অসম লাইভ ২৪ঃ ক’ৰোনাৰ কবলত ‘জলসা’। বিগ বিৰ বাসগৃহ জলসাত ক’ৰোনা সংক্ৰমণ। প্ৰথমে আক্ৰান্ত হ’ল অমিতাভ বচ্চন। তাৰ পাছত ক’ৰোনা পজিটিভ পুত্ৰ অভিষেক বচ্চন। বিগ বিৰ দৰে অভিষেক বচ্চনেও ছ’চিয়েল মিডিয়াৰ জৰিয়তে জনালে ক’ভিড পজিটিভ হোৱাৰ কথা। লগতে সমূহ অনুৰাগীক চিন্তিত নহ’বৰ বাবেও জনাইছে দুয়োয়ে। ক’ৰোনাৰ সামান্য উপসর্গ শৰীৰত দেখা দিয়াৰ বাবে তেওঁলোক দুয়ো নানাৱতী হাস্পতালত ভর্তি হৈছে। পৰিয়ালৰ আনসকল অর্থাৎ ঐশ্বর্যৰায় বচ্চন, জয়া বচ্চনেও ক’ভিড-১৯ৰ পৰীক্ষা কৰিছে। অৱশ্যে দুয়োৰে ফলাফল নিগেটিভ। অভিষেক-ঐশ্বর্যৰ কণমানি সন্তান আৰাধ্যাৰো ৰিপোর্ট নিগেটিভ। ছ’চিয়েল মিডিয়াৰ জৰিয়তে অমিতাভ বচ্চনে সকলোকে অনুৰোধ ধৰিছে বিগত দহ দিনত তেওঁলোকৰ সংস্পর্শলৈ যিসকল লোক আহিছে তেওঁলোক আটায়ে যেন ক’ৰোনা পৰীক্ষা কৰায়। অমিতাভ, অভিষেকৰ এই খবৰে এতিয়া বলিউডৰ লগতে ছ’চিয়েল মিডিয়া তোলপাৰ লগাইছে। দুয়োৰে স্বাস্থ্যক লৈ উদ্বিগ্ন দেশৰ অনুৰাগী। দুয়োৰে স্বাস্থ্যৰ উন্নতি কামনা অনুৰাগীৰ। মহাৰাষ্ট্ৰৰ স্বাস্থ্য মন্ত্ৰীয়ে জনাইছে অমিতাভ বচ্চন বর্তমান সুস্থ। উল্লেখযোগ্য যে ক’ৰোনাৰ এই সময়ছোৱাত ঘৰতে আছিল অমিতাভ বচ্চন। ঘৰত থাকিয়েই ভিডিঅ’ শ্বুট কৰিছিল বিগ বিয়ে। বিগ বিগয়ে শেহতীয়াকৈ অভিনয় কৰি আছিল ‘ব্ৰহ্মাস্ত্ৰ’ত। য’ত আলিয়াভাট আৰু ৰণবীৰ কাপুৰেও অভিনয় কৰিছে। অমিতাভ বচ্চনৰ দুটাকৈ বাসগৃহ জলসা আৰু প্ৰতীক্ষা প্ৰশাসনে ছেনিটাইজ কৰিছে। ভাৰতত ক’ৰোনা আক্ৰান্ততৰ তালিকাৰ প্ৰথম স্থানত আছে মহাৰাষ্ট্ৰ। শনিবাৰে মহাৰাষ্ট্ৰত ২ লাখ ৩৮ হাজাৰ লোক ক’ৰোনাত আক্ৰান্ত হৈছে। মৃত্যুৰ সংখ্যা হৈছেগৈ ৯,৮৯৩ গৰাকী। অমিতাভ-অভিষেকৰ পূর্বে কৰণ জহৰ, জাহ্নবী কাপুৰ ক’ৰোনাত আক্ৰান্ত হৈছিল। অভিনেত্ৰী ৰেখাৰ ঘৰত এগৰাকী পৰিচাৰিকা ক’ৰোনাত আক্ৰান্ত হোৱাত ৰেখাৰ বাসগৃহও চীল কৰি দিয়া হৈছে। মুঠতে এতিয়া বলীউডত ক’ৰোনাতংক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
