অসম লাইভ২৪ঃ প্ৰৱল ঘূৰ্ণীবতাহ ‘বিপৰ্যয়’এ বৃহস্পতিবাৰে ভয়ংকৰৰূপ ধাৰণ কৰিছে। শুকুৰবাৰেও বিপৰ্যয়ৰ তাণ্ডৱ অব্যাহত আছে গুজৰাটকে আদি কৰি চুবুৰীয়া কেইবাখনো ৰাজ্যত। ঘূৰ্ণীবতাহৰ সমান্তৰালকৈ ধাৰাসাৰ বৰষুণৰ ফলত ব্যাহত হৈছে জনজীৱনো। মৌছম ভৱনে জনোৱা অনুসৰি শুকুৰবাৰে পুৱাৰে পৰাই ‘বিপৰ্যয়ে’ ভয়াৱহৰূপ লৈছে। দুপৰীয়াৰ ভাগত উত্তৰ পূবৰ দিশতো ‘বিপৰ্যয়’ৰ প্ৰভাৱ পৰিব। সন্ধিয়াৰ ভাগলৈ ৰাজস্থানৰ দিশেৰে আগুৱাব ‘বিপৰ্যয়’। ঘণ্টাত ৭৫-৮৫ কিঃমিঃ বেগত আহিব ‘বিপৰ্যয়’।
বিপৰ্যয়ৰ প্ৰভাৱ জোধপুৰ, জয়ছলমেৰ, পালি আৰু চিৰোহী জিলাতো পৰিব। ৰাজস্থানৰ এই জিলাসমূহত শুকুৰবাৰে ধাৰাসাৰ বৰষুণৰ সম্ভাৱনা আছে। শনিবাৰলৈকে ধাৰাসাৰ বৃষ্টিৰ সম্ভাৱনা আছে। বিপৰ্যয়ৰ মোকাবিলা কৰিবলৈ মুখ্যমন্ত্ৰী অশোক গেহলটে ৰাজ্য প্ৰশাসন, বিপৰ্যয় মোকাবিলা বাহিনীৰ সৈতে উচ্চপৰ্যায়ৰ বৈঠকতো মিলিত হৈছে। প্ৰশাসনে জনাইছে যে ৰাজস্থানে এই দুৰ্যোগৰ সৈতে মোকাবিলা কৰিবলৈ সম্পূৰ্ণৰূপে সাঁজু হৈ উঠিছে। ৰাজ্যবাসীক আতংকিত নহ’বলৈ আহ্বান জনাইছে ৰাজস্থান প্ৰশাসনে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
