সাগৰ তলিত শুবৰে মন বুলি গীতত কণ্ঠ নিগৰাইছিল জুবিনে৷ জুবিনৰ সেই কামনাই যেন পূৰণ হ’ল৷ সাগৰ তলিতেই শেষ হৈ গ’ল সেই সুৰীয়া সত্বা৷ কোটি কোটি অনুৰাগীক কন্দুৱাই সাগৰ তলিতেই বিদায় ল’লে জুবিনে৷ এই দুখবৰ ছিংগাপুৰৰ পৰা আহিছে বিদেশ ৰাজ্যিক মন্ত্ৰী পবিত্ৰ মাৰ্ঘেৰিটালৈ। খবৰটো প্ৰায়েই শোকস্তদ্ধ হৈ পৰিছিল পবিত্ৰ মাৰ্ঘেৰিটা। আনুষ্ঠানিকভাৱে ছিংগাপুৰ বিদেশ মন্ত্ৰালয়ৰ পৰা দিয়া হৈছিল জুবিন গাৰ্গৰ উশাহ স্তব্ধ হোৱাৰ খবৰ৷ পবিত্ৰ মাৰ্ঘেৰিটাই প্ৰথম এই খবৰ দিছিল মুখ্যমন্ত্ৰীক। শোকস্তদ্ধ হৈ পৰিছিল মুখ্যমন্ত্ৰীও। বি টি চিৰ নিৰ্বাচনী প্ৰচাৰত ব্যস্ত মুখ্যমন্ত্ৰীয়ে লগে লগেই বাতিল কৰিছে সকলো অনুষ্ঠান৷ মুখ্যমন্ত্ৰীয়ে এই খবৰ পায়েই লিখিছে, জুবিন নোহোৱা হোৱাৰ দুখতকৈনো ডাঙৰ দুখ আৰু কি হ’ব পাৰে?
ৰাজ্যত এই খবৰ বিয়পি পৰাৰ পাছত শোকত ভাগি পৰিছে গুণমুদ্ধ। সকলোৰে চকুত কেৱল চকুপানী। বিশ্বাস কৰিব পৰা নাই এই দুঃখবৰ। জুবিনৰ মৃত্যু হৈছে ১৯ছেপ্টেম্বৰ, শুকুৰবাৰে ভাৰতীয় সময় অনুসৰি আবেলি ২.৪৫বজাত। হাঁহি হাঁহি ঘৰৰ পৰা ওলাই যোৱা জুবিন আৰু জীৱন্তে উভতি নাহে অসমলৈ৷ এই খবৰে সকলোকে ভাঙি পেলাইছে৷ বহু অনুৰাগীয়ে কান্দি কান্দি এটাই প্ৰাৰ্থনা কৰিছে এই খবৰ মিছা হওক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
