‘লোভেই পাপ পাপেই মৃত্যু’ এই আপ্তবাক্যশাৰী আমাৰ দেশৰ কিছু বিয়াগোম চৰকাৰী বিষয়াৰ ক্ষেত্ৰত সময়ে সময়ে বাৰুকৈয়ে প্ৰযোজ্য হৈ পৰে। লাখ টকাৰ ওচৰত মাহিলী দৰমহা পায়ো তেনে কিছুমান বিষয়াই ক্ষমতাৰ অপব্যৱহাৰেৰে দুৰ্নীতিৰ পাহাৰ গঢ়ে। আজি তেনে এজন দুৰ্নীতিগ্ৰস্ত বিষয়াৰ দুৰ্নীতিৰে গঢ়া সাম্ৰাজ্যত চলিছে ভিজিলেন্সৰ হাতোৰা। উত্তৰ প্ৰদেশ ভিজিলেন্সে আয় অনুপাতে অসামঞ্জস্য সম্পত্তি সঞ্চয়ৰ অভিযোগত ৰাজ্যখনৰ প্ৰাক্তন সহকাৰী আঞ্চলিক পৰিবহণ বিষয়া (ARTO) ললিত কুমাৰৰ লক্ষ্ণৌস্থিত বাসগৃহত বৃহৎ পৰিসৰৰ তালাচী অভিযান চলাই বিপুল পৰিমাণৰ নগদ ধন, সোণ-ৰূপ, হীৰাৰ গহনা আৰু বহু কোটি টকাৰ স্থাৱৰ সম্পত্তিৰ নথি উদ্ধাৰ কৰিছে।
জব্দ ১৩ কিলো সোণ, ৯ কিলো ৰূপ
আদালতে জাৰি কৰা নিৰ্দেশনাৰ ভিত্তিত ৭ আৰু ৮ জুলাইত চলোৱা এই অভিযানত ভিজিলেন্সে ১.৬২ কোটি টকা নগদ ধন, প্ৰায় ১৩ কিলোগ্ৰাম সোণ, ৯ কিলোগ্ৰাম ৰূপ, মূল্যৱান হীৰাৰ অলংকাৰৰ লগতে ৰাজ্যখনৰ বিভিন্ন স্থানত থকা সম্পত্তিৰ নথি জব্দ কৰে। কেৱল উদ্ধাৰ হোৱা সোণ, ৰূপ আৰু অলংকাৰসমূহৰ আনুমানিক মূল্য প্ৰায় ২০ কোটি টকা বুলি ধাৰণা কৰা হৈছে।
ভিজিলেন্সৰ তথ্য অনুসৰি, ২০২৪ চনত ললিত কুমাৰৰ বিৰুদ্ধে দুৰ্নীতি প্ৰতিৰোধ আইনৰ অধীনত আয়তকৈ অধিক সম্পত্তি সঞ্চয় কৰাৰ অভিযোগত গোচৰ ৰুজু কৰা হৈছিল। চৰকাৰৰ নিৰ্দেশ অনুসৰি চলি থকা তদন্তত বহু গুৰুত্বপূৰ্ণ তথ্য পোহৰলৈ অহাৰ পাছত আদালতৰ পৰা তালাচী পৰোৱানা সংগ্ৰহ কৰি লক্ষ্ণৌৰ আলীগঞ্জস্থিত তেওঁৰ বাসগৃহত এই অভিযান চলোৱা হয়। তালাচীৰ সময়ত বাসগৃহৰ পৰা ১.৬২ কোটি টকা নগদ ধনৰ লগতে প্ৰায় ১৩ কিলোগ্ৰাম সোণ, ৯ কিলোগ্ৰাম ৰূপ আৰু বহু মূল্যৱান হীৰাৰ গহনা উদ্ধাৰ কৰা হয়।
বিভিন্ন চহৰত আছে কেইবাটাও ফ্লেট, ভূমি
তদন্তকাৰী বিষয়াসকলে লক্ষ্ণৌ, নয়ডা, বাৰাবংকী আৰু ৰায় বৰে’লিকে ধৰি বিভিন্ন স্থানত থকা আৱাসিক গৃহ, কৃষিভূমি আৰু ফ্লেট বুকিঙৰ সৈতে জড়িত বহু নথি উদ্ধাৰ কৰিছে। প্ৰাৰম্ভিক তদন্ত অনুসৰি এই স্থাৱৰ সম্পত্তিসমূহৰ আনুমানিক মূল্য ১৩ কোটি টকাতকৈ অধিক।
বিলাসী বাহন আৰু ৰিভলভাৰ জব্দ
অভিযানৰ সময়ত বেংক একাউণ্ট, ডাকঘৰ, মিউচুৱেল ফাণ্ড আৰু ফিক্সড ডিপজিটত এক কোটিতকৈ অধিক টকাৰ বিনিয়োগৰ নথিও উদ্ধাৰ হয়। ইয়াৰ উপৰিও এখন টয়োটা ইনোভা আৰু এখন হুণ্ডাই i20 বাহনো জব্দ কৰা হৈছে। তদন্তকাৰী দলে এটা পঞ্জীয়নপ্ৰাপ্ত ৰিভলভাৰো জব্দ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
