অসম লাইভ ২৪ঃ এখন ফটো। ফটোখন সাম্প্ৰতিক সময়ত এক চৰ্চিত ফটো। ফটোখনক লৈ ছ’চিয়েল মিডিয়াত ব্যাপক বিতৰ্ক। ফটোখনত দেখা গৈছে অভিনেত্ৰী কংগনা ৰাণাৱটৰ সৈতে হাতত সুৰাৰ বটল লৈ এজন পুৰুষক। পুৰুষজন ডন আবু চালেম! শেহতীয়াভাৱে মহাৰাষ্ট্ৰৰ শিৱসেনাৰ সৈতে সমুখ-সমৰত অৱতীৰ্ণ হৈছিল অভিনেত্ৰী কংগনা। মুম্বাইত থকা কংগনাৰ অফিচত চলিছিল বি এম চিৰ বুলড’জাৰ। তাৰ পাছতে বাকযুদ্ধ শিৱসেনা আৰু কংগনা ৰাণাৱটৰ। বিতৰ্কৰ পাছতে মুম্বাই এৰি মানালিৰ নিজৰ বাসগৃহত আশ্ৰয় লৈছিল কংগনা ৰাণাৱটে। ঠিক তেনে সময়তে কংগনাৰ ভাইৰেল ফটোখনে বিতৰ্কৰ সৃষ্টি কৰিছিল। ফটোখনক লৈ ব্যাপক ট্ৰ’লৰ সন্মুখীন হৈছিল কংগনা। অৱশ্যে পাছত ওলাল উৰহি গছৰ ওৰ। হাতত সুৰাৰ বটল লৈ থকা ব্যক্তিজন দেখাত হুবহু ডন আবু চালেমৰ নিচিনা যদিও তেওঁ প্ৰকৃততে এজন সাংবাদিক। নাম মাৰ্ক মেনুৱেল। মুম্বাইৰ এগৰাকী বিশিষ্ট সাংবাদিক মাৰ্ক। ২০১৭ চনত ফটোখন তোলা হৈছিল। কংগনাৰ ‘ছিমৰন’ ছবিৰ প্ৰ’ম’ছনৰ সময়ত সাংবাদিকগৰাকীৰ সৈতে ফটো উঠিছিল কংগনাই। উল্লেখ্য, ১৯৯৩ চনত মুম্বাই বিস্ফোৰণত প্ৰধান অপৰাধী আবু চালেম বৰ্তমান জে’লত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
