মহাৰাষ্ট্ৰৰ থানেত জন্মদিন উদযাপনৰ মাজতে সংঘটিত এক কৰুণ ঘটনাই সকলোকে শোকস্তব্ধ কৰিছে। ৰাজপথত অনুষ্ঠিত জন্মদিনৰ পাৰ্টিৰ বাবে অবৈধভাৱে বিদ্যুৎ সংযোগ লোৱাৰ অভিযোগ উঠিছে। সেই তাঁৰত লাগি বিদ্যুৎস্পৃষ্ট হৈ এগৰাকী ৬৬ বছৰীয়া মহিলাৰ মৃ*ত্যু হয়। ঘটনাটো থানেৰ শাস্ত্ৰী নগৰ অঞ্চলত সংঘটিত হৈছে। মৃ*ত মহিলাগৰাকীৰ নাম সুৱৰ্ণা ডংগ্ৰে। আৰক্ষীৰ তথ্য অনুসৰি, ৰাজপথত জন্মদিন উদযাপনৰ বাবে মঞ্চ আৰু পোহৰৰ ব্যৱস্থা কৰা হৈছিল। অভিযোগ অনুসৰি, মঞ্চৰ লাইট আৰু অন্যান্য বৈদ্যুতিক সঁজুলি চলাবলৈ অনুমতি নোলোৱাকৈ ষ্ট্ৰীট লাইটৰ খুঁটাৰ পৰা বিদ্যুৎ সংযোগ লোৱা হৈছিল।
জানিব পৰা মতে, জন্মদিনৰ অনুষ্ঠানৰ বাবে বিদ্যুৎ সংযোগ কৰাৰ পাছত তাঁৰসমূহ পথৰ ওপৰত পৰি থকা অৱস্থাত আছিল। অভিযোগ অনুসৰি, তাঁৰ সংযোগ কৰাৰ সময়ত প্ৰয়োজনীয় সুৰক্ষা ব্যৱস্থাও গ্ৰহণ কৰা হোৱা নাছিল। ইফালে, শাস্ত্ৰী নগৰ বাছ ষ্টপেজ নম্বৰ ৮ৰ পৰা ঘৰলৈ উভতি আহিছিল সুৱৰ্ণা ডংগ্ৰে। সেই সময়তে পথত পৰি থকা বিদ্যুতৰ তাঁৰত তেওঁৰ ভৰি লাগে। তাঁৰত বিদ্যুৎ প্ৰবাহ হৈ থকাৰ বাবে মহিলাগৰাকী তীব্ৰভাৱে বিদ্যুৎস্পৃষ্ট হয় আৰু পথতে ঢলি পৰে। ঘটনা সংঘটিতৰ পিছতে ওচৰৰ লোকসকলৰ মাজত হুৱাদুৱা লাগে।
ঘটনাৰ পাছত মৃ*ত মহিলাগৰাকীৰ পুত্ৰ আনন্দ ডংগ্ৰেই আৰক্ষীৰ ওচৰত এজাহাৰ দাখিল কৰে। তেওঁৰ অভিযোগৰ ভিত্তিত বর্তকনগৰ আৰক্ষীয়ে জন্মদিনৰ অনুষ্ঠানটোৰ আয়োজক হৰ্শল চৌধুৰীৰ বিৰুদ্ধে গোচৰ ৰুজু কৰিছে। আৰক্ষীয়ে ঘটনাটোৰ বিভিন্ন দিশ তদন্ত কৰি আছে। ৰাজহুৱা পথত জন্মদিনৰ অনুষ্ঠান অনুষ্ঠিত কৰিবলৈ অনুমতি লোৱা হৈছিল নেকি, বিদ্যুৎ সংযোগ কেনেদৰে লোৱা হৈছিল আৰু সংযোগৰ ক্ষেত্ৰত সুৰক্ষা বিধি মানি চলা হৈছিল নেকি—এই সকলো বিষয় আৰক্ষীয়ে পৰীক্ষা কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
