বিৰাট ক’হলিয়ে অৱসৰ গ্ৰহণ কৰিলে টেষ্ট ক্ৰিকেটৰ পৰা৷ ১৪ বছৰ ভাৰতৰ হৈ বগা জাৰ্ছি পিন্ধা বিৰাটে আৰু নিপিন্ধে সেই জাৰ্ছি৷ টেষ্ট ক্ৰিকেটৰ পৰা বিদায় লোৱাৰ ক্ষণত কোহলীয়ে অনুষ্কা শৰ্মাক নিজৰ এগৰাকী আটাইতকৈ বিশ্বাসী সমৰ্থক বুলিও জনাইছে৷ কঠিন সময়ত কেনেকৈ অনুষ্কা তেওঁৰ কাষত থিয় দি আছিল সেই কথাও জনাইছে বিৰাটে৷ কোহলিৰ অৱসৰৰ পাছতেই মুখ খুলিছে অনুষ্কাইয়ো৷ কোহলিক আৱেগঘন বাৰ্তা দিছে অনুষ্কাই৷
সামাজিক মাধ্যমত এখন ছবি শ্বেয়াৰ কৰিছে অনুষ্কাই৷ তাতেই দেখা গৈছে দুয়ো হাঁহিমুখে আছে৷ কোহলিয়ে টেষ্ট ক্ৰিকেটৰ জাৰ্ছি পিন্ধি আছে৷ অনুষ্কাই সেই ফটোৰ সৈতে লিখিছে কেইশাৰীমান বাক্য৷ তেওঁ লিখিছে, ‘তেওঁলোকে ৰেকৰ্ড আৰু মাইলফলকক লৈ কথা ক’ব৷ কিন্তু মই মনত ৰাখিম চকুপানী, যি তুমি কাৰো সন্মুখত দেখুওৱা নাছিলা৷ সেই সকলো যুঁজ যি যুঁজ অন্যই দেখা নাছিল৷ মনত ৰাখিম এই ফৰমেটক য’ত তুমি তোমাৰ সম্পূৰ্ণ ঢালি দিছা৷ মই জানো এই খেলৰ বাবেই তুমি কিমান ত্যাগ কৰিছা৷ প্ৰতিখন টেষ্ট চিৰিজৰ পাছত তুমি উভতি আহিছা পূৰ্বতকৈ অধিক পৈণত হৈ, অধিক নম্ৰ হৈ৷ এই সময়বোৰৰ, তোমাৰ পৰিবৰ্তনৰ মই সাক্ষী হৈ আছো৷’
সোমবাৰে সামাজিক মাধ্যমত এটা পোষ্ট কৰি টেষ্ট ক্ৰিকেটক বিদায় দিয়াৰ কথা জনাইছে কোহলিয়ে৷ তেওঁ লিখিছে, ‘১৪ বছৰ পূৰ্বে প্ৰথম টেষ্ট ক্ৰিকেটৰ নীলা টুপি পিন্ধিছিলো৷ সঁচা কথা ক’বলৈ গলে তেতিয়া নাজানিছিলো, ক্ৰিকেটৰ এই ফৰমেটত মই কিমান দূৰ আগুৱাই যাম৷ কল্পনাও কৰা নাছিলো এই জীৱনৰ৷ এই ফৰমেটে মোৰ পৰীক্ষা লৈছে৷ মোক শক্তিশালী কৰিছে৷ মোক শিক্ষা দিছে৷ গোটেই জীৱন এই শিক্ষা বহন কৰিম৷’ তেওঁ আকৌ লিখিছে, ‘বগা পোছাকত খেলাৰ মাজত কিছু ব্যক্তিগত গভীৰ বিষয় থাকে৷ শান্ত পৰিবেশ, দীৰ্ঘ সময়জুৰি খেলা, সৰু সৰু মুহূৰ্তসমূহ কোনেও দেখা নাপায়৷ এইসমূহেই চিৰকাল মোৰ সংগী হৈ থাকিব৷’
কোহলিয়ে জনাইছে অৱসৰৰ সিদ্ধান্ত লোৱা সহজ নাছিল৷ তেওঁ লিখিছে, ‘ক্ৰিকেটৰ এই ফৰমেটৰ পৰা বিদায় লোৱা সহজ নহয়৷ কিন্তু সিদ্ধান্ততো সঠিক বুলি ভাৱিছো৷ মই মোৰ সকলোবোৰ এই ফৰমেটৰ বাবেই দিছো৷ যি আশা কৰিছিলো তাতকৈ বহু বেছি পাইছো৷ কৃতজ্ঞতাৰে ভৰা হৃদয়েৰে মই বিদায় লৈছো৷ যিসকলৰ সৈতে মেচ ভগাই লৈছো এই যাত্ৰাপথত হাতে হাত ধৰি আগুৱাইছো, সহায় পাইছো সকলোৰে ওচৰত মই কৃতজ্ঞ৷ সকলো সময়ত হাঁহিমুখে নিজৰ টেষ্টজীৱনৰ ক্ষণবোৰ উভতি চাম৷ ২৬৯ নম্বৰ টুপিৰ যাত্ৰা শেষ হ’ল৷’ লেখাৰ শেষত কোহলিয়ে দিছে ভালপোৱাৰ এটা ইমোজি৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
