অসম লাইভ২৪ঃ তাহানিতেই অসমীয়া সাহিত্যত তেজীমলাৰ কাহিনী লক্ষ্মীনাথ বেজবৰুৱাই লিখিছিল। মাহীমাকৰ অত্যাচাৰে কোঙা কৰা তেজীমলা। সংগীতা দত্তও জানো তেজীমলাৰ মাহীমাকতকৈ ক’ম? আচলতে চৰিত্ৰবোৰ বাস্তৱ জীৱনৰেই ওপৰত আধাৰিত সেই কথাকেই প্ৰমাণ কৰিলে চিকিৎসক দম্পত্তিয়ে। কিমান নিষ্ঠুৰ হ’লে ৩বছৰীয়া কণমানিগৰাকীক এনেদৰে শাস্তি বিহিব পাৰে? মহানগৰীৰ চিকিৎসক দম্পতিৰ শিশু নিৰ্যাতনৰ ঘটনা সমাজখনৰ বাবে অতি পৰিতাপৰ কথা।
কণমানিজনীৰ স্বাস্থ্য পৰীক্ষাৰ অন্তত চিকিৎসকেও প্ৰকাশ কৰিলে যে, কণমানিজনী শাৰীৰিক অত্যাচাৰৰ সন্মুখীন হৈ আহিছে। এয়া এখন সম্ভ্ৰান্ত ঘৰৰ মানৱ সেৱাৰ সৈতে জড়িত কৰ্মীৰ পৰা জানো কোনোবাই আশা কৰিব পাৰে! বিকৃত মানসিকতাৰ এয়া এক চূড়ান্ত উদাহৰণ। এই ঘটনা পোহৰলৈ অহাৰ পাছত সকলোৰে মনত এটাই কথা, আনক মানসিক ৰোগৰ চিকিৎসা কৰা সংগীতাচোন ব্যৱহাৰিক দৃষ্টিত একো একোজন মানসিক ৰোগীতকৈ কম নহয়।
সংগীতা দত্তৰ স্বামী ৱালিউলৰ পাছতেই কালি নিশা গ্ৰেপ্তাৰ হ’লল ডাঃ সংগীতাও। নিশা পানবজাৰ মহিলা থানাৰ লকআপত পাৰ হ’ল। পুৱাই লাল চাহ দুখন বিস্কুট খাই জেৰাৰ বাবে সাজু কৰা হৈছে সংগীতাক। কি কাৰণত সংগীতাই এই কাম কৰিছিল সেয়া হয়তো জেৰাৰ পাছতেই পোহৰলৈ আহিব। তাৰপাছত আৰু বাকী থাকিল কি? শিশুগৰাকীৰ দেহত যি আঘাতৰ চিন পোৱা গৈছে। সেই আঘাতেও বহু কথাই প্ৰকাশ কৰিছে।
ক্ষমতাবান লোকৰ সৈতে প্ৰতিদিনেই উঠা-বহা, সংবাদ মাধ্যমত চিৰিয়াছ কোনো বিষয়ক লৈ আলোচনা, সততে মনোৰোগ বিষয়ক জ্ঞান বিলাই ফুৰা সংগীতাৰ সাৰি যাবলৈ হয়তো বহু বাটেই খোলা আছে। সংগীতাৰ স্বামী ৱালিউলৰ বিৰুদ্ধে ১৯৩/২৩ নম্বৰৰ গোচৰ ৰুজু হৈছে। ভাৰতীয় দণ্ডবিধি ৩০৭/৩২৫/৩৪১/৩৪ ধাৰাত তেওঁলোকৰ বিৰুদ্ধে পল্টনবজাৰ থানাত ৰুজু হোৱা গোচৰৰ উপযুক্ত তদন্ত হ’ব লাগে বুলি ৰাজ্যজুৰি দাবীও উত্থাপিত হৈছে।
নিজৰ সপক্ষে বহু যুক্তি দাঙি ধৰা সংগীতা দত্তই গ্ৰেপ্তাৰৰ পাছত মুখ ঢাকি নিমাতে আছে। স্বামীক গ্ৰেপ্তাৰৰ পাছতেই ওখ দেৱালৰ ভিতৰত সংঘটিত ঘটনাৰ খবৰ আৰু ছবি কেনেকৈ পোহৰলৈ আহিল বুলি প্ৰশ্ন কৰাৰ লগতে এয়া তেওঁলোকক ফচোৱাৰ ষড়যন্ত্ৰও বুলি প্ৰকাশ কৰিছিল সংগীতাই। নিজৰ সপক্ষে যুক্তি দিলেও ভাইৰেল ভিডিঅ’ আৰু কণমানিটিৰ স্বাস্থ্য পৰীক্ষাৰ অন্তত ওলোৱা তথ্যই জানো মিছা কথা কৈছে। সংগীতাৰ বিৰুদ্ধে আৰক্ষীয়ে উচিত তদন্ত চলাবনে? সেই বিষয়টোতহে এতিয়া ৰাজ্যবাসীৰ দৃষ্টি আৱদ্ধ হৈ আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
