অসম লাইভ২৪ঃ মুক্তিৰ আগৰে পৰাই আদিপুৰুষক লৈ চলিছিল বহু চৰ্চা। ছবিখন যিসকলে বৰ্তমানলৈ চোৱা নাই তেওঁলোকৰো মুখে মুখে এতিয়া আদিপুৰুষৰ এটা বিশেষ সংলাপ। আদিপুৰুষত থকা এটা বিশেষ সংলাপ, ‘কাপড়ে তেৰে বাপকি, জ্বলেগি ভি তেরে বাপ কি…’। এই বিশেষ সংলাপটোক লৈয়েই ক্ষুদ্ধ হৈ পৰিছে বহুজন। ভগৱান হনুমানৰ মুখত এনে সস্তীয়া সংলাপ কিয়? বহুতেই এয়া হিন্দু ধৰ্মীয় ভাৱাবেগত আঘাত হনা বুলিও অভিযোগ আনিছিল। জনতাৰ ৰোষত পৰি অৱশেষত সংলাপ লেখকে এই সংলাপ উঠাই লোৱাৰ কথাও প্ৰকাশ কৰিছিল।
হনুমান ভগৱান নহয় দাবী মনোজ মুন্তাছীৰ
আদিপুৰুষৰ সংলাপ লিখি বিতৰ্কত সোমাই পৰা লেখক মনোজ মুন্তাছিৰে বহু স্থানৰ পৰাই প্ৰাণনাশৰ ভাবুকিও লাভ কৰিছে। মুম্বাই আৰক্ষীয়ে লেখক মনোজক নিৰাপত্তাও প্ৰদান কৰিব লগা হোৱাৰ সময়তেই মনোজে আকৌ কৰিছে এটা বিশেষ মন্তব্য। বিতৰ্কত ঘিউ ঢালি মনোজে কৈছে, ‘বজৰংবলীয়েতো শ্ৰী ৰামৰ দৰে কথা নকয়। হনুমান দাৰ্শনিকো নহয়। হনুমান ভগবানো নহয়, তেওঁ এজন ভক্তহে। হনুমানক আমিহে ভগৱান বনাইছো, কাৰণ হনুমানৰ ভক্তিতেই সেই শক্তি আছে।’
আদিপুৰুষত হনুমানৰ মুখত সস্তীয়া সংলাপ
আদিপুৰুষত হনুমানৰ সংলাপ কেইটাক লৈয়েই প্ৰকৃত বিতৰ্ক আৰম্ভ হৈছিল। নেটদুনীয়াত লেখক মনোজৰ বিৰুদ্ধে ক্ষোভৰ উদগীৰণ ঘটিছে। মনোজে শেহতীয়াকৈ কৰা মন্তব্যটোৰ পাছতেই বহুতে লিখিছে, ‘সংলাপ লেখক মনোজে ক্ষমাহে খুজিব লাগিছিল। আকৌ উদ্ভট মন্তব্য কৰিছে।’
কেন্দ্ৰীয় তথ্য-সম্প্ৰচাৰ মন্ত্ৰীৰ প্ৰতিক্ৰিয়া
আদিপুৰুষক লৈ শেহতীয়াভাৱে মন্তব্য কৰিছে কেন্দ্ৰীয় তথ্য সম্প্ৰচাৰ মন্ত্ৰী অনুৰাগ ঠাকুৰে। তেওঁ লিখিছে, ‘এই ছবিক লৈ হিংসাৰহে সৃষ্টি হৈছে। আদিপুৰুষে মানুহৰ ভাৱাবেগত আঘাত হানিছে। নিৰ্মাতাই সংলাপ সলনি কৰাৰ কথা কৈছে কিন্তু মই নিজে এতিয়ালৈ ছবিখন চোৱা নাই। ছবিখন চোৱাৰ পাছতহে মই ব্যৱস্থা কি লোৱা হয় বিবেচনা কৰিম।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
