ক’ভিডকালৰ লকডাউনে বহু মানুহৰ জীৱন সলনি কৰি দিছে। লকডাউনৰ ফলত সৰ্বহাৰা হোৱা এটা পৰিয়ালৰ এজন ১৩ বছৰীয়া কিশোৰৰ কাহিনীয়ে আপোনাকো দিব অনুপ্ৰেৰণা। বৰ্তমান AIৰ যুগত ইয়াৰ সঠিক ব্যৱহাৰেৰেও আপুনি ঘৰত বহিয়েই উলিয়াই ল’ব পাৰে উপাৰ্জনৰ পথ। কলেজৰ কোনো আনুষ্ঠানিক ডিগ্ৰী বা পৰিয়ালসূত্ৰে লাভ কৰা কোনো ব্যৱসায়ৰ পৰা নহয় সম্পূৰ্ণ নিজৰ চেষ্টাৰে এজন ১৯ বছৰীয়া কিশোৰে এনে এক AI ব্যৱসায় গঢ়ি তুলিছে যাৰ পৰা তেওঁ প্ৰতিমাহে প্ৰায় ১ কোটি টকা উপাৰ্জন কৰে। এই সফলতাৰে বৰ্তমান ছ’চিয়েল মিডিয়াত চৰ্চিত হৈ পৰা যুৱকজনৰ নাম আয়ুস সিং। আয়ুস কোনো IIT বা MITৰ স্নাতক নহয়। ক’ভিড-১৯ মহামাৰীৰ সময়ত আয়ুসৰ বয়স আছিল মাত্ৰ ১৩ বছৰ। সেই সময়ত তেওঁৰ পৰিয়াল আৰ্থিক সংকটৰ সন্মুখীন হৈছিল। আয়ুসক কোনো দামী প্ৰতিষ্ঠানত কোচিং কৰাৰ সুবিধা দিব পৰা নাছিল অভিভাৱকে। সেই সময়ত আয়ুসৰ একমাত্ৰ সম্বল আছিল এটা পুৰণি লেপটপ, মাজে মাজে বন্ধ হৈ যোৱা ইণ্টাৰনেট সংযোগ আৰু কিছুমান পুৰণি অনলাইন পাঠ্যক্ৰম। কিন্তু নতুন পাঠ্যক্ৰম শিকাৰ প্ৰতি তেওঁৰ অদম্য আগ্ৰহ আছিল। সেই আগ্ৰহ আৰু অধ্যৱসায়ৰ জৰিয়তে তেওঁ নিজে AIৰ এটা গুৰুত্বপূৰ্ণ অংশ শিকি লয়।
১৪ বছৰ বয়সতেই MIT-এ আয়ুসক কৰিছিল প্ৰশংসা
আয়ুসৰ কঠোৰ পৰিশ্ৰমৰ ফল অতি সোনকালেই প্ৰতিফলিত হৈছিল। কেইমাহমানৰ ভিতৰতে তেওঁ বিদেশী ষ্টাৰ্টআপসমূহৰ সৈতে কাম কৰিবলৈ আৰম্ভ কৰে। আটাইতকৈ আচৰিত কথাটো হ’ল, মাত্ৰ ১৪ বছৰ বয়সত তেওঁৰ দ্বাৰা প্ৰস্তুত কৰা এটা পাঠ্যক্ৰমক বিশ্বৰ অন্যতম সন্মানীয় শিক্ষা প্ৰতিষ্ঠান MIT-এ ভূয়সী প্ৰশংসা কৰিছিল আৰু আনকো সেইটো অধ্যয়ন কৰিবলৈ পৰামৰ্শ দিছিল।
নিজৰ দক্ষতাৰে ইণ্টাৰনেটৰ সহায়ত মাহিলী ১ কোটি টকাকৈ উপাৰ্জন
আৰম্ভণিতে আয়ুসে নিজৰ কামৰ বিনিময়ত বিশেষ উপাৰ্জন কৰিব পৰা নাছিল। কিন্তু তেওঁৰ আয় তেতিয়াহে দ্ৰুতগতিত বৃদ্ধি পায় যেতিয়া তেওঁ কেৱল কোডিং কৰাই নহয়, নিজৰ জ্ঞান আৰু দক্ষতাক সঠিকভাৱে বিশ্বৰ আগত উপস্থাপন আৰু বিক্ৰী কৰিবলৈও শিকিলে। বৰ্তমান আয়ুসে টপমেট প্লেটফৰ্মত AI-সম্পৰ্কীয় প্ৰীমিয়াম পাঠ্যক্ৰম চলাই আছে আৰু বহু যুৱক-যুৱতীক এই ক্ষেত্ৰত প্ৰশিক্ষণ প্ৰদান কৰি আছে।
প্ৰতিভাক ব্যৱসায়ত পৰিণত কৰাৰ শিক্ষা
আয়ুসৰ এই কাহিনীয়ে এটা গুৰুত্বপূৰ্ণ বাৰ্তা দিয়ে, সেয়া হৈছে-ইণ্টাৰনেটত বহু লোকৰ ওচৰত এনে অসাধাৰণ দক্ষতা আছে যিটো শিকিবলৈ আন বহুতে টকা খৰচ কৰিবলৈও সাজু। কিন্তু অধিকাংশই নিজৰ সেই দক্ষতাক ব্যৱসায়ত পৰিণত কৰি উপাৰ্জনৰ পথ সৃষ্টি কৰিব নোৱাৰে। আপুনিও নিজৰ দক্ষতা বিকাশৰ বাবে ইণ্টাৰনেটক ব্যৱহাৰ কৰিব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
