নিৰ্বাচন আহে নিৰ্বাচন যায়, ক্ষমতাই মুখ সলাই, কেতিয়াবা থকাজনেই ক্ষমতাত থাকিও যায়, কিন্তু পৰিবেশক লৈ যি উদাসীনতা সেই উদাসীনতাৰ ছবিহে সলনি নহয়৷ প্ৰদূষণ বাঢ়িয়েই থাকে৷ প্ৰদূষণৰ সমান্তৰালকৈ বাঢ়ি থাকে বিশ্ব উষ্ণায়নো৷ এইসমূহৰ মাজতেই কেলেণ্ডাৰৰ পাতত আকৌ উভতি আহে ৫ জুন৷ বিশ্ব পৰিবেশ দিৱস৷ সমগ্ৰ দুনীয়াৰ সমস্ত মানুহৰ পৰিবেশক লৈ সচেতন কৰি তোলাৰ দিন বিশ্ব পৰিবেশ দিৱস৷
এই বছৰৰ বিশ্ব পৰিবেশ দিৱসৰ থিম হৈছে, ‘Our land. Our future. We are #GenerationRestoration’. দায়িত্ব ল’ব লাগিব নতুন প্ৰজন্মই, পৰিবেশ সুন্দৰ কৰি ৰখাৰ দায়িত্ব, এই পৃথিৱীক বাসোপযোগী কৰি ৰখাৰ দায়িত্ব হাতত তুলি লব লাগিব নতুন প্ৰজন্মই৷ ১৯৭২ চনত ‘ষ্টকহোম কনফাৰেন্স অন হিউমেন এনভায়ৰণমেণ্টে ৫জুনৰ দিনটোক বিশ্ব পৰিবেশ দিৱস হিচাপে বাচি লৈছিল৷ ১৯৭৩ চনত প্ৰথমবাৰ উদযাপিত হয় বিশ্ব পৰিবেশ দিৱস৷ শ্লোগান আছিল, ‘অনলি ৱান আৰ্থ৷’ ষ্টকহোম কনফাৰেন্সৰ পৰা ইউনাইটেড নেশ্বনছ এনভায়ৰনমেণ্ট প্ৰগ্ৰেম বা UNEP নামেৰে এখন আন্তৰ্জাতিক মঞ্চও তৈয়াৰ কৰা হয়৷ বিগত ৫১ বছৰ ধৰি পালিত হৈ আহিছে বিশ্ব পৰিবেশ দিৱস৷
গ্লৱেল ৱাৰ্মিং অৰ্থাৎ বিশ্ব উষ্ণায়ণৰ ফলত ক্ৰমশ সমুদ্ৰৰ জলস্তৰ বাঢ়িছে৷ হিমবাহ গলিছে, তাপমাত্ৰাই পূৰ্বৰ ৰেকৰ্ড ভংগ কৰিছে৷ কঠিন পৰিস্থিতি অচিৰেই আহি আছে বুলিও পৰিবেশ বিজ্ঞানীয়ে বাৰে বাৰে সতৰ্ক কৰিও আছে৷ বিশ্ব উষ্ণায়ণৰ যুগ পাৰ কৰি এইবাৰ পৃথিৱী প্ৰৱেশ কৰিছে গ্লৱেল বয়েলিং যুগলৈ৷ এই আশংকাৰ কথা আমি কোৱা নাই৷ এই কথা প্ৰকাশ কৰিছে ৰাষ্ট্ৰপুঞ্জৰ প্রধান এণ্টেনিঅ’ গুটেৰেছে৷
এক গৱেষণাই কৈছে যে উত্তৰ গোলাৰ্ধত ২০২৩ চনৰ গ্ৰীষ্মকাল আছিল উষ্ণতম৷ পৃথিৱী সৃষ্টিৰ ২০০০ বছৰৰ পাছত এই উষ্ণায়ণ৷ ইফালে প্লাষ্টিক প্ৰদূষণৰ খবৰ দৈনিক প্ৰকাশ হৈছে৷ সমুদ্ৰৰ তলদেশত তৈয়াৰ হৈছে প্লাষ্টিকৰ পাহাৰ৷ পানীত তলত থকা প্ৰাণীৰ শৰীৰত পোৱা গৈছে প্লাষ্টিকৰ অংশ৷ বিশ্ব উষ্ণায়ণৰ কথাও অজানা নহয়৷ বিশ্বজুৰি তাপমাত্ৰা বাঢ়িছে, মেৰু প্ৰদেশত বৰফ গলিবলৈ আৰম্ভ কৰিছে৷ প্ৰতি বছৰৰ তাপমাত্ৰা পূৰ্বতকৈ বাঢ়ি আছে৷ বনাঞ্চল ক্ৰমশ ধ্বংস হৈ আছে৷ বনাঞ্চল ধ্বংসৰ কাৰণেই নিশ্চিহ্ন হৈ গৈছে বহু প্ৰজাতিৰ জীৱ৷ ফলত ক্ৰমশ কমি গৈছে জৈৱ বৈচিত্ৰ৷ মুঠতে পৃথিৱী ভালে নাই৷ কেৱল নিজৰ জাগতিক চৌপাশ এৰি পৰিবেশৰ কথাও ভাৱো তেতিয়াহে হয়তো প্ৰকৃতিয়ে অলপমানকৈ হ’লেও ঘূৰাই পাব উশাহ৷ আমালৈকো উভতাই দিব ভালপোৱা৷
শ্য়ামলা এই পৃথিৱীৰ য’ত প্ৰাণৰ সঞ্চাৰ, এই সকলোবোৰক সামৰিয়েই জৈৱ বৈচিত্ৰ, সেই জৈৱ বৈচিত্ৰৰ সৈতে পাহাৰ, নদী, মৰুভূমি, জংঘল সকলোবোৰ সামপি আমাৰ পৰিবেশ৷ পৰিবেশ প্ৰদূষণৰ প্ৰভাৱ আমাৰ স্বাস্থ্যৰ ওপৰত পৰিব ধৰিছে৷ জটিল ৰোগে বাহ বান্ধিছে শৰীৰত৷ মনতো অসুখে বান্ধিছে বাঁহ৷ পৃথিৱীৰ লক্ষ কোটি প্ৰাণ নিশব্দে হেৰাই গৈছে চিৰদিনৰ বাবে৷ আমি ইমানেই স্বাৰ্থপৰ যে আমাৰ বাদে পৃথিৱীৰ কোন প্ৰজাতি হেৰাই গৈছে সেই বিষয়টোক লৈ আমি একেবাৰেই উদাসীন৷ আমি এবাৰলৈকেও ভৱা নাই যে জৈৱ বৈচিত্ৰ অবিহনে আমিও বাচি থকা সম্ভৱ হৈ নাথাকিব এই পৃথিৱীত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
