বাবা ছিদ্দিকী হত্যাকাণ্ডৰ আৰু দুই অভিযুক্ত আটক, অন্য ধৰণে তদন্ত আৰম্ভ আৰক্ষীৰ
এন চি পি নেতা বাবা ছিদ্দিকীৰ হত্যাকাণ্ডৰ গোচৰত আৰু দুজন অভিযুক্তক গ্ৰেপ্তাৰ। মুম্বাই ক্ৰাইম ব্ৰাঞ্চে জনোৱা মতে, দুয়োজন অভিযুক্তক মহাৰাষ্ট্ৰৰ পুনেৰ পৰা গ্ৰেপ্তাৰ কৰা হৈছে। ইয়াৰ লগে লগে বাবা ছিদ্দিকী হত্যাকাণ্ডৰ গোচৰত গ্ৰেপ্তাৰ হোৱা অভিযুক্তৰ সংখ্যা ১৮ জনলৈ বৃদ্ধি পাইছে। ইয়াৰ পূৰ্বে বুধবাৰেও বাবা ছিদ্দিকী হত্যাকাণ্ডৰ গোচৰত এজন অভিযুক্তক গ্ৰেপ্তাৰ কৰা হৈছিল।
উল্লেখ্য যে, এন চি পিৰ নেতা বাবা ছিদ্দিকীক বিগত ১২ অক্টোবৰত পুত্ৰ জীছান ছিদ্দিকীৰ কাৰ্যালয়ৰ বাহিৰত গুলীয়াই হত্যা কৰা হৈছিল। এন চি পিৰ নেতাজনৰ হত্যাকাণ্ডৰ লগত কাৰাবন্দী গেংষ্টাৰ লৰেন্স বিষ্ণোই জড়িত বুলি জানিব পৰা গৈছিল।
আৰক্ষীয়ে এই গোচৰৰ তদন্ত অব্যাহত ৰাখিছে। বাবা ছিদ্দিকী হত্যাকাণ্ডৰ গোচৰত বলীউডৰ অভিনেতা ছলমান খানৰ ঘনিষ্ঠতাৰ কোণৰ পৰা আৰক্ষীয়ে তদন্ত চলাই আছে। ইয়াৰ উপৰিও বস্তি পুনৰ্বাসন কৰ্তৃপক্ষইও প্ৰকল্পটোৰ কোণৰ পৰা এই হত্যাকাণ্ডৰ তদন্ত চলাই আছে।
ঘটনাৰ মূলতে বাবা ছিদ্দিকী আৰু তেওঁৰ পুত্ৰ জীশন ছিদ্দিকীয়ে বান্দ্ৰা কুৰলা কমপ্লেক্সত দুটা বস্তি পুনৰ উন্নয়ন প্ৰকল্প, সন্ত জ্ঞানেশ্বৰ নগৰ আৰু ভাৰত নগৰৰ বিৰুদ্ধে প্ৰতিবাদ কৰিছিল। এছ আৰ এ প্ৰকল্পৰ অধীনত বান্দ্ৰা কুৰ্লা কমপ্লেক্সৰ চাৰি হাজাৰ পৰিয়ালৰ ঠাইত বিশাল আৱাসিক অট্টালিকা আৰু পাঁচ তাৰকাযুক্ত হোটেল নিৰ্মাণৰ প্ৰস্তাৱ দিয়া হৈছিল।
কিন্তু এই সকলোবোৰৰ বিপৰীতে সেই স্থানৰ পৰা উচ্ছেদিত পৰিয়ালবোৰক বিকল্প ব্যৱস্থা হিচাপে ঘৰ দিব লাগে পৰিয়ালবোৰে দাবী কৰিছিল। এই প্ৰকল্পৰ প্ৰতিবাদত বিষয়াসকলৰ কামত হস্তক্ষেপ কৰাৰ বাবে জীশান ছিদ্দিকীৰ বিৰুদ্ধেও এফআইআৰ ৰুজু কৰা হৈছিল।
এই বিষয়ত ছিদ্দিকী পৰিয়ালেও ভাবুকি লাভ কৰিছিল। এই বিবাদেই বাবা ছিদ্দিকী হত্যাৰ কাৰণো হ’ব পাৰে বুলি আৰক্ষীয়ে সন্দেহ প্ৰকাশ কৰিছে। মুম্বাই ক্ৰাইম ব্ৰাঞ্চেও বস্তি পুনৰ্বাসন কৰ্তৃপক্ষৰ প্ৰকল্পৰ সৈতে জড়িত নথি-পত্ৰ কৰ্তৃপক্ষৰ বিষয়াসকলৰ পৰা বিচাৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
