠাইৰ গুৰুত্ব অপৰিসীম। বিভিন্ন পূজা, বিৱাহ অনুষ্ঠান আদিত ব্যৱহাৰ হোৱা বিভিন্ন মিঠাই যেনে পেড়া, বৰ্ফী, কাজু কাটলী, বুন্দিয়াৰ লাডু আদিত ৰূপৰ দৰে চিকমিকাই থকা পাতল তৰপ এটা ব্যৱহাৰ কৰা আপুনি নিশ্চয় দেখিছে, যাক Silver Foil বুলি কোৱা হয়। বৰ্তমান সময়ত আমি সকলোৱে কাৰখানাত নিৰ্মিত সহজতে উপলব্ধ Silver Foilৰ ব্যৱহাৰ কৰিলেও ভাৰতীয় সংস্কৃতিত প্ৰাচীন কালৰে পৰাই ইয়াৰ ব্যৱহাৰ আছিল। আজিৰ দৰে সহজে উপলব্ধ Silver Foil তেতিয়াৰ দিনত নাথাকিলেও বিশেষভাৱে নিৰ্মিত ৰূপৰ পাতল কাপোৰৰ দৰে প্লেট ব্যৱহাৰ কৰিছিল।
বহুতেই মিঠাইৰ প্ৰতিষ্ঠানসমূহে দেখিবলৈ ধুনীয়া লাগিবৰ বাবে ইয়াক ব্যৱহাৰ কৰা বুলি ভাবে। কিন্তু এই Silver Foilৰ ব্যৱহাৰৰ ফলত মিঠাইসমূহ দেখিবলৈ ধুনীয়া লগাৰ উপৰিও ইয়াৰ আছে বহু পুৰণি পৰম্পৰাগত ভাৰতীয় সংস্কৃতি আৰু বৈজ্ঞানিক ভিত্তি। এই Silver Foilৰ ব্যৱহাৰৰ ফলত বহু সময়লৈ মিঠাইসমূহ নষ্ট নোহোৱাকৈ থাকে। অৱশ্যে Silver Foilৰ এই গুণ বহুতেই জানে। Silver Foil বা ৰূপত এবিধ বিশেষ গুণ বা বৈশিষ্ট্য থাকে যাৰ ফলত ইয়াৰ ব্যৱহাৰে মিঠাইসমূহক বহু সময়লৈ খোৱাৰ বাবে উপযোগী কৰি ৰাখে। Silver Foilত এণ্টি-বেক্টেৰিয়েল গুণ থাকে। যাৰ সহায়ত খাদ্য নষ্ট কৰিব পৰা বেক্টেৰিয়াই সহজে এনেধৰণৰ বিশেষকৈ গাখীৰৰ দ্বাৰা প্ৰস্তুত কৰা মিঠাই নষ্ট কৰিব নোৱাৰে। প্ৰাচীন কালত যিসময়ত ৰেফ্ৰিজৰেটৰৰ উদ্ভাৱন হোৱাই নাছিল তেতিয়া এনেদৰে গাখীৰেৰে প্ৰস্তুত বিভিন্ন ধৰণৰ মিঠাই কিছুদিনলৈ নষ্ট নোহোৱাকৈ ৰাখিবলৈ ভাৰতত এনেদৰে ঘৰতে নিৰ্মিত Silver Foil ব্যৱহাৰ কৰিছিল। ইয়াৰ উপৰিও আৰ্য়ুবেদ আৰু ধাৰ্মিক মান্যতা অনুসৰি ৰূপক শুদ্ধ, শীতল, পৱিত্ৰতাৰ প্ৰতীক হিচাপে গণ্য কৰা হয়। এনেদৰে Silver Foil ব্যৱহাৰে মানসিক সন্তুলন বজাই ৰখাত সহায় হয় বুলি আৰ্য়ুবেদত মান্যতা আছে।
এই প্ৰতিবেদনটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
