চলিত ফিফা বিশ্বকাপৰ Round of 16ত আৰ্জেণ্টিনাৰ হাতত ৩-২ গ’লত পৰাস্ত হোৱাৰ পিছতে ইজিপ্তৰ ফুটবলাৰ মুস্তাফা জিকোৱে ফিফাৰ বিৰুদ্ধে গুৰুতৰ অভিযোগ উত্থাপন কৰিছে। তেওঁৰ দাবী, এইবাৰ সমগ্ৰ টুৰ্ণামেণ্টখনেই ফিক্স কৰা হৈছে আৰু শেষত বিশ্বকাপ আৰ্জেণ্টিনায়ে জিকিব। ৭ জুলাইত অনুষ্ঠিত মেচখনৰ ৭৮ মিনিটলৈকে ইজিপ্তে সম্পূৰ্ণ অধিপত্য বিস্তাৰ কৰি আছিল। প্ৰথমে ইয়াছাৰ ইব্ৰাহিমে গ’ল কৰি দলক আগুৱাই নিয়াৰ পিছত দ্বিতীয়াৰ্ধত মুস্তাফা জিকোৱে আন এটা গ’ল স্ক’ৰ কৰি ব্যৱধান ২-০ কৰে। ইয়াৰ পিছতো ইজিপ্তে তৃতীয়বাৰৰ বাবে গলপষ্টত বল ভৰাইছিল যদিও VARৰ পৰীক্ষাৰ পিছত সেই গ’ল বাতিল কৰা হয়। এই সিদ্ধান্তৰ পিছতেই ক্ষুব্ধ হৈ পৰে জিকো।
মেচ শেষ হোৱাৰ পিছত তেওঁ ৰেফাৰী ফ্ৰাঁছোৱা লেতেক্সিয়েৰ বিৰুদ্ধে পক্ষপাতিত্বৰ অভিযোগ তুলি কয়, ‘ৰেফাৰীৰ সিদ্ধান্ত সম্পূৰ্ণ ভুল। তেওঁ সমগ্ৰ দেশৰ পৰিশ্ৰম নষ্ট কৰি পেলালে।’ ইয়াতেই ক্ষান্ত নাথাকি তেওঁ আৰু কয়, ‘এই বিশ্বকাপ আৰ্জেণ্টিনাকেই দিয়া হৈছে। চেম্পিয়ন হ’বও আৰ্জেণ্টিনাই। ইয়াত ন্যায় নাই, একেবাৰেই ন্যায় নাই। আৰম্ভণিৰ পৰাই ৰেফাৰী আমাৰ বিৰুদ্ধে আছিল। আমাক ২-০ ব্যৱধানত জয়ী হ’বলৈ দিয়া নহ’ল। এইটো স্পষ্ট অন্যায়। সমগ্ৰ টুৰ্ণামেণ্টখন ফিক্স হৈ আছে।’
প্ৰকৃততে মেচখনত কি ঘটিছিল?
প্ৰথমাৰ্ধত ইয়াছাৰ ইব্ৰাহিমৰ গ’লৰ সহায়ত ইজিপ্তে অগ্ৰগতি লাভ কৰে। দ্বিতীয়াৰ্ধত মুস্তাফা জিকোৱে ইজিপ্তৰ হৈ দ্বিতীয়টো গ’ল দি ২-০ ব্যৱধানেৰে দলটোক শক্তিশালী অৱস্থানলৈ লৈ যায়। ইজিপ্তে তৃতীয় গ’লো কৰিছিল, কিন্তু VAR পৰীক্ষাৰ পিছত সেই গ’লটো বাতিল কৰা হয়। সেই সময়ত আৰ্জেণ্টিনাৰ বিদায় প্ৰায় নিশ্চিত যেন লাগিছিল। ৩৯ বছৰীয়া লিঅ’নেল মেছিৰ বিশ্বকাপ অভিযান Round of 16তেই সমাপ্ত হোৱাৰ আশংকাই দেখা দিছিল।
কিন্তু ৭৯ মিনিটত ক্ৰিষ্টিয়ান ৰোমেৰোৱে হেডাৰেৰে প্ৰথমটো গ’ল কৰি আৰ্জেণ্টিনাক প্ৰত্যাৱৰ্তন কৰোৱায়। ইয়াৰ মাত্ৰ চাৰি মিনিট পিছতেই মেছিয়ে সমতা সূচক গ’ল কৰি স্ক’ৰ ২-২ কৰে আৰু ইনজুৰি টাইমত ফাৰ্নান্দেজে বিজয়সূচক গ’লটো দি আৰ্জেণ্টিনাক ৩-২ গ’লৰ নাটকীয় জয় উপহাৰ দিয়ে। এই মেচখন কেৱল নাটকীয় প্ৰত্যাৱৰ্তনৰ বাবেই নহয়, একাধিক বিতৰ্কৰ বাবেও চৰ্চালৈ আহিছে। মেছিয়ে এটা পেনাল্টি মিছ কৰাৰ লগতে ইজিপ্তৰ এটা গ’ল VARৰ জৰিয়তে বাতিল কৰা হয়। সেই সিদ্ধান্তক কেন্দ্ৰ কৰিয়েই মুস্তাফা জিকোৱে ফিফাৰ বিৰুদ্ধে টুৰ্ণামেণ্ট ফিক্সিঙৰ অভিযোগ উত্থাপন কৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
