গীতাৰ পৰা অনুপ্ৰাণিত হৈয়েই পৰমাণু বোমা তৈয়াৰ কৰিছিল! পৰমাণু বোমাৰ সৃষ্টিকৰ্তা অপেনহাইমাৰে কিয় কৈছিল, ‘এই বোমাই মোকো হত্যা কৰিলে।’

অসম লাইভ২৪ঃ ৭৮ বছৰ পূৰ্বে প্রথমবাৰ পৰমাণু বোমাৰ ধ্বংসলীলা দেখিছিল বিশ্বই। ১৯৪৫ চনৰ ৬ আৰু ৯ আগষ্ঠত জাপানৰ হিৰোছিমা আৰু নাগাচাকিত চলিছিল পাৰমাণৱিক আক্ৰমণ। পাৰমাণৱিক বোমা তৈয়াৰ কৰিছিল ৰবাৰ্ট জে অপেনহাইমাৰে। চলিত বছৰৰেই ২১ জুলাইত মুক্তিলাভ কৰিব তেওঁৰ বায়োপিক ‘অপেনহাইমাৰ’এ। ক্ৰিষ্টোফাৰ নোলান পৰিচালিত এই চিনেমাক লৈ তুংগত উঠিছে জল্পনা কল্পনা। কেনে আছিল অপেনহাইমাৰৰ জীৱন ধাৰা? ব্যক্তিগত জীৱনৰ কথাবোৰো তেওঁৰ বায়োপিকত যিহেতু আছে সেয়ে চাবলৈ আগ্ৰহী এতিয়া বহুজন।

পৰিচালক নোলানে এই চিনেমাখনৰ ছাচপেঞ্চ সম্পূৰ্ণৰূপে বজাই ৰাখিছে। ছবিখনত অপেনহাইমাৰৰ বহু অজানা তথ্য থাকিব বুলিহে জনাইছে পৰিচালক নোলানে। নিউ মেক্সিকোৰ লছ আলামোছ লেৱৰটৰীৰ দায়িত্বত আছিল অপেনহাইমাৰ। দ্বিতীয় বিশ্বযুদ্ধৰ সময়ত পৰমাণু বোমা তৈয়াৰ কৰাৰ বাবে মেনহাটন প্ৰকল্প আৰম্ভ কৰিছিল মাৰ্কিন যুক্তৰাষ্ট্ৰই। এই প্ৰকল্পত নিয়োগ কৰা হৈছিল ২০হাজাৰ বিজ্ঞানী। এই বিজ্ঞানীৰ দলটোৰ নেতৃত্ব দিছিল অপেনহাইমাৰে। অপেনহাইমাৰে তৈয়াৰ কৰা এই পৰমাণু বোমাৰ শক্তি হিৰোছিমা-নাগাচাকিৰ লগতে বিশ্বই দেখিছিল। দ্বিতীয় বিশ্বযুদ্ধৰ শেষত আমেৰিকা আৰু ছোভিয়েট ৰাছিয়াৰ মাজত আৰম্ভ হৈছিল শীতল যুদ্ধ। দুই দেশৰ মাজত চলিছিল পাৰমাণৱিক অস্ত্ৰৰ প্ৰতিযোগীতা। অৱশ্যে কোনো দেশেই তাৰপিছত আৰু এই বোমাৰ ব্যৱহাৰ এতিয়ালৈ কৰা নাই।

Father of Atom Bomb অপেনহাইমাৰৰ মূৰত কেনেকৈ এই চিন্তা আহিছিল সেই লৈ আজিও অব্যাহত আছে চৰ্চা। ১৯৪৫ চনৰ ১৬ জুলাইত লছ আলামোছৰ প্ৰায় ৩৪০ কিঃমিঃ দক্ষিণত পৰমাণু বোমা পৰীক্ষা কৰিছিল অপেনহাইমাৰ আৰু তেওঁৰ বৈজ্ঞানিক সংগীসকলে। ইতিহাসত এই ঘটনা ‘ট্ৰিনিটি টেষ্ট’ হিচাপে পৰিচিত। ইয়াৰবাবে কেইবাবছৰ ধৰি অক্লান্ত পৰিশ্ৰম কৰিছিল অপেনহাইমাৰে।

সাম্প্ৰতিক সময়ত চলা এক গৱেষণাত পোহৰলৈ আহিছে যে ভাগৱত গীতাৰ পৰা অনুপ্ৰাণিত হৈছিল এই প্ৰকল্পত জড়িত থকা বিজ্ঞানীসকল। ট্ৰিনিটি টেষ্টৰ পাছতেই ভয়ো খাইছিন অপেনহাইমাৰে। মানৱ সভ্যতা ধ্বংস হৈ যাব বুলি ভয় কৰিছিল অপেনহাইমাৰে। এই প্ৰশ্নই তেওঁক কুটি কুটি খাইছিল। সেই সময়তেই মনক শান্ত কৰিবলৈ গীতাৰ আশ্ৰয় লৈছিল অপেনহাইমাৰে। ১৯৬৫ চনত এক অনুষ্ঠানত বক্তব্য ৰাখিবলৈ গৈ গীতাৰ বাণী উদ্ধৃতি দি ভাষণ আৰম্ভ কৰিছিল অপেনহাইমাৰে।

অপেনহাইমাৰে তেওঁৰ ভাষণত কৈছিল, ‘কুৰুক্ষেত্ৰ যুদ্ধত অৰ্জুনক তেওঁৰ কৰ্তব্য সম্পৰ্কে সোঁৱৰাই দিছিল শ্ৰী কৃষ্ণই। অৰ্জুনক বিশ্বৰূপ দৰ্শণ কৰায় কৃষ্ণই। তেওঁ বুজাইছিল যে, তেওঁ সৃষ্টি আৰু ধ্বংসৰো দেৱতা। এই কথা শ্ৰীকৃষ্ণক কোৱাৰ পাছতেই কৰ্তব্য পালন কৰাৰ পৰা আৰু পিছুৱাই নাহিল অৰ্জূন।’ জাপানৰ পৰমাণু আক্ৰমণক লৈয়ো অপেনহাইমাৰে মন্তব্যত কৈছিল, ‘এই বোমাই মোৰ মনটোকো হত্যা কৰিলে।’ তেওঁৰ সেই উক্তি আজিও প্ৰচলিত। অপেনহাইমাৰৰ প্ৰসংগত মাৰ্কিণ ইতিহাসবীদ জেমছ এ হিজিয়াৰে কয়, ‘বিবেকৰ দংশনতেই ভাগৱত গীতাৰ আশ্ৰয় লৈছিল অপেনহাইমাৰে।’

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ