ছ’চিয়েল মিডিয়া ব্যৱহাৰ কৰা নাবালক-নাবালিকাৰ অধিকাৰ আৰু সুৰক্ষাক লৈ উচ্চতম ন্যায়ালয়ে কেন্দ্ৰীয় চৰকাৰক এক গুৰুত্বপূৰ্ণ বিষয় পৰীক্ষা কৰিবলৈ নিৰ্দেশ দিছে। আদালতে কেন্দ্ৰ চৰকাৰক এই কথা বিবেচনা কৰিবলৈ কৈছে যে, ছ’চিয়েল মিডিয়া প্লেটফৰ্মসমূহে যাতে নাবালকৰ ক্ষেত্ৰত ভাৰতীয় আইন বাধ্যতামূলকভাৱে পালন কৰে।
লগতে সংশ্লিষ্ট বিষয় সন্দৰ্ভত আইনীভাৱে বাধ্যতামূলক ব্যৱস্থা প্ৰৱৰ্তন কৰা উচিত নেকি সেই বিষয়েও বিবেচনা কৰাৰ নিৰ্দেশ দিয়ে। এই বিষয়টো Just Rights for Children Alliance নামৰ সংগঠন এটাই দাখিল কৰা এখন আবেদনৰ শুনানিৰ সময়ত উত্থাপন হয়। সংগঠনটোৱে অনলাইন প্লেটফৰ্মত নাবালকৰ সুৰক্ষা নিশ্চিত কৰাৰ বাবে অধিক কঠোৰ আৰু কাৰ্যকৰী আইনী ব্যৱস্থাৰ দাবী জনাইছে।
শুনানিৰ সময়ত জ্যেষ্ঠ অধিবক্তা এইচ এছ ফুলকাই আদালতৰ সন্মুখত যুক্তি আগবঢ়ায় যে বৰ্তমানৰ আইন অনুসৰিও নাবালকৰ দ্বাৰা কৰা চুক্তিৰ আইনী বৈধতা নথকাৰ কথা উল্লেখ কৰা হৈছে। সেয়েহে ছ’চিয়েল মিডিয়া আৰু অন্যান্য অনলাইন মধ্যস্থতাকাৰী প্লেটফৰ্মসমূহৰ ওপৰত নাবালকৰ ক্ষেত্ৰত স্পষ্ট আৰু আইনগতভাৱে বলবৎ কৰিব পৰা দায়িত্ব আৰোপ কৰাৰ প্ৰয়োজন আছে বুলি তেওঁ যুক্তি দিয়ে।
বিশেষকৈ, ১৮ বছৰ বয়স সম্পূৰ্ণ নকৰা ব্যক্তিয়ে নিজাববীয়াকৈ কোনো ছ’চিয়েল মিডিয়া প্লেটফৰ্মৰ সৈতে ব্যৱহাৰকাৰী চুক্তিত প্ৰৱেশ কৰিব পাৰিব নে নোৱাৰে, সেই বিষয়টোও গুৰুত্ব লাভ কৰিছে। শুনানিৰ সময়ত ন্যায়াধীশ জয়মাল্য বাগচীয়ে কয় যে নাবালকৰ সুৰক্ষাৰ বাবে এনে ব্যৱস্থা কেৱল পৰামৰ্শ বা গাইডলাইন হিচাপে সীমাবদ্ধ থাকিব নালাগে। ইয়াক আইনী ৰূপ বা “statutory format” দিয়াৰ বিষয়টো কেন্দ্ৰীয় চৰকাৰে বিবেচনা কৰা উচিত বুলি আদালতে মত প্ৰকাশ কৰে। অৰ্থাৎ, ছ’চিয়েল মিডিয়া কোম্পানীসমূহে নাবালকৰ ক্ষেত্ৰত নিৰ্দিষ্ট নিয়ম মানি চলাটো যাতে কেৱল স্বেচ্ছামূলক ব্যৱস্থা হৈ নাথাকে, তাৰ বাবে সেই নিয়মসমূহক আইনগত বাধ্যবাধকতাৰ আওতালৈ অনাৰ সম্ভাৱনা পৰীক্ষা কৰিবলৈ আদালতে কেন্দ্ৰক কৈছে।
কেন্দ্ৰীয় চৰকাৰৰ হৈ ছলিচিটৰ জেনেৰেল তুষাৰ মেহতাই আদালতক জনায় যে চৰকাৰে বিষয়টো পৰীক্ষা কৰিব আৰু প্ৰয়োজনীয় পদক্ষেপ গ্ৰহণ কৰিব। ইয়াৰ ফলত আগন্তুক সময়ত ছ’চিয়েল মিডিয়া প্লেটফৰ্মসমূহত নাবালকৰ একাউণ্ট খোলা, ব্যৱহাৰকাৰী চুক্তি আৰু অনলাইন সুৰক্ষাৰ ক্ষেত্ৰত অধিক স্পষ্ট আৰু কঠোৰ নিয়ম আহিব পাৰে নে নাই, সেই বিষয়ে চৰকাৰৰ পৰৱৰ্তী সিদ্ধান্ত গুৰুত্বপূৰ্ণ হৈ পৰিছে।
বৰ্তমান সময়ত শিশুসকলেও বিভিন্ন ছ’চিয়েল মিডিয়া আৰু অনলাইন প্লেটফৰ্ম ব্যাপকভাৱে ব্যৱহাৰ কৰে। এনে পৰিস্থিতিত তেওঁলোকৰ ব্যক্তিগত তথ্য, অনলাইন সুৰক্ষা আৰু প্লেটফৰ্মৰ সৈতে হোৱা চুক্তিগত সম্পৰ্কক লৈ আইনী স্পষ্টতা অত্যন্ত গুৰুত্বপূৰ্ণ। উচ্চতম ন্যায়ালয়ৰ এই পৰ্যবেক্ষণৰ মূল উদ্দেশ্য হৈছে—নাবালকৰ বাবে থকা আইনী সুৰক্ষা যাতে কেৱল কাগজত থকা নিয়ম হৈ নাথাকে, বৰং অনলাইন প্লেটফৰ্মসমূহৰ ওপৰতো কাৰ্যকৰী আৰু বলবৎ কৰিব পৰা দায়িত্ব থাকে। সেয়েহে, এতিয়া কেন্দ্ৰীয় চৰকাৰে বিষয়টো কেনেদৰে পৰীক্ষা কৰে আৰু Intermediary Rules-ৰ অধীনত নাবালকৰ বাবে নতুন কোনো আইনগত ব্যৱস্থা প্ৰৱৰ্তন কৰে নে নকৰে, সেয়া লক্ষ্যণীয় হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
