আন্তঃৰাষ্ট্ৰীয়ভাৱে পৰিচিত WWE তাৰকা দ্য গ্ৰেট খালি ওৰফে দলীপ সিং ৰাণা, বানপীড়িত লোকসকলৰ সহায়ৰ বাবে অসমত উপস্থিত হৈছে। উজনি অসমৰ বানত ক্ষতিগ্ৰস্ত পৰিয়ালসমূহৰ কাষত থিয় দি তেওঁ সাহায্য আগবঢ়াবলৈ আহিছে বুলি জানিব পৰা গৈছে। দ্য গ্ৰেট খালি ডিব্ৰুগড়ৰ মোহনবাৰী বিমানবন্দৰত উপস্থিত হয়। বিমানবন্দৰৰ পৰা তেওঁ শিৱসাগৰৰ দৰিকালৈ ৰাওনা হয়। দৰিকাত বানত ক্ষতিগ্ৰস্ত পৰিয়ালসমূহৰ মাজত সাহায্য সামগ্ৰী বিতৰণৰ বাবে উপস্থিত হৈছে দ্য গ্ৰেট খালিয়ে। এই যাত্ৰাপথত মৰাণৰ Pacifica Innত তেওঁ কিছু সময়ৰ বাবে জিৰণি লয়।
অসম Live24 সৈতে হোৱা এক চুটি সাক্ষাৎকাৰত দ্য গ্ৰেট খালিয়ে কয় যে-বিপদৰ সময়ত অসহায় মানুহৰ কাষত থিয় দিয়াটো প্ৰতিগৰাকী ব্যক্তিৰ দায়িত্ব। বানপানীৰ দৰে সংকটৰ সময়ত মানুহে মানুহৰ বাবে আগবাঢ়ি আহিব লাগে বুলিও তেওঁ বাৰ্তা দিয়ে। এই সাহায্য অভিযান True Hope Foundation, Ayan Foundation আৰু কণ্ঠশিল্পী দীপলিনা ডেকা ফাউণ্ডেচনৰ সহযোগত আয়োজন কৰা হৈছে। দৰিকাৰ প্ৰায় ৪০০ৰ পৰা ৫০০টা বানপীড়িত পৰিয়ালৰ বাবে অত্যাৱশ্যকীয় সামগ্ৰী যোগান ধৰাৰ ব্যৱস্থা কৰা হৈছে। বানপীড়িত লোকসকলৰ বাবে বিছনা, কম্বল, গাৰু আৰু পানী পৰিশোধন কৰা ফিল্টাৰ আদি সামগ্ৰী প্ৰস্তুত কৰা হৈছে। বানৰ ফলত বহু পৰিয়ালৰ দৈনন্দিন জীৱন ব্যাহত হৈ পৰাৰ সময়ত এই সামগ্ৰীয়ে তেওঁলোকক কিছু সকাহ দিব বুলি আশা কৰা হৈছে।
উল্লেখ্য যে গ্ৰাম্য অঞ্চলৰ সাধাৰণ মানুহৰ প্ৰতি দ্য গ্ৰেট খালিৰ বিশেষ মৰম আৰু আগ্ৰহ আছে। সেই বাবেই এইবাৰো বানপীড়িত অসমৰ লোকসকলৰ সহায়ৰ বাবে তেওঁ নিজে আগবাঢ়ি আহিছে। দ্য গ্ৰেট খালি দুদিনীয়া কাৰ্যসূচীৰে অসমলৈ আহিছে। এই সময়ছোৱাত তেওঁ বানপীড়িত লোকসকলৰ সৈতে মত বিনিময় কৰাৰ লগতে সাহায্য বিতৰণৰ কাৰ্যসূচীত অংশ ল’ব। কেৱল নিজেই সহায় আগবঢ়োৱাই নহয়, সমগ্ৰ দেশৰ চলচ্চিত্ৰ, ক্ৰীড়া আৰু সাংস্কৃতিক জগতৰ তাৰকাসকলকো অসমৰ বানপীড়িত লোকসকলৰ কাষত থিয় দিবলৈ আহ্বান জনাইছে দ্য গ্ৰেট খালিয়ে। সংকটৰ সময়ত সকলোৱে নিজৰ সামৰ্থ্য অনুসৰি সহায় আগবঢ়ালে বানপীড়িত পৰিয়ালসমূহে কিছু সকাহ লাভ কৰিব বুলি তেওঁ আশা প্ৰকাশ কৰে। দ্য গ্ৰেট খালিৰ এই পদক্ষেপে অসমৰ বানপীড়িত লোকসকলৰ প্ৰতি দেশৰ বিভিন্ন প্ৰান্তৰ লোকৰ সহানুভূতি আৰু সহায়ৰ বাৰ্তা কঢ়িয়াই আনিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
