ৰণবীৰ সিং, সঞ্জয় দত্ত, আৰু মাধবনৰ দৰে তাৰকাৰ ভিৰতো ধুৰন্ধৰ-২ ছবিৰ এক দৃশ্যই দৰ্শকৰ মনত চাপ পেলাইছে৷ ছবিৰ একেবাৰে শেষ দৃশ্যত দেখা গৈছে অটোচালকক৷ বাস্তৱতো তেওঁ এজন অটোচালক৷ নাম বদৰুল ইছলাম৷ কিন্তু ট্ৰেজেডি এটাই যে সেই ছবিয়ে দেশজুৰি ৰেকৰ্ড গঢ়িলেও ছবিখন প্ৰেক্ষাগৃহলৈ চাবলৈ যাবলৈ সামৰ্থ্য নাই অভিনেতাৰেই৷
ছচিয়েল মিডিয়াত ভাইৰেল হোৱা এক ভিডিঅ’ত বদৰুলে কোৱা শুনা গৈছে, ‘মই এতিয়াও নিজৰ ছবিখন ডাঙৰ পৰ্দাত দেখা পোৱা নাই৷ এতিয়া টিকটৰ দাম প্ৰায় ৫০০ টকা৷ মাত্ৰ মুক্তি পাইছে ছবিখন৷ ইমান টকা ক’ত পাম? পাছত কেতিয়াবা সুযোগ আহিলে ছবিখন চাম৷’ বদৰুলৰ এই নিষ্পাপ আৰু সৎ উত্তৰে নেটিজেনৰ মনকো চুই গৈছে৷
বদৰুলক যেতিয়া সোধা হৈছিল যে তেওঁৰ সন্তানে তেওঁক ডাঙৰ পৰ্দাত চাব খোজেনে? তেতিয়া বদৰুলে কয়, ‘ভীষণ আগ্ৰহী মোৰ পৰিয়াল৷ কিন্তু আমি ঘৰত ৫জন সদস্য৷ ৫জনে চিনেমা চাবলৈ গ’লে খৰচ হ’ব ২৫০০ টকা৷ সমগ্ৰ মাহ টানিটুনি মই ইমানখিনি সঞ্চয় কৰিব পাৰোহে৷ সন্তানক লৈ চিনেমা চোৱাৰ বিলাসিতা কৰিব পৰাৰ সাহস মোৰ এতিয়াও নাই৷’
বদৰুলৰ এই ভিডিঅ’ প্ৰকাশ্যে অহাৰ পাছৰে পৰাই পৰিচালক আদিত্য ধৰৰ ওচৰত বহুজনে অনুৰোধ কৰিছে৷ ৰণবীৰ সিং বা সঞ্জয় দত্তক যদি আকাশলংঘী পাৰিশ্ৰমিক দিব পাৰিছে তেন্তে ৯০০ কোটিৰ গণ্ডি পাৰ কৰা এই ছবিৰ পৰিচালকে বদৰুলৰ দৰে সৰু শিল্পীৰ বাবে কিয় এক বিশেষ স্ক্ৰিনিঙৰ ব্যৱস্থা কৰাৰো দাবী কৰিছে অনুৰাগীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
