মুম্বাইৰ আন্ধেৰীৰ এগৰাকী ৩৩ বছৰীয়া মহিলা চাইবাৰ প্ৰৱঞ্চনাৰ বলি হৈ ৪৯,৭২০ টকা হেৰুৱাবলগীয়া হৈছে। পুৰণি ৫ টকীয়া নোটৰ বিনিময়ত ২৬.৫ লাখ টকা লাভ কৰাৰ প্ৰলোভন দেখুৱাই মহিলাগৰাকীৰ পৰা এই ধন হৰলুকী কৰা হয়। ঘটনাক কেন্দ্ৰ কৰি আম্বলি আৰক্ষীয়ে ঘটনা সন্দৰ্ভত গোচৰ ৰুজু কৰিছে। আৰক্ষীৰ FIR অনুসৰি, ২৯ আগষ্টত মহিলাগৰাকীয়ে ঘৰত বহি ফেচবুকত Reel চাই আছিল। সেই সময়তে তেওঁ এটা ৰীলত চকু পৰে, য’ত দাবী কৰা হৈছিল যে ‘কইন শ্বপ অল্ড কইন কোম্পানী, মুম্বাই’ নামৰ এটা প্ৰতিষ্ঠানে পুৰণি নোটৰ বিনিময়ত ২৬.৫ লাখ টকা দিব। এই দাবীক সত্য বুলি ভাবি মহিলাগৰাকীয়ে ৰীলটোত দিয়া মোবাইল নম্বৰত যোগাযোগ কৰে। ফোনত কথা পতা ব্যক্তিজনে নিজকে কোম্পানীটোৰ কৰ্মচাৰী বুলি পৰিচয় দিয়ে আৰু কোম্পানীটো কাণ্ডীৱলীৰ পৰা পৰিচালিত হয় বুলি জনায়।
ইয়াৰ পিছত অভিযুক্তই মহিলাগৰাকীক তেওঁৰ হাতত থকা পুৰণি ৫ টকীয়া নোটখনৰ ফটো, আধাৰ কাৰ্ড আৰু নিজৰ ফটো হোৱাটছএপৰ জৰিয়তে পঠিয়াবলৈ কয়। লগতে পৰিচয় পত্ৰ, পঞ্জীয়ন মাচুল আৰু GSTৰ নামত ধন দিব লাগিব বুলিও জনায়। অভিযুক্তই হোৱাটছ এপত জনাইছিল যে ৩০ আগষ্টত কোম্পানীটোৰ এজন প্ৰতিনিধি মহিলাগৰাকীৰ ঘৰত উপস্থিত হৈ পুৰণি নোটখন সংগ্ৰহ কৰিব। কিন্তু তাৰ পূৰ্বে পৰিচয় পত্ৰৰ বাবে ৭২০ টকা আৰু পঞ্জীয়নৰ বাবে ১২,৫০০ টকা দিব লাগিব বুলি কয়।
অভিযুক্তৰ কথাত বিশ্বাস কৰি মহিলাগৰাকীয়ে তেওঁলোকে দিয়া বেংক একাউণ্টত ধন ট্ৰেন্সফাৰ কৰিবলৈ আৰম্ভ কৰে। প্ৰথমে তেওঁ ১২ হাজাৰ টকা ট্ৰেন্সফাৰ কৰে। ইয়াৰ পিছত পৰিচয় পত্ৰৰ নামত ৭২০ টকা, পঞ্জীয়নৰ নামত ১২ হাজাৰ টকা আৰু GSTৰ নামত ২৪,৫০০ টকা জমা দিয়ে। ইয়াৰ পিছতো অভিযুক্তই বিভিন্ন ধৰণৰ চাৰ্জৰ অজুহাত দেখুৱাই মহিলাগৰাকীৰ পৰা আৰু ১১,৭৭০ টকা সংগ্ৰহ কৰে। এইদৰে কিস্তিত কিস্তিত মহিলাগৰাকীয়ে মুঠ ৪৯,৭২০ টকা হেৰুৱায়।
ধনখিনি লাভ কৰাৰ পিছতে অভিযুক্তই নিজৰ মোবাইল ফোনটো বন্ধ কৰি দিয়ে। আনহাতে, হোৱাটছএপতো মহিলাগৰাকীক ব্লক কৰি দিয়ে। তেতিয়াহে মহিলাগৰাকীয়ে তেওঁ চাইবাৰ প্ৰৱঞ্চনাৰ বলি হোৱা বুলি বুজিব পাৰে। ঘটনাৰ পিছত মহিলাগৰাকীয়ে আৰক্ষীৰ কাষ চাপে। আম্বলি আৰক্ষীয়ে অজ্ঞাত ব্যক্তিৰ বিৰুদ্ধে জালিয়াতিৰ গোচৰ ৰুজু কৰি তদন্ত আৰম্ভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
